ဆက်သွယ်ရေး ဥပဒေနဲ့ ထောင်ဒဏ် ၅ နှစ် ချမှတ်ခံထားရတဲ့ သရုပ်ဆောင် သင်ဇာဝင့်ကျော် ပြန်လည် လွတ်မြောက်…
ဇန်နဝါရီ ၄ ၊ ၂၀၂၅
အကြမ်းဖက်စစ်ကောင်စီက အီလက်ထရောနစ်ဆက်သွယ်ရေးဥပဒေပုဒ်မ ၃၃ (က)နဲ့ ထောင်ဒဏ် ၅ နှစ်ချမှတ်ခံခဲ့ရတဲ့ သရုပ်ဆောင် သင်ဇာဝင့်ကျော်ဟာ ဇန်နဝါရီ ၄ ရက် ဒီနေ့မှာ ပြစ်ဒဏ်လွတ်ငြိမ်းခွင့်နဲ့ ပြန်လည် လွတ်မြောက်လာတယ်လို့ သူမနဲ့ နီးစပ်တဲ့ အနုပညာအသိုင်းအဝိုင်းဆီက သိရပါတယ်။
သရုပ်ဆောင်မော်ဒယ် သင်ဇာဝင့်ကျော်ဟာ လိင်အသားပေးဓာတ်ပုံနဲ့ ဗီဒီယိုတွေကို လူမှုကွန်ရက်က အခကြေးငွေရယူပြီး ဖြန့်ဝေတယ်ဆိုတဲ့ စွဲချက်နဲ့ စစ်ကောင်စီရဲ့ ဖမ်းဆီးအမှုဖွင့်ခံခဲ့ရတာဖြစ်ပြီး ဆက်သွယ်ရေး ဥပဒေပုဒ်မ ၃၃(က) အရ ၂၀၂၂ ခုနှစ်၊ ဒီဇင်ဘာ ၂၃ ရက်မှာ ထောင်ဒဏ် ၅ နှစ် ချမှတ်ခံခဲ့ရတာဖြစ်ပါတယ်။
သင်ဇာဝင့်ကျော်လို ဆက်သွယ်ရေး ဥပဒေပုဒ်မ ၃၃(က) နဲ့ ထောင်ဒဏ်ချမှတ်ခံထားရတဲ့ မော်ဒယ် နန်းမွေ့စံဟာလည်း ပြစ်ဒဏ်လွတ်ငြိမ်းခွင့်မှာ ပါဝင်တယ်လို့ သတင်းတွေ ထွက်ပေါ်နေပေမယ့် မောင်းသတင်းဌာနအနေနဲ့ အတည်မပြုနိုင်သေးပါဘူး။
အဖော်အချွတ်မော်ဒယ်လို့ အများက သိကြတဲ့ နန်းမွေစံကိုတော့ ၂၀၂၂ ခုနှစ် စက်တင်ဘာ ၂၇ ရက်မှာ အကြမ်းဖက်စစ်ကောင်စီက ဆက်သွယ်ရေး ဥပဒေပုဒ်မ ၃၃(က) နဲ့ ထောင်ဒဏ် ၆ နှစ် ချမှတ်ခဲ့တာဖြစ်ပါတယ်။
ဓာတ်ပုံ – လူမှုကွန်ရက်