စမ်းချောင်း မိုင်းဖောက်ခွဲမှု Joker အဖွဲ့က ၎င်းတို့လက်ချက်ဟု ထုတ်ပြန်ပြီး စစ်တပ်က အဆိုတော်ယုန်လေးကို ခေါ်ထုတ်သွား၍ လွတ်မြောက်သွားခဲ့သော်လည်း ရေဆုံးမြေဆုံး ရှာဖွေမည်ဟုဆို
ရန်ကုန်၊ ဒီဇင်ဘာ ၃၁
အကြမ်းဖက်စစ်ကောင်စီ၏ အဓိကထောက်တိုင် ဖြစ်သည့် အောင်ဖုန်းကျော် ခေါ် အဆိုတော် ယုန်လေးနှင့် လက်ပါးစေများကို စမ်းချောင်းမြို့နယ်၊ ဖျာပုံလမ်းအတွင်း ချိန်ကိုက်မိုင်းများဖြင့် ဖောက်ခွဲတိုက်ခိုက်ခဲ့ကြောင်း Joker အဖွဲ့က ထုတ်ပြန်ကြေညာသည်။
ယမန်နေ့ ဒီဇင်ဘာ ၃၀ ရက်နေ့ နံနက် ၉ နာရီ ၅ မိနစ်နှင့် နံနက် ၁၁ နာရီ ၃၈ မိနစ် အချိန်တို့တွင် ချိန်ကိုက်မိုင်းဖြင့် အဆိုတော် ယုန်လေး နေထိုင်ရာ ဖျာပုံလမ်းအတွင်း ဖောက်ခွဲတိုက်ခိုက်ခဲ့ကြောင်း၊ အဆိုတော် ယုန်လေး သည် အကြမ်းဖက်စစ်တပ်အတွက် ပွဲလမ်းများ စီစဉ်ပြုလုပ်ကာ လော်ဘီလုပ် ဝါဒဖြန့်စည်းရုံးလှုံ့ဆော်နေသည့်အပြင် အခြား သရုပ်ဆောင်နှင့် အနုပညာရှင်များကို အကြမ်းဖက်စစ်တပ်နှင့် ခြိမ်းခြောက်အကျပ်ကိုင် ခံဝန်ထိုးခိုင်းခြင်းများ လုပ်ဆောင်နေ၍ အပြစ်ပေးအရေးယူသည့် အနေဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း Joker အဖွဲ့က ပြောသည်။
အဆိုပါ တိုက်ခိုက်မှုတွင် ယုန်လေးသည် ပစ်မှတ်နေရာမှ လွဲချော်လွတ်မြောက်သွားခဲ့သော်လည်း ယုန်လေး၏ လက်ပါးစေ ယောက်ဖ ဖြစ်သူ ထိခိုက်ဒဏ်ရာရရှိ၍ ၎င်းတို့ စီးသည့် ကားများ ထိခိုက်ပျက်စီးခဲ့ကြောင်း၊ တိုက်ခိုက်မှုအပြီးတွင် အကြမ်းဖက်စစ်တပ်သည် ယုန်လေးနှင့် မိသားစုကို ချက်ချင်းအကာအကွယ်ပေးကာ ပစ်မှတ်နေရာမှ ကားများဖြင့် ခေါ်ထုတ်သွားခဲ့ကြောင်း သိရှိရသည်။
အဆိုတော် ယုန်လေးသည် အမြဲလိုလို ပြည်သူကို အကာအကွယ်ယူကာ သွားလာလှုပ်ရှားလေ့ရှိသည့်အတွက် တိုက်ခိုက်မှုလုပ်ဆောင်ရာတွင် အခက်အခဲများစွာရှိခဲ့ကြောင်း၊ ပြည်သူထိခိုက်မှု အနည်းဆုံးဖြစ်အောင် စီစဉ်ဆောင်ရွက်ခဲ့ကြောင်း၊ တိုက်ခိုက်မှုအတွင်း ပစ်မှတ်အနီးအနားရှိ ပြည်သူ ၁ ဦးထိခိုက်ကာ ပြည်သူ့နေအိမ်အချို့နှင့် ကားအချို့ ပျက်စီးမှုရှိခဲ့သည့်အတွက် နားလည်ခွင့်လွှတ်ပေးရန် အနူးအညွတ်ပန်ကြားကြောင်းလည်း Joker အဖွဲ့က ပြောသည်။
Joker အဖွဲ့အနေဖြင့် စစ်တပ်ဘက်တော်သား အဆိုတော်ယုန်လေးကို ရေဆုံးမြေဆုံး ရှာဖွေမည်ဖြစ်ကြောင်း၊ ၎င်းနှင့် ကြံရာပါ အနုပညာအမည်ခံ အကြမ်းဖက်စစ်တပ်နှင့် ပူးပေါင်းနေကြသည့် ဒေါက်တိုင်များကို ထိထိရောက်ရောက်အရေးယူမည်ဟု ထုတ်ပြန်ထားသည်။