စစ်ကောင်စီ၏ တိုင်းစစ်ဌာနချုပ် ၂ ခုနှင့် မြို့ပေါင်း ၉၃ ခုကို သိမ်းပိုက်ပြီးနောက် ဗိုလ်ချုပ်နှင့် ဗိုလ်မှူးချုပ် အဆင့် စစ်ခေါင်းဆောင် ၂၁ ဦး စစ်သုံ့ပန်းအဖြစ် ဖမ်းဆီးခံရခြင်း၊ သေဆုံးခြင်း၊ စစ်ရှုံးခြင်းများကြောင့် ထောင်ချခံထားရ

စစ်ကောင်စီ၏ တိုင်းစစ်ဌာနချုပ် ၂ ခုနှင့် မြို့ပေါင်း ၉၃ ခုကို သိမ်းပိုက်ပြီးနောက် ဗိုလ်ချုပ်နှင့် ဗိုလ်မှူးချုပ် အဆင့် စစ်ခေါင်းဆောင် ၂၁ ဦး စစ်သုံ့ပန်းအဖြစ် ဖမ်းဆီးခံရခြင်း၊ သေဆုံးခြင်း၊ စစ်ရှုံးခြင်းများကြောင့် ထောင်ချခံထားရ
ရန်ကုန်၊ ဒီဇင်ဘာ ၂၉

နွေဦးတော်လှန်ရေး ၄ နှစ်နီးပါး ကာလအတွင်း အကြမ်းဖက် စစ်ကောင်စီ၏ တိုင်းစစ်ဌာနချုပ် ၂ ခုနှင့် မြို့ပေါင်း ၉၃ ခုကို တော်လှန်ရေးတပ်များက သိမ်းပိုက်ပြီးနောက် ဗိုလ်ချုပ်နှင့် ဗိုလ်မှူးချုပ် အဆင့် ထိပ်တန်းစစ်အရာရှိ ၂၁ ဦး စစ်သုံ့ပန်းအဖြစ် ဖမ်းဆီးခံရခြင်း၊ သေဆုံးခြင်း၊ စစ်ရှုံးခြင်းကြောင့် ထောင်ချခံထားရခြင်းများ ဖြစ်ပေါ်လျက်ရှိသည်။
စစ်အာဏာရှင် ဆန့်ကျင်ရေး နွေဦးတော်လှန်ရေး ၄ နှစ်နီးပါးကာလအတွင်း မြန်မာနိုင်ငံတစ်ဝန်းရှိ မြို့ပေါင်း ၉၁ မြို့ကို တော်လှန်ရေးတပ်များက တိုက်ခိုက်သိမ်းပိုက်ခဲ့သည့်အပြင် အရေးပါသည့် အရှေ့မြောက်တိုင်းစစ်ဌာနချုပ်၊ အနောက် ပိုင်းတိုင်းစစ်ဌာနချုပ် တို့ကို သိမ်းပိုက်ရရှိခဲ့ပြီးဖြစ်သည်။
အကြမ်းဖက်စစ်ကောင်စီ၏ စစ်စခန်းပေါင်း ရာပေါင်းများစွာမှာ တော်လှန်ရေးတပ်များ၏ တိုက်ခိုက်သိမ်းပိုက်မှုကို ခံနေရပြီး တိုင်းမှူးအဆင့် ဗိုလ်ချုပ်မှ စ၍ ဗိုလ်မှူးချုပ်အဆင့်အထိ စစ်သုံ့ပန်းအဖြစ် ဖမ်းဆီးခံရခြင်း၊ သေဆုံးခြင်း၊ စစ်ရှုံးခြင်းများကြောင့် ထောင်ချခံထားရများ ကြုံတွေ့နေရသည်။
ရန်ကုန်ခေတ်သစ်သတင်းဌာနက ပြုစုထားသော စာရင်းများအရ တိုင်းမှူးအဆင့် ဗိုလ်ချုပ်မှ စ၍ ဗိုလ်မှူးချုပ်အဆင့်အထိ စစ်သုံ့ပန်းအဖြစ် ဖမ်းဆီးခံရခြင်း၊ သေဆုံးခြင်း၊ စစ်ရှုံးခြင်းများကြောင့် ထောင်ချခံထားရသူ စုစုပေါင်း ၂၁ ဦးရှိကြောင်း သိရှိရသည်။
၁- အရှေ့မြောက်တိုင်းစစ်ဌာနချုပ် တိုင်းမှူးဟောင်း ဗိုလ်ချုပ်စိုးတင့်
ကိုးကန့် တပ်မတော် MNDAA က လားရှိုးအခြေစိုက် အရှေ့မြောက်တိုင်းစစ်ဌာနချုပ်ကို ယခုနှစ် ဩဂုတ်လ ၃ ရက်နေ့တွင် တိုက်ခိုက်သိမ်းပိုက်ခဲ့ပြီး ဩဂုတ်လ ၄ ရက်နေ့ အရှေ့မြောက်တိုင်းစစ်ဌာနချုပ် တိုင်းမှူး ဗိုလ်ချုပ်စိုးတင့် (တေဇ-၁၆) ကို စစ်သုံ့ပန်းအဖြစ် ဖမ်းဆီးရရှိသည်။
၂- အရှေ့မြောက်တိုင်းစစ်ဌာနချုပ်၊ တိုင်းဦးစီးချုပ် ဗိုလ်မှူးချုပ် သန့်ထင်စိုး
ကိုးကန့် တပ်မတော် MNDAA က လားရှိုးအခြေစိုက် အရှေ့မြောက်တိုင်းစစ်ဌာနချုပ်ကို ယခုနှစ် ဩဂုတ်လ ၃ ရက်နေ့တွင် တိုက်ခိုက်သိမ်းပိုက်ခဲ့ပြီး ဩဂုတ်လ ၄ ရက်နေ့ အရှေ့မြောက်တိုင်းစစ်ဌာနချုပ်၊ တိုင်းဦးစီးချုပ် ဗိုလ်မှူးချုပ် သန့်ထင်စိုး (DSA အပတ်စဉ် ၄၁) ကို စစ်သုံ့ပန်းအဖြစ် ဖမ်းဆီးရရှိသည်။
၃- အမှတ် ၁ စစ်ဆင်ရေးကွပ်ကဲမှု ဌာနချုပ် ၊ တပ်မမှူး ဗိုလ်မှူးချုပ် မျိုးမင်းထွေး
ကိုးကန့် တပ်မတော် MNDAA က လားရှိုးအခြေစိုက် အရှေ့မြောက်တိုင်းစစ်ဌာနချုပ်ကို ယခုနှစ် ဩဂုတ်လ ၃ ရက်နေ့တွင် တိုက်ခိုက်သိမ်းပိုက်ခဲ့ပြီး ဩဂုတ်လ ၄ ရက်နေ့ ကျောက်မဲ အခြေစိုက် စစ်ဆင်ရေးကွပ်ကဲမှုဌာနချုပ် (စကခ) ၁ မှူး ဗိုလ်မှူးချုပ် မျိုးမင်းထွေး (တေဇ-၂၆) ကို MNDAA က စစ်သုံ့ပန်းအဖြစ် ဖမ်းဆီးရရှိခဲ့သည်။
နောက်ပိုင်းတွင် MNDAA က ပြန်လွှတ်ပေးခဲ့သဖြင့် တပ်မတော်တန်းမြင့်လေ့ကျင့်ရေး သင်တန်းကျောင်း (တတက-၁၃) ကျောင်းအုပ်ကြီးအဖြစ် ခန့်အပ်ခံခဲ့ရပြီး ဒီဇင်ဘာလ ၁၈ ရက်နေ့တွင် မုံရွာအခြေစိုက် အနောက်မြောက်တိုင်းစစ်ဌာနချုပ်၏ တိုင်းမှူးဖြစ်လာသည်။
၄- အနောက်ပိုင်းတိုင်းစစ်ဌာနချုပ် ဒုတိယတိုင်းမှူး ဗိုလ်မှူးချုပ်သောင်းထွန်း
ရခိုင်ပြည်နယ်၊ အမ်းမြို့နယ်ရှိ အနောက်ပိုင်းတိုင်းစစ်ဌာနချုပ်ကို ဒီဇင်ဘာလ ၂၀ ရက်နေ့ AA က တိုက်ခိုက် သိမ်းပိုက်ပြီးနောက် ဒုတိယတိုင်းမှူး ဗိုလ်မှူးချုပ်သောင်းထွန်း (DSA အပတ်စဉ် ၄၁ ) ကို စစ်သုံ့ပန်းအဖြစ် AA က ဖမ်းဆီးရရှိခဲ့သည်။ လက်ရှိတွင် ၎င်း ကျူးလွန်သော စစ်ရာဇဝတ်မှုများအတွက် AA က စစ်ဆေးလျက်ရှိသည်။
၅- အနောက်ပိုင်းတိုင်း စစ်ဌာနချုပ် တိုင်းဦးစီးချုပ် ဗိုလ်မှူးချုပ် ကျော်ကျော်သန်း
ရခိုင်ပြည်နယ်၊ အမ်းမြို့နယ်ရှိ အနောက်ပိုင်းတိုင်းစစ်ဌာနချုပ်ကို ဒီဇင်ဘာလ ၂၀ ရက်နေ့ AA က တိုက်ခိုက် သိမ်းပိုက်ပြီးနောက် တိုင်းဦးစီးချုပ် ဗိုလ်မှူးချုပ်ကျော်ကျော်သန်း (OTS- ၂၁ ) ကို စစ်သုံ့ပန်းအဖြစ် AA က ဖမ်းဆီးရရှိခဲ့သည်။ လက်ရှိတွင် ၎င်း ကျူးလွန်သော စစ်ရာဇဝတ်မှုများအတွက် AA က စစ်ဆေးလျက်ရှိသည်။
၆- ဘူးသီးတောင် အမှတ် ၁၅ စစ်ဆင်ရေးကွပ်ကဲမှုဌာနချုပ်မှူး ဗိုလ်မှူးချုပ် သူရိန်ထွန်း
ရခိုင်ပြည်နယ်၊ မောင်တောမြို့နယ်ရှိ အမှတ် ၅ နယ်ခြားစောင့်ရဲတပ်ဖွဲ့ခွဲ (နခခ ၅ ) ကို AA က သိမ်းပိုက်ပြီးနောက် ဒီဇင်ဘာလ ၈ ရက်နေ့ ညနေပိုင်း ဘူးသီးတောင်အခြေစိုက် အမှတ် ၁၅ စစ်ဆင်ရေးကွက်ကဲမှုဌာနချုပ် စကခမှူး ဗိုလ်မှူးချုပ် သူရိန်ထွန်း (OTS -၂၂ )ကို စစ်သုံ့ပန်းအဖြစ် ဖမ်းဆီးရရှိခဲ့သည်။ မန္တလေးအခြေစိုက် အလယ်ပိုင်းတိုင်းစစ်ဌာနချုပ်၏ တိုင်းဦးစီးချုပ် ရာထူး တာဝန်ထမ်းဆောင်စဉ် တော်လှန်ရေးရဲဘော်များကို သတ်ဖြတ်သော စစ်ရာဇဝတ်မှုများစွာ ကျူးလွန်ခဲ့သည့်အတွက် AA က ဖမ်းဆီး စစ်ဆေးလျက်ရှိကြောင်း သိရှီရသည်။
၇- အရှေ့မြောက်တိုင်းစစ်ဌာနချုပ် ဒုတိယတိုင်းမှူး ဗိုလ်မှူးချုပ်တင်ထွန်းအောင်
ယခုနှစ် ဇူလိုင်လအတွင်း MNDAA က လားရှိုးမြို့သိမ်းတိုက်ပွဲ ဆင်နွှဲနေစဉ် အရှေ့မြောက်တိုင်းစစ်ဌာနချုပ် ဒုတိယတိုင်းမှူး ဗိုလ်မှူးချုပ်တင်ထွန်းအောင်သည် ဒရုန်းဗုံးထိမှန်၍ သေဆုံးခဲ့ကြောင်း တပ်သတင်းရင်းမြစ်တချို့က ပြောဆိုထားသည်။
၈- ဗိုလ်မှူးချုပ် မိုးကျော်သူ လောက်ကိုင် ဒကစမှူး
ယခုနှစ် ဇန်နဝါရီလ ၄ ရက်နေ့ လောက်ကိုင် ဒကစမှူး ဗိုလ်မှူးချုပ် မိုးကျော်သူသည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် သေဒဏ်ချမှတ် အရေးယူခဲ့သည်။
၉- ဗိုလ်မှူးချုပ်ထွန်းထွန်းမြင့် (လောက်ကိုင်ဒေသ အုပ်ချုပ်ရေးအဖွဲ့ ဥက္ကဋ္ဌ)
ယခုနှစ် ဇန်နဝါရီလ ၄ ရက်နေ့ လောက်ကိုင်ဒေသ အုပ်ချုပ်ရေးအဖွဲ့ ဥက္ကဋ္ဌ ဗိုလ်မှူးချုပ်ထွန်းထွန်းမြင့်သည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် သေဒဏ်ချမှတ် အရေးယူခဲ့သည်။
၁၀- ဗိုလ်မှူးချုပ် ဇော်မျိုးဝင်း (တပ်မ ၅၅ တပ်မမှူး)
ယခုနှစ် ဇန်နဝါရီလ ၄ ရက်နေ့ တပ်မ ၅၅ တပ်မမှူး ဗိုလ်မှူးချုပ်​ ဇော်မျိုးဝင်း သည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် သေဒဏ်ချမှတ် အရေးယူခဲ့သည်။
၁၁- ဗိုလ်မှူးချုပ် သော်ဇင်ဦး (စကခ ၁၆ ကွပ်ကဲရေးမှူး)
ယခုနှစ် ဇန်နဝါရီလ ၄ ရက်နေ့ စကခ ၁၆ ကွပ်ကဲရေးမှူး ဗိုလ်မှူးချုပ်​ သော်ဇင်ဦး သည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် တစ်သက်တစ်ကျွန်းနှင့်ထောင်ဒဏ်နှစ်ရှည်ချမှတ် အရေးယူခဲ့သည်။
၁၂- ဗိုလ်မှူးချုပ် အောင်ဇော်လင်း (စကခ ၁၂ ကွပ်ကဲရေးမှူး)
ယခုနှစ် ဇန်နဝါရီလ ၄ ရက်နေ့ စကခ ၁၂ ကွပ်ကဲရေးမှူး ဗိုလ်မှူးချုပ်​ အောင်ဇော်လင်း သည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် တစ်သက်တစ်ကျွန်းနှင့်ထောင်ဒဏ်နှစ်ရှည်ချမှတ် အရေးယူခဲ့သည်။
၁၃- ဗိုလ်မှူးချုပ် အေးမင်းဦး (စကခ ၁၄ ကွပ်ကဲရေးမှူး)
ယခုနှစ် ဇန်နဝါရီလ ၄ ရက်နေ့ စကခ ၁၄ ကွပ်ကဲရေးမှူး ဗိုလ်မှူးချုပ်​ အေးမင်းဦး သည် MNDAA ထံတွင် လက်နက်ချ အညံ့ခံခဲ့ပြီး မတ်လအတွင်း စစ်ကောင်စီက တပ်မတော်အက်ဥပဒေ၊ နိုင်ငံတော်ပုန်ကန်မှုများဖြင့် တစ်သက်တစ်ကျွန်းနှင့်ထောင်ဒဏ်နှစ်ရှည်ချမှတ် အရေးယူခဲ့သည်။
၁၄- ဗိုလ်မှူးချုပ် မင်းမင်းထွန်း (တပ်မ ၁၀၁ တပ်မမှူး)
၂၀၂၃ ခုနှစ် ဒီဇင်ဘာလ ၁၅ ရက်နေ့ ရှမ်းပြည်နယ်မြောက်ပိုင်း၊ နမ့်ဆန်မြို့ရှိ စစ်တပ် ဗျူဟာကုန်းကို TNLA တပ်များက သိမ်းပိုက်ပြီးနောက် စစ်ဗျူ ဟာကုန်းတွင် စစ်ကူများ အပါအဝင် စစ်ကြောင်းများကို အထိုင်ချ ကွပ် ကဲနေသော အမှတ် ၁၀၁ ခြေမြန်တပ်မဌာနချုပ် ၊ တပ်မမှူး ဗိုလ်မှူးချုပ် မင်းမင်းထွန်းကို ဖမ်းဆီးရရှိခဲ့ခြင်းဖြစ်သည်။
၁၅- ဗိုလ်မှူးချုပ် ဇော်မင်းထွန်း (စကခ ၉ စကခမှူး -ကျောက်တော်)
ဖေဖော်ဝါရီလ ၇ ရက်နှင့် ၈ ရက်နေ့ ကျောက်တော်မြို့နယ်၊ အပေါက်ဝကျေးရွာ အနီး ရေကြောင်းတိုက်ပွဲအတွင်းမှ အသက်လုထွက်ပြေးသွားသော စကခ ၉ တပ်မမှူး အသက် ၅၁ နှစ်အရွယ် ဗိုလ်မှူးချုပ် ဇော်မင်းထွန်းကို အရှင်လက်ရဖမ်းမိခဲ့သည်။
၁၆- ဗိုလ်မှူးချုပ် ဇင်မျိုးဆွေ (စကခ ၁၉ စကခမှူး-ပလက်၀)
ဇန်နဝါရီလအတွင်း ပလက်ဝဒေသအခြေစိုက် အခြားသော ရှေ့တန်းဌာနချုပ်တစ်ခုဖြစ်သော စကစ ၁၉ ၊ ရှေ့တန်း ဌာ နချုပ် တပ်မမှူး ဗိုလ်မှူးချုပ် ဇင်မျိုးဆွေ (တေဇ ၂၃) သေဆုံး (သို့မဟုတ်) ပျောက်ဆုံးလျက် ရှိကြောင်း ရခိုင့် တပ်တော် – AA က ထုတ်ပြန်ထားသည်။
၁၇- ဗိုလ်မှူးချုပ် မင်းထွဋ်ဦး (တပ်မ ၈၈ တပ်မမှူး)
ကချင်ပြည်နယ် မိုးမောက်မြို့နယ်၊ ကုန်းလောရွာ အနီး မန်နောင်ရွာပတ်ဝန်းကျင်တွင် ဖြစ်ပွားခဲ့သော တိုက်ပွဲတွင် စစ်ကောင်စီတပ်ဘက်မှ အမှတ် ၈၈ ခြေမြန်တပ်မဌာနချုပ်မှ တပ်မမှူး ဗိုလ်မှူးချုပ်မင်းထွဋ်ဦး သေဆုံးခဲ့သည်။ မတ်လ ၂၉ ရက်နေ့ ညနေ ၄ နာရီအချိန် KIAနှင့်KPDFပူးပေါင်းတပ်ဖွဲ့နှင့် ခယာဘွမ်၊ ဘွမ်ရယ်ဘွမ်စခန်းမှ ထွက်ပြေးလာကြသော တပ်မ ၈၈ စစ်ကြောင်းများ တိုက်ပွဲဖြစ်ပွားစဉ် အမှတ် ၈၈ တပ်မမှူး ဗိုလ်မှူးချုပ် မင်းထွဋ်ဦး သေဆုံးခဲ့ခြင်းဖြစ်ကြောင်း၊ ထွက်ပြေးလာသော တပ်မ ၈၈ စစ်ကြောင်းများသည် မန်နောင်ကျေးရွာနှင့် အခြားကျေးရွာများတွင် တပ်စွဲနေခဲ့ကြခြင်းဖြစ်ကြောင်း သိရှိရသည်။
ဗိုလ်မှူးချုပ်မင်းထွဋ်ဦးမှာ စစ်တက္ကသိုလ် အပတ်စဉ် ၄၂ ကျောင်းဆင်းဖြစ်ပြီး ၂၀၂၄ ခုနှစ် ဇန်နဝါရီလ ၄ ရက်နေ့တွင် အကြမ်းဖက် မင်းအောင်လှိုင်က အမိန့်စာ ၅/၂၀၂၄ ဖြင့် စစ်မှုထမ်းကောင်း တံဆိပ် ပေးအပ်ခံထားရသူဖြစ်ကြောင်း သိရှိရသည်။
၁၈- ဗိုလ်မှူးချုပ် အေးမင်းနောင် (တပ်မ ၄၄ တပ်မမှူး)
ယခုနှစ် ဇန်နဝါရီလ ၂၉ ရက်နေ့ မွန်းလွဲ ၂ နာရီ ကျော်အချိန် သင်္ဃန်းညီနောင် ခမရ ၃၅၅ တပ်ရင်းထဲသို့ တပ်ချိန်းရန် လာသည့် စစ်ရဟတ်ယာဉ် ၂ စီးကို KNLA တပ်များနှင့် တော်လှန်ရေးတပ်များက ၀ိုင်းဝန်း ပစ်ခတ်ခတ်ခဲ့ရာ တပ်မ ၄၄ တပ်မမှူး ဗိုလ်မှူးချုပ် အေးမင်းနောင် အပါအဝင် စစ်အရာရှိ ၅ ဦးသေဆုံးခဲ့သည်။
၁၉- ဗိုလ်မှူးချုပ် လင်းအောင်မိုး ( စကခ ၇၊ စကခမှူး- ဖယ်ခုံ)
၂၀၂၃ ခုနှစ် နိုဝင်ဘာလ ၁၈ ရက်နေ့ ရှမ်းပြည်မြောက်ပိုင်း နမ့်ခမ်းမြို့နယ် မန်တပ်စခန်းနှင့် နမ့်ဖတ်ကာ စစ်ကောင်စီတပ်စခန်းကို တအာင်းတပ်မတော် TNLA အဖွဲ့က တိုက်ခိုက်ရာတွင် စကခ-၇ စကခမှူး ဗိုလ်မှူးချုပ် လင်းအောင်မိုး တိုက်ပွဲအတွင်း သေဆုံးခဲ့ကြောင်း သိရှိရသည်။
၂၀- ဗိုလ်မှူးချုပ် အောင်ကျော်လွင် (တပ်မ ၉၉ တပ်မမှူး- မိတ္တီလာ)
၂၀၂၃ ခုနှစ်၊ နိုဝင်ဘာလ ၆ ရက်နေ့ ရှမ်းပြည်နယ်မြောက်ပိုင်း၊ မုံးကိုး အခြေပြု တပ်မ ၉၉ တပ်မမှူး ဗိုလ်မှူးချုပ်/ဗိုလ်မှူးကြီး အောင်ကျော်လွင်သည် MNDAA ၏ ဒရုန်းဗုံးထိမှန်၍ သေဆုံးသွားခဲ့သည်။ စစ်တက္ကသိုလ်အပတ်စဉ် ၄၁ ကျောင်းဆင်း ဗိုလ်မှူးချုပ်/ဗိုလ်မှူး‌ကြီးအောင်ကျော်လွင်သည် မုံးကိုး အခြေပြု ဗျူဟာစခန်းတွင် ဒရုန်းဗုံးထိမှန်သေဆုံးဖြစ်သည်ဟု တပ်အသိုင်းအ၀ိုင်းက အတည်ပြုသည်။
၂၁- ဗိုလ်မှူးချုပ်အောင်လွင် (အလယ်ပိုင်းတိုင်းစစ်ဌာနချုပ် ဒုတိယတိုင်းမှူး )
ယခုနှစ် ဩဂုတ်လအတွင်း မိုးကုတ်မြို့သိမ်းတိုက်ပွဲတွင် အလယ်ပိုင်းတိုင်းစစ်ဌာနချုပ်(လပခ)ဒုတိယတိုင်းမှူးဗိုလ်မှူးချုပ်အောင်လွင်သည် စခန်းစွန့်ခွာထွက်ပြေး၍ စစ်ကောင်စီက ဖမ်းဆီးစစ်ဆေးကာ ထောင်ဒဏ်ချမှတ်အရေးယူခဲ့သည်။