ချင်းပူးပေါင်းတပ်သိမ်းပိုက်ထားသည့် အော်တိုတောင်စခန်း နယ်မြေရှင်းလင်းရာ လက်နက်ခဲယမ်းများရ

ချင်းပူးပေါင်းတပ်သိမ်းပိုက်ထားသည့် အော်တိုတောင်စခန်း နယ်မြေရှင်းလင်းရာ လက်နက်ခဲယမ်းများရ
ဟန်နွေ/People’s Spring

ချင်းပြည်နယ် ဟားခါး – ထန်တလန်မြို့နယ်ကြားရှိ စစ်ကောင်စီတပ်စွဲထားသည့် အော်တိုတောင်တပ်စခန်းကို ချင်းအမျိုးသားတပ်မတော် (CNA)နှင့် ချင်းဒေသကာကွယ်ရေးတပ်(CDF) ပူးပေါင်းထားသည့် ချင်းပြည်ကောင်စီတပ်များက သိမ်းပိုက်ထားပြီး နယ်မြေရှင်းလင်းရေး လုပ်ဆောင်ရာ လက်နက်ခဲယမ်းများ ရရှိခဲ့သည်ဟု ချင်းသတင်းရင်မြစ်က ပြောသည်။
အော်တိုတောင်တပ်စခန်းကို ချင်းပြည်ကောင်စီ တပ်များက ဒီဇင်ဘာ ၈ရက်တွင် သိမ်းနိုင်ခဲ့ခြင်းဖြစ်ပြီး ဒီဇင်ဘာ ၁၆ရက်တွင် နယ်မြေရှင်းလင်းရေး ပြီးစီးခဲ့သည်ဟု ဆိုသည်။
” နယ်မြေရှင်းလင်းရေးတွေ လုပ်ထားပြီးပြီ။ အဲဒီဟာ လက်နက်ခဲယမ်းတချို့တွေရတာပေါ့။ အဲဒီ စကစ အလောင်းကတော့ သုံးလေးယောက်လောက်ပဲရှိတယ်။ လေးဆယ်ကျော်လောက် က ထွက်ပြေးသွားတယ်လို့ သိရပါတယ်”ဟု ချင်းသတင်းရင်းမြစ်က ပြောသည်။
အော်တိုတောင်စခန်းသည် ဟားခါး-ထန်တလန်မြို့ကြား တန်တလန်မြို့နှင့် ပိုနီးသော်လည်း စစ်ကောင်စီတပ်သားများသည် ဟားခါးဘက်သို့ ထွက်ပြေးသွားကြောင်း ဒေသခံ တောင်ယာခုတ်သူအချို့ကပြောသည်ဟု သတင်းရင်းမြစ်က ပြောသည်။
နယ်မြေရှင်းလင်းစဉ် သိမ်းရထားသည့် လက်နက်ခဲယမ်းများ ဓာတ်ပုံမှတ်တမ်းကို သတင်းရင်းမြစ်က ပြသရာ လက်နက်ကြီးနှင့် လက်နက်ကြီးကျည်အချို့ ၊ စက်သေနတ်နှင့် လက်နက်ငယ်အချို့၊ စက်သေနတ်ကျည်များ၊ RPG ကျည်အချို့နှင့် စစ်အသုံးအဆောက်ပစ္စည်းများ သိမ်းရထားသည်ကို တွေ့ရသည်။
ချင်းပြည်ကောင်စီတပ်များသည် နိုဝင်ဘာ ၂၂ရက်ကစ၍ စစ်ကောင်စီတပ်စွဲထားသည့် ဟားခါး-ထန်တလန်ကြားရှိ တပ်စခန်းများကို ထိုးစစ်ဆင်ခဲ့ရာ ဒီဇင်ဘာ ၈ရက်တွင် တပ်စခန်း ၈ခု( ဟားခါး-ထန်တလန်ကြား စစ်ကောင်စီတပ်စခန်းအားလုံး)ကို သိမ်းရခဲ့သည်ဟု ဆိုသည်။
အဆိုပါတပ်စခန်းများကို ချင်းပြည်ကောင်စီတပ်များက ယခုနှစ် ဇူလိုင်ထိုးစစ်တွင် သိမ်းနိုင်ခဲ့ရာ စစ်ကောင်စီက လေကြောင်း ပစ်ကူနှင့် မြေပြင်မှ အင်အားအများအပြားဖြင့် ပြန်လည်ထိုးစစ်ဆင် ရယူထား၍ ပြန်လည်ထိုးစစ်ဆင်သိမ်းပိုက်ခဲ့ခြင်းဖြစ်သည်။
သိမ်းပိုက်ထားသည့် တပ်စခန်း ၈ခုအနက် ဟားခါးမြို့အနီး စခန်းတစ်ခုကို စစ်ကောင်စီက ပြန်လည်ထိုးစစ်ဆင်ပြီး ဝင်ရောက် နေရယူထားသည်ဟုလည်း သတင်းရင်းမြစ်ထံမှ သိရသည်။
(အော်တိုတောင်စခန်းမှ သိမ်းရသော လပ်နက်ခဲယမ်းများ။ ဓာတ်ပုံ – ဓာတ်ပုံ – VOC)