လွယ်ဂျယ်နယ်စပ်ဂိတ် တရုတ်ဘက်ကဖွင့်သော်လည်း KIA ပိတ်ထား
ဟန်နွေ/People’s Spring
ကချင်လွတ်လပ်ရေးတပ်မတော်(KIA)သိမ်းပိုက်ထားသည့် လွယ်ဂျယ်မြို့ရှိ နယ်စပ်ဂိတ်ကို တရုတ်အစိုးရဘက်က ဒီဇင်ဘာ ၁၁ရက်တွင် ပြန်လည်ဖွင့်လှစ်ခဲ့ကြောင်း ဒေသသတင်းရင်းမြစ်က ပြောသည်။
လွယ်ဂျယ်မြို့အပါအဝင် KIA ထိန်းချုပ်နယ်မြေရှိ နယ်စပ်ဂိတ်များကို တရုတ်ဘက်က ပြီးခဲ့သည့် လပိုင်းများအတွင်း တဖက်သတ်ပိတ်ပင်ခဲ့ပြီးနောက် KIA ဘက်ကလည်း အတားအဆီးများ ပြန်လည်ချထားခဲ့ခြင်းဖြစ်သည်။
တရုတ်ဘက်က ဂိတ်ပြန်ဖွင့်သော်လည်း KIAဘက်က ဖွင့်ပေးခြင်းမရှိသေးဟု ကချင်စစ်ရေးသတင်းရင်းမြစ်က ယနေ့(ဒီဇင်ဘာ ၁၂ရက်) ပြောသည်။
ကချင်စစ်ရေးနိုင်ငံရေးလေ့လာသူ တစ်ဦးကလည်း “လွယ်ဂျယ်ဂိတ်ကျတော့ တရုတ်ဘက်က မနေ့ကနေ စပြီးဖွင့်ထားတာတော့ရှိတယ်။ ဒါပေမဲ့ ဒီဘက်က KIA ဘက်က ဖွင့်လှစ်ထားခြင်းမရှိသေးဘူးလို့ ဒေသခံတစ်ဦးက ပြောဆိုထားတာရှိပါတယ်”ဟု ပြောသည်။
KIOဥက္ကဋ္ဌ ဗိုလ်ချုပ်ကြီး အင်ဘန်လအား တရုတ်အစိုးရက ဖိတ်ခေါ်ခဲ့ရာ ဗိုလ်ချုပ်ကြီး အင်ဘန်လသည် ဒီဇင်ဘာ ၈ရက်တွင် တရုတ်နိုင်ငံသို့ သွားရောက်ခဲ့သည်။ ယခု တရုတ်ဘက်က နယ်စပ်ဂိတ် ပြန်ဖွင့်ခြင်းသည် KIOဥက္ကဋ္ဌ ခရီးစဉ်နှင့် သက်ဆိုင်မှုရှိ၊မရှိ မသိရဘဲ ဗိုလ်ချုပ်ကြီး အင်ဘန်လ ခရီးစဉ်အတွင်း တရုတ်နှင့် ဆွေးနွေးမှု အခြေအနေကို စုံစမ်းနေဆဲဖြစ်သည်။
KIAသည် တရုတ်-မြန်မာ တရားဝင်ကုန်သွယ်ရေးဂိတ်များဖြစ်သော လွယ်ဂျယ်နှင့် ကန်ပိုက်တီ အပါအဝင် နယ်စပ်မြို့များကို ယခုနှစ်အတွင်း သိမ်းပိုက်နိုင်ခဲ့သည်။ အထူးသဖြင့် စစ်ကောင်စီ လက်အောက်ခံ ဦးဇခုန်တိန့်ယိန်း ဦးဆောင်သည့် ကချင်အထူးဒေသ(၁) တစ်ခုလုံးကို ယခုနှစ်ကုန်ပိုင်းတွင်သိမ်းပိုက်ပြီး ကချင်အထူးဒေသ(၁) သတ်မှတ်ချက်ကို ပယ်ဖျက်ခဲ့သည်။ ထိုသို့ သိမ်းပိုက်ရာတွင် ပန်ဝါ၊ ဖီမော် နယ်စပ်မြို့များလည်း ပါဝင်ပြီး အဆိုပါ နယ်စပ်ဂိတ်များကိုလည်း တရုတ်ဘက်က ပိတ်ထားသည်။
ကချင်အထူးဒေသ(၁)ကို ပယ်ဖျက်လိုက်ပြီးနောက် ယခင် အထူးဒေသ(၁) အောက်တွင် ရှိခဲ့သော ဌာနေပြည်သူများ၊ ရင်းနှီးမြှုပ်နှံသူများအားလုံး စိုးရိမ်စိတ်မထားရှိဘဲ KIOနှင့် ပူးပေါင်းကာ ဘက်စုံဖွံ့ဖြိုးတိုးတက်ရေးကို အတူတကွ တည်ဆောက်ရန် နိုဝင်ဘာ ၂၈ရက်တွင် KIO ဗဟိုကော်မတီက ကြေညာချက် ထုတ်ပြန် ဖိတ်ခေါ်ထားသည်။
(တရုတ် − မြန်မာနယ်စပ် လွယ်ဂျယ်ဂိတ်ရှေ့ တွေ့ရသော KIA ရဲဘော်တစ်ဦး။ ဓာတ်ပုံ − CJ)
