ရန်ကုန်တွင် အသက် ၁၈ နှစ်မှ အသက် ၃၅ နှစ်အတွင်း အမျိုးသားလူငယ်မှန်သမျှ မဖြစ်မနေ စစ်မှုထမ်းရမည်ဟု သက်ဆိုင်ရာက ခေါ်ယူ အသိပေးပြီး မဲနှိုက်ခြင်း၊ ငွေကြေးပေး၍ လူစားထိုးခြင်းများ လုပ်ခွင့်မရှိတော့ဟုဆို
ရန်ကုန်၊ ဒီဇင်ဘာ ၁၀
ရန်ကုန်တွင် အသက် ၁၈ နှစ်မှ အသက် ၃၅ နှစ်အတွင်း အမျိုးသားလူငယ်မှန်သမျှ အလှည့်ကျလာလျှင် မဖြစ်မနေ စစ်မှုထမ်းရမည်ဖြစ်ပြီး ယခင်ကကဲ့သို့ အလှည့်ကျ မဲနှိုက်ခြင်း၊ ငွေကြေးပေး၍ လူစားထိုးခြင်းများ လုပ်ခွင့်မရှိတော့ဟု လူငယ်များနှင့်မိသားစုများကို ရပ်ကွက်နှင့်ကျေးရွာအုပ်ချုပ်ရေးမှူးများက ခေါ်ယူ အသိပေးပြောဆိုလာကြောင်း သိရှိရသည်။
ရန်ကုန်တိုင်း၊ တောင်ဥက္ကလာပမြို့နယ်၊ လှိုင်သာယာမြို့နယ်၊ သာကေတမြို့ နယ်၊ ဒေါပုံမြို့နယ် အပါအဝင် မြို့နယ်များအားလုံးတွင် အသက် ၁၈ နှစ်မှ အသက် ၃၅ နှစ်အတွင်း အမျိုးသားလူငယ်များအားလုံး မဖြစ်မနေ မိမိအလှည့်ရောက်သည်နှင့် စစ်မှုထမ်းရမည်ဖြစ်ကြောင်း၊ ကျေးရွာနှင့်ရပ်ကွက်အုပ်ချုပ်ရေးမှူးများက မဲနှိုက်၍ မဲဖောက်ခြင်း၊ လူစားထိုးပေးခြင်းများကို လုပ်ဆောင်တော့မည်မဟုတ်ကြောင်း၊ စစ်မှုထမ်းရန် အလှည့်ကျလာပါက စစ်မှုမထမ်းဘဲ ရှောင်ပြေးလျှင် ပြည်သူ့စစ်မှုထမ်းဥပဒေအရ အမှုဖွင့် အရေးယူ ထောင်ချတော့မည်ဖြစ်သည်ဟု ခြိမ်းခြောက် ပြောဆိုလာကြောင်း သိရှိရသည်။
“အရင်လို ငွေနဲ့ အစားထိုးလို့မရတော့ဘူး။ လူရှာရတာလည်း ခက်လာပြီ။ အဲဒါကြောင့် ကိုယ့်အလှည့်ရောက်ရင် မဖြစ်မနေ စစ်မှုထမ်းရမယ် လို့ ခေါ်ပြောတ ယ်” ဟု သာကေတမြို့နယ်မှ စစ်မှုထမ်းရန် အမည်စာရင်းအသွင်းခံထားရသူ လူငယ်တစ်ဦးက ပြောဆိုသည်။
ရန်ကုန်တိုင်း၊လှိုင်သာယာမြို့နယ်၊ဒိုင်စုရပ်ကွက် အုပ်ချုပ်ရေးမှူး ဝင်းထွဋ်ဝင်းက အသက် ၁၈ နှစ်မှ အသက် ၃၅ နှစ်အတွက် လူငယ်အမျိုးသား ရှိသော အိမ် ထောင်စုတိုင်း တစ်လလျှင် ငွေကျပ် ၂၀၀၀၀ နှုန်းပေးရမည့်အပြင် စစ်မှုထမ်းရန်လည်း အလှည့်ကျပါကလည်း မဖြစ်မနေ စစ်မှုထမ်းရမည်ဟု ခေါ်ယူပြော ဆို ကြောင်း သိရှိရသည်။
” အသက် ၁၈ နှစ်ကနေ အသက် ၃၅ နှစ်အတွင်း ယောင်္ကျားသားရှိတဲ့အိမ်တိုင်း တစ်ဦးအတွက် ငွေ ၂ သောင်းနှုန်း ပေးရမယ်။ တချို့အိမ်တွေဆိုရင် လူငယ် ၃ ဦးရှိတော့ ငွေ ၆ သောင်းပေးရတယ်။ လက်လုပ်လက်စားဘဝနဲ့ အဆင်မ ပြေလို့ ပေးစရာမရှိတာ့ အတိုးနဲ့ချေးပေးနေရတယ်။ အတိုးပေါ်အတိုးဆင့်နဲ့ ဒုက္ခတွေ ရောက်နေကြတယ် ” ဟု ဒေသပြည်သူတစ်ဦးက ပြောဆိုသည်။
အလားအင်းစိန်မြို့နယ်၊ ပိန္နဲကုန်းရပ်ကွက် အုပ်ချုပ်ရေးမှူးကျော်နိုင်က ရပ်ကွက်အတွင်းမှ စစ်မှုထမ်းရန် အကျုံးဝင်သော လူငယ်တိုင်းကို စစ်တပ်ထံသို့ အမည်စာရင်းပေးပို့ထားပြီးဖြစ်၍ စစ်တပ်က ခေါ်လာသည်နှင့် သွားရောက် စစ်မှုထမ်းရမည်ဖြစ်ကြောင်း၊ စစ်မှုထမ်းမည့် မိသားစုနှင့် လူငယ်ကို ထောက်ပံ့ရန်ဟုဆိုကာ ရပ်ကွက်အတွင်းမှ အိမ်ထောင်စုတိုင်းကို ငွေကြေးကောက်ခံနေကြောင်း သိရှိရသည်။
ထို့ပြင် ဒေါပုံမြို့နယ် ဝါဆိုရပ်ကွက်တွင်လည်း အုပ်ချုပ်ရေးမှူး ညီညီထွေးက စစ်မှုထမ်းဆင့်ခေါ်စာဖြင့် ရပ်ကွက်ရုံးသို့ လူငယ်များကို ဆင့်ခေါ်ပြီး အိမ်ပြန်မလွှတ်တော့ဘဲ စစ်တပ်ထဲသို့ တပ်သားသစ်များအဖြစ် ပို့ဆောင်နေကြောင်း ၊ နာမည်စာရင်း ပါနေသူများအနေဖြင့်လည်း အလှည့်ကျ၍ စစ်မှုမထမ်းပါက မိသား စုဝင်များကို ဖမ်းဆီးထောင်ချမည်ဟု ခြိမ်းခြောက်နေကြောင်း သိရှိရသည်။