လားရှိုးမြို့ပေါ်ရှိ ကားဝပ်ရှော့သို့ စစ်ကောင်စီက လေယာဉ်ဖြင့် ဗုံးကျဲချမှု ပြည်သူများ ထိခိုက်သေဆုံးမှုရှိ
ရန်ကုန်၊ စက်တင်ဘာ ၂၈
ရှမ်းပြည်နယ်မြောက်ပိုင်း၊ လားရှိုးမြို့ပေါ်ရှိ ကားဝပ်ရှော့သို့ စစ်ကောင်စီက ယနေ့ည အချိန် လေယာဉ်ဖြင့် ဗုံးများကျဲချခဲ့ရာ ပြည်သူများထိခိုက်သေဆုံးမှုရှိကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယနေ့ စက်တင်ဘာလ ၂၈ ရက်နေ့ ည ၈ နာရီ ၃၄ မိနစ်အချိန် စစ်ကောင်စီက တိုက်လေယာဉ်များက လားရှိုးမြို့ပေါ် ရပ်ကွက် ၈ အနောက် ကားဝပ်ရှော့ပေါ်သို့ ဗုံးများ ကျဲချခဲ့ခြင်းဖြစ်ပြီး လူနေအိမ်များ ထိခိုက်ပျက်စီးကာ ထိခိုက်သေဆုံးမှုများရှိကြောင်း သိရှိရသည်။
“ဗုံးကျတဲ့ ကားဝပ်ရှော့က ဖွင့်ထားတာ ၁၀ ရက်လောက်ပဲရှိသေးတယ်။ အဲဒီမှာ လူသေဆုံးမှုရှိတယ်။ အခုက လေယာဉ်တွေက ထပ်ဝဲနေလို့ ခင်ဗျ။ လေယာဉ်သံက မပျောက်သေးဘူး” ဟု ဒေသပြည်သူတစ်ဦးက ပြောဆိုသည်။