စစ်ကောင်စီတပ်နှင့် KIA ဦးဆောင်သော တော်လှန်ရေးတပ်များအကြား စစ်ရေးတင်းမာပြီး တိုက်ပွဲများဖြစ်ပွားနေသဖြင့် ဖားကန့်တစ်မြို့လုံး စစ်ဘေးရှောင်ကြကာ မြို့တစ်ခုလုံး တိတ်ဆိတ်ခြောက်ကပ်သွား
ရန်ကုန်၊ စက်တင်ဘာ ၂၁
ကချင်ပြည်နယ်၊ ဖားကန့်မြို့နယ်တွင် စစ်ကောင်စီတပ်နှင့် KIA ဦးဆောင်သော တော်လှန်ရေးတပ်များအကြား စစ်ရေးတင်းမာပြီး တိုက်ပွဲများဖြစ်ပွားနေသဖြင့် ဖားကန့်တစ်မြို့လုံး စစ်ဘေးရှောင်ကြပြီး မြို့တစ်ခုလုံး တိတ်ဆိတ်ခြောက်ကပ်သွားကြောင်း ဒေသပြည်သူများက ရန်ကုန်ခေတ်သစ်သတင်းဌာနထံသို့ ပြောဆိုသည်။
စက်တင်ဘာ လဆန်းပိုင်းမှစတင်ပြီး ဖားကန့်မြို့နယ်တွင် စစ်ကောင်စီတပ်များနှင့် KIA ပူးပေါင်းတပ်များအကြား တိုက်ပွဲများ ဆက်တိုက်ဖြစ်ပွားလာခဲ့ရာမှ ယခုအခါ မြို့ပေါ်တွင်ပါ စစ်ရေးတင်းမာလာကြောင်း၊ စစ်ကောင်စီက လက်နက်ကြီးများဖြင့် ပစ်ခတ်တိုက်ခိုက်မှုများ လုပ်ဆောင်လာသဖြင့် ပြည်သူများထိခိုက်သေဆုံးမှုများ ရှိလာကြောင်း၊ ထို့ကြောင့် ဖားကန့်မြို့မှ ပြည်သူများမှာ စတင်တိမ်းရှောင်မှုများ လုပ်လာကြပြီး စျေးဆိုင်များမှာလည်း ပိတ်ထားကြောင်း၊ ယနေ့တွင်မူ ဖားကန့်တစ်မြို့လုံး စစ်ဘေးရှောင်သွားကြပြီး တစ်မြို့ လုံး တိတ်ဆိတ် ခြောက်ကပ်လျက်ရှိကြောင်း သိရှိရသည်။
“မနေ့က စပြီး ပြည်သူတွေ ပြေးကြတာ ဒီနေ့တော့ မြို့တစ်မြို့လုံး တိတ်ဆိတ်သွားပြီ။ လူတောင်မရှိတော့ဘူး။ ခြောက်ကပ်သွားတယ်။ ဆိုင်းတောင်ဘက်မှာတော့ တိုက်ပွဲဖြစ်နေတုန်းပဲ။ ဖားကန်မြို့ပေါ်မှာ လူကို မရှိတော့ဘူး” ဟု ဒေသပြည်သူတစ်ဦးက ပြောဆိုသည်။
အကြမ်းဖက်စစ်ကောင်စီတပ်၏ လေယာဉ်များက ဖားကန့်မြို့ပေါ်တွင် ပျံဝဲနေပြီး အခြေအနေကို အကဲခတ်နေကြောင်း၊ မကြာမီ ဖားကန့်တွင် တိုက်ပွဲအကြီးအကျယ်ဖြစ်ပွားလာနိုင်ကြောင်း မြို့ပေါ်တွင် ကျန်ရစ်ခဲ့သည့် ဒေသပြည်သူတချို့က ပြောဆိုသည်။
“ဖားကန့်ရဲစခန်းဘက်မှာလည်း ဘာသံမှ မကြားရဘူး။ အရမ်းကို တိတ်ဆိတ်နေတာ” ဟု ဒေသပြည်သူက ရှင်းလင်းပြောဆိုသည်။
ဖားကန့် စစ်ကောင်စီဗျူဟာကုန်းကို လက်နက်ကြီးဖြင့် တိုက်ခိုက်ခဲ့ဟု KIA ပြော
▪️စစ်ကောင်စီ လေကြောင်းတိုက်ခိုက်၊ ဆိုင်းတောင် လက်ကီးမန်းဟိုတယ်၌ စစ်ကောင်စီစစ်ကြောင်းများဆက်ရှိနေ၍ တိုက်ပွဲဆက်ဖြစ်နိုင်ဟုဆို
ဟန်နွေ/People’s Spring
ကချင်ပြည်နယ် ဖားကန့် မြို့အခြေစိုက် စစ်ကောင်စီဗျူဟာကုန်းစခန်းကို ကချင်လွတ်လပ်ရေးတပ်မတော်(KIA)က လက်နက်ကြီးဖြင့် တိုက်ခိုက်ခဲ့ကြောင်း KIA သတင်းပြန်ကြားရေးဌာနတာဝန်ခံ ဗိုလ်မှူးကြီးနော်ဘူက ပြောသည်။
ဖားကန့် ဒေသစစ်ရေးအခြေအနေနှင့်ပတ်သက်ပြီး ဗိုလ်မှူးကြီးနော်ဘူက ယနေ့ စက်တင်ဘာ ၂၀ရက် ညပိုင်းတွင် ရှင်းပြခြင်းဖြစ်သည်။
” ဒီနေ့ ဖားကန့်ဗျူဟာကုန်းဘက်ကို လက်နက်ကြီးနဲ့ KIA တွေဘက်က ပစ်တယ်ဆိုတဲ့ သတင်းကြားရပါတယ်။ နောက် စကစကလည်း လေကြောင်းနဲ့ ပြန်တိုက်တယ်ဆိုတဲ့ သတင်းလည်းကြားပါတယ်”ဟု ဗိုလ်မှူးကြီးနော်ဘူက ပြောသည်။
ဖားကန့်ဒေသ စစ်ရေးအခြေအနေများနှင့်ပတ်သက်၍ ပြည့်ပြည့်စုံစုံသတင်းမရသေးဟုလည်း ၎င်းက ဆိုသည်။
“ဆိုင်းတောင် လက်ကီးမန်းဟိုတယ်မှာရှိနေတဲ့ နေနေတဲ့ စကစစစ်ကြောင်းတွေလည်း ဒီအတိုင်းပဲ ရှိနေတယ်တဲ့။ မဆုတ်ဘူးမထွက်ဘူး။ ဒါကြောင့် အဲဒီဘက်ကတော့ တိုက်ပွဲကတော့ ဆက်ဖြစ်ဖို့ အလားအလာတော့ ပိုများတယ်လို့ အကြောင်းကြားလာပါတယ်”ဟု ဗိုလ်မှူးကြီးနော်ဘူကပြောသည်။
စစ်ရေးသတင်းရင်းမြစ်တစ်ဦးကလည်း ” လက်နက်ကြီးတွေနဲ့ထုနေတာ။ အခု ဖားကန့်မြို့ရှိပြည်သူများထွက်ပြေးနေတယ်”ဟု ပြောသည်။
ဖားကန့်ဒေသတွင် တိုက်ပွဲဖြစ်နေ၍ ယနေ့တွင် မိုးညှင်းမြို့တွင်လည်း စစ်ကောင်စီတပ် အင်အားအများအပြားချထားသည်ဟု မိုးညှင်းမြို့ခံတစ်ဦးက ပြောသည်။
ဖားကန့်မြို့နယ် ဆိုင်းတောင်ရှိ စစ်ကောင်စီတပ်များကို KIAနှင့် PDF ပူးပေါင်းတပ်များက စက်တင်ဘာ ၇ရက်က စတင်တိုက်ခိုက်ခဲ့ရာ စက်တင်ဘာ ၁၂ရက်တွင် ဆိုင်းတောင်ရဲစခန်းကို သိမ်းပိုက်နိုင်ခဲ့ပြီး လက်ကီးမန်းဟိုတယ်၌ ကျန်နေသည့် စစ်ကောင်စီတပ်များနှင့် တိုက်ပွဲဖြစ်နေခြင်းဖြစ်သည်။
ဆိုင်းတောင်တိုက်ပွဲတွင် စစ်ကောင်စီဘက်က လေကြောင်း ၊လက်နက်ကြီးပစ်ကူပေးတိုက်ခိုက်လျက်ရှိပြီး ဒေသခံ ပြည်သူများ၏ နေအိမ်များကို မီးရှို့ဖျက်ဆီးလျက်ရှိသည်။
(ဖားကန့်ဗျူဟာကုန်းစခန်းနှင့် နမ့်ဖတ်ကာအခြေစိုက် စစ်ကောင်စီတပ်စခန်းကို သိမ်းပိုက်ခဲ့သည့် KIA တပ်ဖွဲ့ဝင်အချို့အား ၂၀၂၄ ဇန်နဝါရီလ ၂၄ ရက်က တွေ့ရစဉ်။ ဓာတ်ပုံ – CJ)