ဇွန်လအတွင်း မင်းကွန်းဒေသ တိုက်ပွဲများတွင် စစ်ကောင်စီဘက်မှ အယောက် ၅၀ ထက်မနည်းသေဆုံး
ဇူလိုင် ၉၊ ၂၀၂၅
စစ်ကိုင်းတိုင်း၊ မင်းကွန်းဒေသမှာ ဇွန်လအတွင်းဖြစ်ပွားခဲ့တဲ့ တိုက်ပွဲတွေမှာ စစ်ကောင်စီဘက်က အယောက် ၅၀ ထက်မနည်း သေဆုံးခဲ့တယ်လို့ ယူနီကွန်းပျောက်ကြားတပ်ဖွဲ့က သတင်းထုတ်ပြန်လာပါတယ်။
ပြီးခဲ့တဲ့ ဇွန်လအတွင်းမှာ နဂါးပတ်တောင်စခန်းကုန်း သိမ်းပိုက်ခံရမှု၊ စစ်ကြောင်းပျက်သည်အထိ ပြန်လည်ထိုးစစ်ဆင်နိုင်ခဲ့မှု၊ အကြိမ်ကြိမ် မှိုင်းဆွဲတိုက်ခိုက်နိုင်ခဲ့မှု၊ လက်နက်ကြီး၊ ဒရုန်းတွေနဲ့လည်း အကြိမ်ကြိမ်တိုက်ခိုက်မှုတွေကြောင့် စစ်ကောင်စီတပ်သား အမြောက်အများ သေဆုံးပြီး အထိနာခဲ့တာ ဖြစ်တယ်လို့ သိရပါတယ်။
“ထိတွေ့မှုက ခဏခဏ ဖြစ်တာပါ။ လက်ရှိတော့ စစ်ကောင်စီတပ်တွေက ရဲစခန်းရယ်… မြသိန်းတန်ရယ်… ကင်းရွာထဲရယ်… သုံးနေရာခွဲထိုင်ထားပါတယ်။ အင်အား အတိအကျကတော့ မသိရသေးပါဘူး။ ရေကြောင်းကနေ အင်အားဖြည့်တင်းထားတာ ဘာညာတော့ ရှိပါတယ်” လို့ ယူနီကွန်းပျောက်ကြားတပ်ဖွဲ့ တာဝန်ရှိသူက မောင်းကို ပြောပါတယ်။
အဆိုပါ တိုက်ပွဲတွေမှာ စစ်ကောင်စီဘက်က အယောက် ၅၀ ထက်မနည်း သေဆုံးခဲ့သလို ယူနီကွန်း ပျောက်ကြားတပ်ဖွဲ့ဝင် ရဲဘော်နှစ်ယောက်နဲ့ Acid Ldf တပ်ဖွဲ့ဝင် ရဲဘော်တစ်ယောက်လည်း မြင့်မြတ်စွာ ကျဆုံးခဲ့တယ်လို့ သိရပါတယ်။
ဒါ့အပြင် စစ်ကောင်စီတပ်တွေထံကနေ လက်နက်ငယ်နဲ့ ခဲယမ်း အမြောက်အမြားကို တော်လှန်ရေးတပ်တွေ သိမ်းဆည်းနိုင်ခဲ့သလို စစ်သုံ့ပန်း ၅ ယောက်ကိုလည်း ဖမ်းဆီးနိုင်ခဲ့တယ်လို့ သိရပါတယ်။
အထိနာသွားတဲ့ စစ်ကောင်စီတပ်တွေကတော့ မင်းကွန်းတောင်ရွာ တစ်ရွာလုံးနီးပါနဲ့ ကင်းရွာ၊ ချောင်းမကြီးရွာတို့ကို မီးရှို့ဖျက်ဆီးခဲ့တယ်လို့ ထုတ်ပြန်ချက်မှာ ဖော်ပြထားပါတယ်။
ဓာတ်ပုံ- ဇွန်လအတွင်း တိုက်ပွဲ မှတ်တမ်းဓာတ်ပုံများ (ယူနီကွန်းပျောက်ကြားတပ်ဖွဲ့)