မှော်ဘီတွင် လေတပ် မိသားစုဝင် တပ်ကုန်းကြီးကျေးရွာ အုပ်ချုပ်ရေးမှူး အောင်သူနှင့် ဆွေမျိုးများ ဖွင့်လှစ်ထားသော ဆိုင်ခန်းများကို လက်ပစ်ဗုံးများဖြင့် ပစ်ခတ်တိုက်ခိုက်

မှော်ဘီတွင် လေတပ် မိသားစုဝင် တပ်ကုန်းကြီးကျေးရွာ အုပ်ချုပ်ရေးမှူး အောင်သူနှင့် ဆွေမျိုးများ ဖွင့်လှစ်ထားသော ဆိုင်ခန်းများကို လက်ပစ်ဗုံးများဖြင့် ပစ်ခတ်တိုက်ခိုက်
ရန်ကုန်၊ မေ ၃၀

ရန်ကုန်မြို့၊ မှော်ဘီမြို့နယ်တွင် လေတပ် မိသားစုဝင် တပ်ကုန်းကြီးကျေးရွာ အုပ်ချုပ်ရေးမှူး အောင်သူ၏ ဆွေမျိုးများ ဖွင့်လှစ်ထားသော ဆိုင်ခန်းများကို လက်ပစ်ဗုံး ၃ လုံး ပစ်သွင်း တိုက်ခိုက်ခဲ့ကြောင်း Yangon Army (YA) မှ တာဝန်ရှိသူ တစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ မေလ ၂၉ ရက်နေ့ ည ၇ နာရီ ၅၅ မိနစ်ခန့်အချိန် မှော်ဘီမြို့နယ်တွင် အကြမ်းဖက် စစ်တပ်၏ လေတပ်မှ မိသားစုဝင်ဖြစ်သူ တပ်ကုန်းကြီးကျေးရွာ အုပ်ချုပ်ရေးမှူး အောင်သူ၏ဆွေမျိုးများ ဖွင့်လှစ်ထားသော ဆိုင်ခန်းတွဲ ၃ ခန်းကို လက်ပစ်ဗုံး ၃ လုံးဖြင့် ဖောက်ခွဲ တိုက်ခိုက်ခဲ့ကြောင်း သိရသည်။
ယင်းတိုက်ခိုက်မှု အတွင်းထိခိုက်မှု အခြေအနေကို အတည်ပြုနိုင်ခြင်းမရှိသေးဘဲ တော်လှန်ရေး ရဲဘော်များ အထိအခိုက်မရှိ ပြန်လည် ဆုတ်ခွာနိုင်ခဲ့ကြောင်း သိရှိရသည်။
” တပ်ကုန်းကြီးကျေးရွာ အုပ်ချုပ်ရေးမှူး အောင်သူရဲ့ တစ်မျိုးလုံးက လေတပ်အငြိမ်းစားတွေပါ။ နောက်ပြီး ညီအငယ်ဆုံးကလည်း လက်ရှိ လေတပ်မှာ Y-8 မောင်းပြီး ခွေးဇာတ်ခင်းနေသူပါ။ အောင်သူရဲ့ ဆွေမျိုးတွေ ဖွင့်လှစ်ထားတဲ့ ဆိုင်ခန်းတွဲ ၃ ခန်းကို လက်ပစ်ဗုံး ၃ လုံးနဲ့ ပစ်ခတ် တိုက်ခိုက်ခဲ့တာပါ” ဟု Yangon Army (YA) မှ တာဝန်ရှိသူ တစ်ဦးက ပြောဆိုသည်။
အဆိုပါ တိုက်ခိုက်မှုကို Yangon Army (YA)နှင့် အနောက်ပိုင်းခရိုင် ပကဖ တို့က ပူပေါင်းလုပ်ဆောင်ခဲ့ပြီး လေတပ်တွင် တာဝန်ထမ်းဆောင်နေသော အကြမ်းဖက် စစ်ကောင်စီတပ်သားများ၏ ဆွေမျိုးများကိုလည်း ဆက်လက် တိုက်ခိုက်သွားမည် ဖြစ်ကြောင်း Yangon Army (YA) မှ တာဝန်ရှိသူ တစ်ဦးက ဆက်လက်ပြောဆိုသည်။
ဓာတ်ပုံ- ၂၀၂၄ ခုနှစ်၊ ဧပြီလ၊ မင်္ဂလာဒုံတွင် ပေါက်ကွဲမှုဖြစ်အပြီး စစ်တပ်က ပိတ်ဆို့ စစ်ဆေးနေစဉ်။ (ပုံအဟောင်းဖြစ်ပါသည်။)

မှော်ဘီရှိ လေတပ်မိသားစုပိုင် ဆိုင်ခန်းများ တိုက်ခိုက်ခံရ
မေ ၂၉၊၂၀၂၅။သတိုး/People’s Spring
ရန်ကုန်မြို့၊မှော်ဘီမြို့နယ်ရှိ စစ်ကောင်စီ၏ လေတပ်မိသားစုဝင်ဖြစ်သည့် တပ်ကုန်းကြီးကျေးရွာအုပ်ချုပ်ရေးမှူးပိုင်ဆိုင်သည့် ဈေးဆိုင်ခန်းသုံးခန်းကို လက်ပစ်ဗုံးများဖြင့် တိုက်ခိုက်ခဲ့ကြောင်း Yangon Army(YA) အဖွဲ့တာဝန်ရှိသူက ပြောသည်။
“တစ်မျိုးလုံးလေတပ်က ဟာတွေ။ အသီးသုံးလုံးပစ်တာ နှစ်လုံးပဲကွဲတယ်”ဟု ၎င်းက ပြောသည်။
အဆိုပါအုပ်ချုပ်ရေးမှူးမိသားစုသည် လေတပ်ဝန်ထမ်းများဖြစ်ပြီး ၎င်း၏ညီဖြစ်သူသည် လက်ရှိတွင် စစ်ကောင်စီလေတပ်၌ တာဝန်ထမ်းဆောင်‌နေသူဖြစ်သည်ဟု ဆိုသည်။
ယင်းစစ်ဆင်ရေးကို မေလ ၂၉ ရက် ည ၈နာရီခန့်တွင် လုပ်ဆောင်ခဲ့ခြင်းဖြစ်ပြီး အနောက်ပိုင်းခရိုင်ပကဖ နှင့် Yangon Army အဖွဲ့တို့ ပူးပေါင်းလုပ်ဆောင်ခြင်းဖြစ်သည်။
” ဆိုင်ခန်းအတွဲလိုက် သုံးခန်းဖွင့်ထားတာ” ဟု အထက်ပါတာဝန်ရှိသူက ပြောသည်။
ယင်းစစ်ဆင်ရေးပြုလုပ်ရန် စျေးဆိုင်အတွင်း၌ လူများရှိသောကြောင့် စစ်ဆင်ရေးပြုလုပ်မည့် ရဲဘော်များ မိုးရေထဲ စောင့်ဆိုင်း၍ လုပ်ဆောင်ခဲ့ရခြင်းဖြစ်ပြီး အားလုံးဘေးကင်းရာသို့ ရောက်ရှိပြီဖြစ်ကြောင်း ၎င်းက ပြောသည်။
Yangon Army အဖွဲ့သည် မေလ ၁၉ ရက်ကလည်း The Blood Line နှင့်အတူ စမ်းချောင်းမြို့နယ် စမ်းတောင်ရပ်ကွက် အုပ်ချုပ်ရေးမှူးရုံးကို လက်ပစ်ဗုံးဖြင့် တိုက်ခိုက်ခဲ့သေးသည်။