မြေပြင်မှာရှိတဲ့ NUG ကြားကာလပညာရေးကျောင်းတွေ ယာယီရပ်နားထားဖို့ ဒေါက်တာဇော်ဝေစိုး ညွှန်ကြား
BVJ/ထက်အောင် _ မေ ၂၅ ၊ ၂၀၂၅
အမျိုးသားညီညွတ်ရေးအစိုးရ (NUG) ပညာရေးဝန်ကြီးဌာနနဲ့ ချိတ်ဆက်ပူးပေါင်း ဖွင့်လှစ်ထားတဲ့ မြေပြင်မှာရှိတဲ့ စာသင်ကျောင်းအားလုံး ခေတ္တယာယီရပ်နားထားဖို့ ပညာရေးဝန်ကြီး ဒေါက်တာဇော်ဝေစိုးက ဒီနေ့က မေလ ၂၅ ရက်မှာ ညွှန်ကြားချက် ထုတ်ပြန်လာပါတယ်။
စစ်ကောင်စီက စာသင်ကျောင်းတွေ၊ ဆေးရုံတွေနဲ့ လူစုလူဝေးရှိတဲ့နေရာတွေကို လေကြောင်းကနေ နည်းလမ်းမျိုးစုံနဲ့ ဗုံးကြဲတိုက်ခိုက်တာ၊ စက်သေနတ်တွေနဲ့ ပစ်ခတ်တိုက်ခိုက်တာ၊ တာဝေးပစ် လက်နက်ကြီးတွေနဲ့ ပစ်ခတ်တိုက်ခိုက်တာ စတဲ့ စစ်ရာဇဝတ်မှုတွေကို ကျူးလွန်နေတာကြောင့် မြေပြင်မှာရှိတဲ့ NUG ကြားကာလပညာရေးကျောင်းတွေကို ယာယီရပ်နားထားဖို့ ညွှန်ကြားချက်ထုတ်ပြန်လာတာလည်း ဖြစ်ပါတယ်။
အပြစ်မဲ့ ကလေးသူငယ်တွေနဲ့ ဆရာ၊ ဆရာမတွေရဲ့ အသက်အန္တရာယ် ဆုံးရှုံးမှုမရှိစေဖို့အတွက် ဘေးအန္တရာယ်ကင်းရှင်းရေး အစီအမံတွေ ဆောင်ရွက်နေချိန်မှာ မြေပြင်မှာရှိတဲ့ ကြားကာလ ပညာရေးကျောင်းအားလုံးကို ရပ်နားထားဖို့ NUG ပညာရေးဝန်ကြီးက ညွှန်ကြားချက် ထုတ်ပြန်ခဲ့တာလည်း ဖြစ်ပါတယ်။
အခုညွှန်ကြားချက်ကို သက်ဆိုင်ရာတာဝန်ရှိ အဖွဲ့အစည်းတွေက ပူးပေါင်းဆောင်ရွက်ကြဖို့နဲ့ သင်ကြားသင်ယူမှု စဉ်ဆက်မပြတ်စေဖို့အတွက်ကိုလည်း NUG ပညာရေးဝန်ကြီးဌာနက ထုတ်ပြန်ထားတဲ့ မူဝါဒ လမ်းညွှန်ချက်တွေအတိုင်း ဆောင်ရွက်ကြဖို့ကိုလည်း ပြောကြားထားပါတယ်။
တိုင်းရင်းသားအဖွဲ့အစည်းတွေနဲ့ NUG အစိုးရ ထိန်းချုပ်နယ်မြေတွေမှာရှိတဲ့ စာသင်ကျောင်း၊ ဆေးရုံတွေနဲ့ လူစုလူဝေးရှိတဲ့နေရာကို စစ်ကောင်စီက ပစ်မှတ်ထားဗုံးကြဲတိုက်ခိုက်မှုတွေကိုလည်း လုပ်ဆောင်နေတာ ဖြစ်ပါတယ်။
အခု မေလ ၁၂ ရက်ကလည်း ဒီပဲယင်းမြို့နယ် အိုးတိန်တွင်းရွာကို စာသင်ကျောင်းကိုပစ်မှတ်ထားကာ စစ်ကောင်စီက ဗုံးကြဲတိုက်ခိုက်ခဲ့တာကြောင့် ကျောင်းသား၊ ကျောင်းသူ ကလေးငယ် ၂၂ ဦးနဲ့ ဆရာမ ၂ ဦး သေဆုံးခဲ့သလို ၁၀၀ ကျော် ထိခိုက်ဒဏ်ရာရရှိခဲ့ပါသေးတယ်။
၂၀၂၂ စက်တင်ဘာ ၁၆ ရက်ကလည်း ဒီပဲယင်းမြို့နယ် လက်ယက်ကုန်းရွာက ကိုယ်ထူကိုယ်စာသင်ကျောင်းကို စစ်ကောင်စီက တိုက်ခိုက်ရေးရဟတ်ယာဉ် ၂ စင်းနဲ့ ပစ်ခတ်တိုက်ခိုက်ခဲ့တာကြောင့် ကျောင်းသား၊ ကျောင်းသူ ၆ ဦးအပါအတင် ၁၃ ဦး သေဆုံးခဲ့ပြီး ၂၇ ဦး ထိခိုက်ဒဏ်ရာရရှိခဲ့ပါသေးတယ်။
ပုံစာ – မေ ၁၂ ရက်နေ့က ဒီပဲယင်းမြို့နယ် အိုးတိန်တွင်း စာသင်ကျောင်းကို စစ်ကောင်စီ ဗုံးကြဲတိုက်ခိုက်ခဲ့တာကြောင့် ထိခိုက်ပျက်စီးခဲ့မှုကို တွေ့ရစဉ် (Photo: AFP)
.
.အမျိုးသားညီညွတ်ရေးအစိုးရ၊ ပညာရေးဝန်ကြီးဌာန၏ အသိအမှတ်ပြုမှု၊ ချိတ်ဆက်ပူးပေါင်းမှုတို့ဖြင့် မြေပြင်တွင် ဖွင့်လှစ်ပညာသင်ကြားနေသော ကြားကာလပညာရေးကျောင်းများအားလုံး ခေတ္တယာယီရပ်နားထားရန် ညွှန်ကြားချက်
ညွှန်ကြားချက်အမှတ်(၁/၂၀၂၅)
၂၀၂၅ ခုနှစ်၊ မေလ (၂၅)ရက်
၁။ နိုင်ငံတော်အာဏာကို စစ်တပ်မှ မတရားသိမ်းပိုက်ပြီးချိန်မှစ၍ အမျိုးသားညီညွတ်ရေးအစိုးရ၊ ပညာရေး ဝန်ကြီးဌာနသည် ကလေးလူငယ်များ ပညာသင်ကြားခွင့်မဆုံးရှုံးစေရေးအတွက် ကြားကာလပညာရေးကို နည်းလမ်းမျိုးစုံဖြင့် ဖော်ဆောင်သင်ကြားပေးလျက်ရှိပါသည်။
၂။ ယခုအချိန်တွင် မတရားအာဏာသိမ်းစစ်တပ်သည် စာသင်ကျောင်းများ၊ ဆေးရုံများ စသည့် လူစုလူဝေး ရှိရာနေရာများကို လေကြောင်းမှ နည်းလမ်းမျိုးစုံဖြင့် ဗုံးကြဲခြင်း၊ စက်သေနတ်များဖြင့် ရည်ရွယ်ချက်ရှိရှိ ပစ်ခတ်တိုက်ခိုက်ခြင်း၊ တာဝေးပစ်လက်နက်ကြီးများဖြင့် ပစ်ခတ်တိုက်ခိုက်ခြင်းတို့ဖြင့် လူသားများ အပေါ် စစ်ရာဇ၀တ်မှု (War crimes against humanity) ကို နေ့စဉ် ဆိုးရွားစွာကျူးလွန်လျက် ရှိနေပါသည်။
၃။ သို့ဖြစ်ပါ၍ နိုင်ငံသားကောင်းရတနာ ကလေးသူငယ်များ၊ ဆရာ၊ ဆရာမများနှင့် ပြည်သူများ အသက် အန္တရာယ်ထိခိုက်ဆုံးရှုံးမှု မရှိစေရေးအတွက် အမျိုးသားညီညွတ်ရေးအစိုးရ၊ ပညာရေးဝန်ကြီးဌာန၏ အသိအမှတ်ပြုမှု၊ ချိတ်ဆက်ပူးပေါင်းမှုတို့ဖြင့် မြေပြင်တွင် ဖွင့်လှစ်ပညာသင်ကြားနေသော အခြေခံပညာ ပြည်သူ့အခြေပြုပညာရေးကျောင်းများ၊ အဆင့်မြင့်ပညာကျောင်းများနှင့် သက်မွေးပညာကျောင်းများ အားလုံး ဘေးအန္တရာယ်ကင်းရှင်းရေး အစီအမံများ ဆောင်ရွက်နေစဉ်အတွင်း ခေတ္တယာယီ ရပ်နားထားရန် ညွှန်ကြားလိုက်သည်။
၄။ ညွှန်ကြားချက်အား သက်ဆိုင်ရာ အဆင့်ဆင့်သောတာဝန်ရှိအဖွဲ့အစည်းများမှ ကြီးကြပ်ကူညီပူးပေါင်း ပါဝင်ဖော်ဆောင်ပေးကြရန်နှင့် သင်ကြားသင်ယူမှုစဉ်ဆက်မပြတ်စေရေးအတွက် အမျိုးသားညီညွတ်ရေး အစိုးရ၊ ပညာရေးဝန်ကြီးဌာနမှ ထုတ်ပြန်ထားသော မူဝါဒများ၊ လမ်းညွှန်ချက်များအတိုင်း ဆောင်ရွက် ပေးရန် ဖြစ်ပါသည်။
၅။ ဤညွှန်ကြားချက်သည် နောက်ထပ်ညွှန်ကြားချက် မထုတ်ပြန်ခင်ထိ အတည် ဖြစ်သည်။ဒေါက်တာဇော်ဝေစိုး
ပြည်ထောင်စုဝန်ကြီး
ပညာရေးဝန်ကြီးဌာန
အမျိုးသားညီညွတ်ရေးအစိုးရ
#NUGMOE #NUG #NationalUnityGovernment #Ministryofeducation #Myanmar