ခြောက်လုံးတန်း “ခွင့်တိုင်ရပြီ”

နေပြည်တော် ခြောက်လုံးတန်းကို မြန်မာ့ နိုင်ငံရေး အသိုင်းအဝိုင်းမှာ သိကြပါသည်။

မြန်မာနိုင်ငံကို အုပ်ချုပ်ခဲ့သော ဗိုလ်ချုပ်မှူးကြီး သန်းရွှေ အပါအဝင် အခြား ထိပ်ပိုင်း ဗိုလ်ချုပ်ကြီးများ ဖြစ်သော ဒု ဗိုလ်ချုပ်မှူးကြီး မောင်အေး၊ ဗိုလ်ချုပ်ကြီး သီဟသူရ တင်အောင်မြင့်ဦး၊ ဗိုလ်ချုပ်ကြီး တင်အေး၊ ဗိုလ်ချုပ်ကြီး ရွှေမန်း နှင့် ဗိုလ်ချုပ်ကြီး သိန်းစိန်တို့ နေထိုင်သော အိမ်ရာများ ဖြစ်ကြသည်။

ပင်စင်စား ထိပ်ပိုင်း ဗိုလ်ချုပ်ကြီးများ၏ Villa Mansion များကို မြန်မာပြည်၏ ထိပ်တန်း ခရိုနီကြီးများ ဖြစ်သော ဦးတေဇ၊ ဦးထွန်းမြင့်နိုင်၊ ဦးချစ်ခိုင် တို့က တည်ဆောက်ပေးခဲ့ခြင်း ဖြစ်သည်။

ထိုနေရာကိုတော့ ရာဇသင်္ဂဟ အဝိုင်းဟု တရားဝင် ခေါ်ပြီး ဦးသန်းရွှေ အိမ်ဘေးမှာတော့ ဦးတင်အေး၊ ဦးမောင်အေး နှင့် သီဟ သူရ တင်အောင်မြင့်ဦး အိမ်တို့ အစဉ်လိုက် ရှိပါသည်။

ဦးသန်းရွှေ အိမ်ကတော့ A1 ဖြစ်ပြီး ဦးမောင်အေး အိမ်အမှတ်ကတော့ A2 ဖြစ်သည်။

ထိုအိမ်များသည် ဧကနှင့်ချီ ကျယ်ဝန်းပြီး ရေကူးကန်၊ ဂေါက်ကွင်း နှင့် အခြား စိတ်အပန်းဖြေ ဇိမ်ခံ ပစ္စည်းများကိုလည်း မိသားစုများ အကြိုက် ထည့်သွင်း တည်ဆောက်ပေးရခြင်း ဖြစ်သည်။

ငလျင်ကြီး လှုပ်သော ကာလ အတွင်းမှာတော့ ခြောက်လုံးတန်းလည်း ငလျင်ဒဏ် ခံခဲ့ရသည်။ အထိအခိုက် ကတော့ သိပ်မများဟု ဆိုသည်။

မျက်နှာကျက်များ ပြိုကျခြင်း၊ နံရံများ ကွဲအက်ခြင်းများ ဖြစ်ခဲ့သည်ကိုတော့ သိခဲ့ရသည်။ စစ်အင်ဂျင်နီယာများက သွားရောက် ပြင်ဆင် ပေးခဲ့ရသည်ဟု ဆိုသည်။

ငလျင်လှုပ်ပြီးနောက် ဗိုလ်ချုပ်ကြီး သိန်းစိန် မိသားစုနှင့် ဗိုလ်ချုပ်မှူးကြီး သန်းရွှေ မိသားစုတို့ ရန်ကုန်ကို ပြောင်းရွှေ့ နေထိုင်ကြကြောင်း ကောလာဟလများလည်း ထွက်ပေါ်ခဲ့သေးသည်။

ခြောက်လုံးတန်းမှာ ဘာတွေ ဖြစ်နေလဲ ဆိုတာကို သိရဖို့က ခက်သည်။

ယခင် နိုင်ငံရေး ရာသီဥတု ကောင်းစဉ်တုန်းကတော့ တရုတ်၊ စင်ကာပူ၊ ထိုင်း သံအမတ်များ၊ စီးပွားရေး သမားကြီးများ၊ ထိုင်း ခရိုနီကြီးများ အပါအဝင် ဗိုလ်ချုပ်ဟောင်းများ သီတင်းကျွတ် နှင့် သင်္ကြန် ကာလများတွင် သွားရောက် ဂါရဝပြု တွေ့ဆုံကြသည်။

အာဏာသိမ်းပြီး နောက်ပိုင်းမှာတော့ အသွားအလာတွေ ကျဲသွားသည်။

နောက်ပိုင်းတွင် ခြောက်လုံးတန်း လုံခြုံရေး အစောင့်အကြပ်တွေကို လဲပစ်လိုက်သည်။

တရုတ် ကွန်မြူနစ် ပါတီ နှင့် တရုတ် အစိုးရ အဆင့်မြင့် အရာရှိကြီးများ လွန်ခဲ့သော ၂ နှစ်ခန့်က ဘဝရှင် မင်းတြားကြီးကို သွားရောက် တွေ့ဆုံခဲ့သည်ကိုတော့ သတင်းများမှာ ဖတ်ရသည်။

၂၀၂၄-၂၀၂၅ မှာတော့ ခြောက်လုံးတန်းက ကြီးကြီးမာစတာ မိသားစုများ အကြောင်းက စုံးစုံးမြုပ်သွားတာကို တွေ့ရသည်။

ဗိုလ်ချုပ်ကြီး သိန်းစိန်ကိုတော့ တပ်မတော်နေ့ အခမ်းအနား များတွင် အကန်တော့ခံ အနေဖြင့် တွေ့မြင် ရသည်။ ဗိုလ်ချုပ်ကြီး တင်အေးကိုလည်း မနှစ်က တွေ့ရသည်။

ခြောက်လုံးတန်းက ၇၀ ကျော် ၈၀ တန်းဝင် အငြိမ်းစား ဗိုလ်ချုပ်ကြီးများ၏ အနေအထား၊ ကျန်းမာရေး ဘယ်လို ရှိနေသလဲ။

စိတ်ဝင်တစား ဖြစ်စေမယ့် မေးခွန်းပင် ဖြစ်သည်။

ဗိုလ်ချုပ်မှူးကြီး သန်းရွှေ အပါအဝင် ပင်စင်စား ဗိုလ်ချုပ်ကြီးများ စစ်ကောင်စီ ထံမှာ “ခွင့်တိုင်” နေရသည် ဆိုသည့် သတင်းပင် ဖြစ်သည်။

ဒုတိယ ဗိုလ်ချုပ်ကြီးဟောင်း တင်အေး မကြာသေးခင်က ရန်ကုန်ရှိ ပန်းလှိုင် ဆေးရုံကြီးမှာ ဆရာဝန်နှင့် ချိန်းဆိုထားချိန် သူသွားခွင့်မရ။

ဆေးရုံ ဆရာဝန်နှင့် တွေ့ဆုံခွင့်ကို စာရေးပြီး တင်ရသည်။

“ခွင့်တိုင်စာ” ကို စစ်ကောင်စီ ဘက်မှ စိစစ်ပြီး ခွင့်ပြုချက် ရဖို့အတွက် ၇၂ နာရီ စောင့်လိုက်ရသည်ဟု မိသားစုဝင်များက ပြောဆိုခဲ့သည်။

ခွင့်ပြုချက် ရပြီးတော့မှ ရန်ကုန်ကို ဆင်းပြီး ဆရာဝန်ကို တွေ့ရသည်။

ထိပ်တန်း ခရိုနီ သူဌေးကြီးများလည်း နိုင်ငံခြားကို သွားမည် ဆိုလျှင် “ခွင့်တိုင်” နေရသည်ဟု နေပြည်တော် သတင်း ရပ်ကွက် က ဆိုသည်။

ဗိုလ်ချုပ်မှူးကြီး သန်းရွှေ မိသားစုလည်း “ခွင့်တိုင်” နေရသည်။ ဧည့်သည် အဝင်အထွက် များကိုလည်း စိစစ် ခံနေရသည်။

ဗိုလ်ချုပ်မှူးကြီး သန်းရွှေ၏ သားမက် ဒေါက်တာ နေစိုးမောင်ကိုလည်း စစ်ကောင်စီက ယခု နှစ်ဆန်း ဇန်နဝါရီလ အတွင်းက ပုဒ်မ ၅၀၅ (က) နဲ့ ဖမ်းဆီးပြီး ထောင်ဒဏ် ၃ နှစ် ချမှတ်ထားသေးသည်။

ဗိုလ်ချုပ်မှူးကြီး သန်းရွှေသည် ၂၀၀၁ ခုနှစ်တွင် အာဏာရှင် ဗိုလ်ချုပ်ကြီး နေဝင်း နှင့် သူ၏ သမီး ဒေါ်ခင်စန္ဒာဝင်းကို နေအိမ် အကျယ်ချုပ် ချခဲ့သည်။ ဗိုလ်ချုပ်ကြီး နေဝင်း မြေးများကိုတော့ နရသိန် အကျဉ်းထောင်သို့ ပို့ခဲ့သူ ဖြစ်သည်။

ခြောက်လုံးတန်းတွင် ခွင့်တိုင်စရာ မလိုသူ ဗိုလ်ချုပ်ကြီး တဦးတော့ ရှိသည်ဟု သိရသည်။

ဒု ဗိုလ်ချုပ်မှူးကြီးဟောင်း မောင်အေးပင် ဖြစ်သည်။

တပ်မတော် ကြည်းချုပ် တာဝန်ကို ယူခဲ့ပြီး နဝတ ၊ နအဖ ဒုဥက္ကဌ တာဝန်ကို နှစ်ပေါင်း ၂၀ ခန့် တာဝန်ယူခဲ့သူ ဖြစ်သည်။

DSA အမှတ်စဉ် (၁) ဆင်းလည်း ဖြစ်သည်။

ဦးမောင်အေးက ယခုအခါမှာတော့ လေဖြတ် ရောဂါကြောင့် လူနာတင် လက်တွန်းလှည်း နှင့် နေထိုင်နေရသူ ဖြစ်သည်။

သူသည် တပ်မတော် ကာကွယ်ရေး ဦးစီးချုပ် (ဗိုလ်ချုပ်မှူးကြီးဟောင်း ဦးသန်းရွှေ၏ နေရာ) နေရာကို ယခု လက်ရှိ စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ကို ပေးဖို့ အတွက် မှတ်ချက် ပေးခဲ့သူ ဖြစ်သည်။

ဗိုလ်ချုပ်မှူးကြီး မင်းအောင်လှိုင်လည်း ရာဇသင်္ဂဟ အဝိုင်းအနီးရှိ ထိုခြောက်လုံးတန်းမှာပင် သူ့အတွက် အိမ်တော် တလုံးကို လွန်ခဲ့သော နှစ်များ အတွင်းက စတင်ပြီး တည်ဆောက်နေပြီ ဖြစ်သည်။

ထို့ပြင် ဒုဗိုလ်ချုပ်မှူးကြီးဟောင်း မောင်အေး၏ လူယုံတော်များသည် (ဒုဗိုလ်ချုပ်ကြီး ကျော်စွာလင်း အပါအဝင်) ယနေ့တွင် မြန်မာ စစ်တပ်၏ ထိပ်ပိုင်း နေရာများကို ရယူထားကြပြီ ဖြစ်သည်။

လက်ရှိ ကာကွယ်ရေး ဦးစီးချုပ်ရုံး (ကြည်း) မှ ဒု ဗိုလ်ချုပ်ကြီး မျိုးမိုးအောင် သည်လည်း ဒုဗိုလ်ချုပ်မှူးကြီး မောင်အေး၏ တူ တော်စပ်ကြောင်း သိရသည်။

၂၀၂၃ ခုနှစ် စက်တင်ဘာလ အတွင်းက အဂတိ လိုက်စားမှုဖြင့် အရေးယူ ခံရသော စစ်ခေါင်းဆောင် မင်းအောင်လှိုင်၏ ညာလက်ရုံး ဒု ဗိုလ်ချုပ်ကြီး မိုးမြင့်ထွန်းသည်လည်း ဒုဗိုလ်ချုပ်မှူးကြီး မောင်အေး၏ လူ ဖြစ်သည်ဟု ဆိုသည်။

ယခု စစ်ခေါင်းဆောင် အပေါ်မှာ ဒုဗိုလ်ချုပ်မှူးကြီး မောင်အေး၏ ကျေးဇူးတွေ အများကြီး ရှိခဲ့သည်။

အာဏာရှင်ဟောင်း ဦးသန်းရွှေက ဒီအကွက်တွေကို နောင်ကျမှ သိရှိ သဘောပေါက် သွားခဲ့သည်ဟု ဆိုသည်။ ဦးမောင်အေးက သူ့ကို တကွက် ကြောသွားတာကို နောက်မှ သိလိုက်ရခြင်း ဖြစ်သည်။

ခြောက်လုံးတန်းမှာ ဗိုလ်ချုပ်ကြီး အေး ဟု တပည့် သာဝကများက ချစ်စနိုးနှင့် ခေါ်ဆိုသူ တဦးသည် “ခွင့်တိုင်” စရာ မလိုသော စာရင်း ပေါက်သူဖြစ်ပြီး ကျန်သူများကတော့ “ခွင့်တိုင်” ရသည့် စာရင်းဝင်များ ဖြစ်သွားခဲ့သည်ဟု ဆိုရမည် ဖြစ်သည်။ ။