တိုက်ပွဲများ ဟင်္သာတခရိုင်အတွင်း ရောက်ရှိနေပြီဖြစ်၍ ပြည်သူများ သတိရှိစွာနေထိုင်ကြပါရန် ဟင်္သာတ ပအဖ ထုတ်ပြန်
ဧပြီ ၁၉၊ ၂၀၂၅
ဧရာဝတီတိုင်းအတွင်း ဖြစ်ပွါးနေတဲ့ တိုက်ပွဲတွေဟာ ဟင်္သာတခရိုင်အတွင်း ရောက်ရှိနေပြီဖြစ်လို့ ပြည်သူများ သတိရှိစွာနေထိုင်ကြဖို့ ဟင်္သာတမြို့နယ် ပြည်သူ့အုပ်ချုပ်ရေးအဖွဲ့က ဒီကနေ့ထုတ်ပြန်တိုက်တွန်းလိုက်ပါတယ်။
တိုက်ပွဲဖြစ်ပွါးရာဒေသများမှ ပြည်သူတွေဟာ နီးစပ်ရာ မြို့နယ်/ကျေးရွာများကို စစ်ဘေးရှောင်နေကြရပြီး၊ စစ်ပွဲဧရိယာ ပိုမိုကျယ်ပြန့်လာသောကြောင့် ဟင်္သာတမြို့နယ်အတွင်းရှိ ပြည်သူများအနေနဲ့ အစစအရာရာ သတိထားနေထိုင်ကြဖို့ အသိပေးတိုက်တွန်းကြောင်း ထုတ်ပြန်ချက်မှာ ဖော်ပြပါရှိပါတယ်။
တဆက်ထဲမှာပဲ ပြည်သူတွေအနေနဲ့-
– မိမိနဲ့ တပါတည်း ယူဆောင်ဖို့ လိုအပ်တဲ့ အရေးကြီး စာရွက်စာတမ်းများ၊ ပစ္စည်းများ၊ ဆေးဝါး ရိက္ခာတွေကို အဆင်သင့်ထုပ်ပိုး ပြင်ဆင်ထားဖို့။
– မြေပြင်သတင်းများအား မပြတ်နားစွင့်ပြီး အသွားအလာ သတိထားဖို့။
– စစ်ကောင်စီ ထောက်တိုင်အဖွဲ့အစည်းများ၊ သတင်းပေးများနဲ့ နီးကပ်ရာကို မသွားရောက်ဖို့
– စစ်ဘေးရှောင်ပြည်သူတွေကို အိမ်ငှါးခ တိုးမြှင့်ကောက်ခံခြင်း မပြုလုပ်ကြပဲ ဝိုင်းဝန်းကူညီဖေးမပေးဖို့တွေ လုပ်ဆောင်ထားကြဖို့ကိုလည်း တိုက်တွန်းနှိုးဆော်ထားပါတယ်။