ဘူတန်ဝန်ကြီးချုပ်က လူမှုကွန်ရက်မှာ တင်ထားသည့် မြန်မာစစ်ခေါင်းဆောင်နှင့် တွဲရိုက်ခဲ့သည့် ဓာတ်ပုံကို ပြန်လည်ဖယ်ရှား

ဘူတန်ဝန်ကြီးချုပ်က လူမှုကွန်ရက်မှာ တင်ထားသည့် မြန်မာစစ်ခေါင်းဆောင်နှင့် တွဲရိုက်ခဲ့သည့် ဓာတ်ပုံကို ပြန်လည်ဖယ်ရှား
ဧပြီ ၅ ၊ ၂၀၂၅

ထိုင်းနိုင်ငံ၊ ဘန်ကောက်မြို့မှာ ဧပြီလ ၄ ရက်က မြန်မာစစ်ခေါင်းဆောင် အကြမ်းဖက်မင်းအောင်လှိုင်နဲ့ တွေ့ဆုံခဲ့တဲ့ ဓာတ်ပုံတစ်ပုံကို ဘူတန်ဝန်ကြီးချုပ်က လူမှုကွန်ရက်စာမျက်နှာမှာမှာ ချီးကျူးစကားတွေ ရေးသားတင်ခဲ့ပြီးနောက် ပြန်လည်ဖယ်ရှားလိုက်တယ်လို့ သိရပါတယ်။
အကြမ်းဖက်ခေါင်းဆောင် မင်းအောင်လှိုင်ကို ချီးကျူးတဲ့ စာသားတွေနဲ့ တင်ထားတဲ့ အဆိုပါပို့စ်အောက်မှာ မြန်မာပြည်သူတွေက ပြင်းထန်တဲ့ ကန့်ကွက်စာတွေ ရေးသားခဲ့ပြီးနောက် ဧပြီ ၅ ရက် ဒီနေ့မှာတော့ ဘူတန်ဝန်ကြီးချုပ်က ပို့စ်ကို ပြန်လည်ဖယ်ရှားခဲ့တာဖြစ်ပါတယ်။
အကြမ်းဖက်မင်းအောင်လှိုင်ဟာ မြန်မာပြည်သူလူထုရဲ့ တရားဝင်ခေါင်းဆောင်မဟုတ်ဘဲ ပြည်သူတွေကို သတ်ဖြတ်နေတဲ့ အကြမ်းဖက်တစ်ယောက်သာ ဖြစ်ပြီး မင်းအောင်လှိုင်နဲ့ ထိတွေ့ဆက်ဆံတာ မပြုလုပ်ဖို့နဲ့ တရားဝင်မှုပေးတဲ့ လုပ်ရပ်မျိုးကို ရှောင်ရှားဖို့ စတဲ့ ကန့်ကွက်ဆန့်ကျင်တဲ့ မှတ်ချက်ပေါင်းများစွာ ရပြီးနောက် ဘူတန်ဝန်ကြီးချုပ်က ပို့စ်ကို ပြန်လည်ဖယ်ရှားလိုက်တာဖြစ်ပါတယ်။
ဘူတန်ဝန်ကြီးချုပ် တင်ခဲ့တဲ့ ပို့စ်မှာ ဘူတန်-မြန်မာ ဆက်ဆံရေး ခိုင်မာစေကာ လာမယ့်နှစ်တွေမှာ ပိုမိုနီးကပ်တဲ့ ပူးပေါင်းဆောင်ရွက်မှုတွေ တည်ဆောက်ဖို့ မျှော်လင့်သလို ငလျင်ဘေးမှာလည်း ဘူတန်ဘုရင်က တက်နိုင်သမျှ ပံ့ပိုးကူညီမယ်လို့ ပြောကြားကြောင်း အစရှိတာတွေ ရေးသားဖော်ပြထားတာဖြစ်ပါတယ်။
ထိုင်းနိုင်ငံက အိမ်ရှင်အဖြစ် လက်ခံကျင်းပတဲ့ (၆) ကြိမ်မြောက် BIMSTEC ထိပ်သီးအစည်းအဝေးကို တက်ရောက်ခွင့်ရခဲ့တဲ့ အကြမ်းဖက်မင်းအောင်လှိုင်ဟာ ဘူတန်ဝန်ကြီးချုပ်နဲ့ ဧပြီလ ၄ ရက်က ဘန်ကောက်မြို့ရှိ Shangri-La ဟိုတယ်မှာ တွေ့ဆုံခဲ့တာဖြစ်ပါတယ်။
ပုံစာ – ဘူတန်ဝန်ကြီးချုပ် ပြန်လည်ဖြုတ်ချခဲ့တဲ့ လူမှုကွန်ရက်က ပိုစ့်