နိုင်ငံတစ်ဝန်း ငလျင်ဒဏ် ၅ ရက်တာအတွင်း စစ်ကောင်စီ လေကြောင်းတိုက်ခိုက်လို့ အရပ်သားပြည်သူ ၅၀ ထက်မနည်း သေဆုံးခဲ့
ဧပြီ ၃၊ ၂၀၂၅
နိုင်ငံတစ်ဝန်း ငလျင်ဒဏ်ကို ဆိုးရွားပြင်းထန်စွာ ခံစားခဲ့ရတဲ့ မတ်လ ၂၈ ရက်ကနေ ဧပြီ ၁ ရက်အထိ စစ်ကောင်စီရဲ့ လေကြောင်းတိုက်ခိုက်မှုကြောင့် အရပ်သားပြည်သူ ၅၀ ထက်မနည်းသေဆုံးခဲ့ရကြောင်း အမျိုးသားညီညွတ်ရေး အတိုင်ပင်ခံကောင်စီ (NUCC) က ထုတ်ပြန်ပါတယ်။
ငလျင်ဒဏ်ကြောင့် ကယ်ဆယ်ရေးလုပ်ငန်းတွေကို အပူတပြင်းလုပ်ဆောင်နေရတဲ့ကာလတွေမှာ အာဏာသိမ်းစစ်တပ်က စုစုပေါင်း တိုက်ခိုက်မှု ၃၂ ကြိမ်အတွင်း အရပ်သား ပြည်သူ အယောက် ၅၀ ကျော် သေဆုံးခဲ့ပြီး ၄၉ ယောက်ခန့် ထိခိုက်ဒဏ်ရာရရှိခဲ့တယ်လို့ ဆိုပါတယ်။
တိုက်ခိုက်မှုတွေထဲမှာ ငလျင်ဒဏ်သင့် နေရာတွေဖြစ်တဲ့ စစ်ကိုင်းတိုင်း ချောင်းဦးမြို့နယ်နဲ့ မန္တလေးတိုင်း စဉ့်ကူးမြို့နယ်တို့ အပါအဝင် နေရာပေါင်း ၁၁ နေရာကို လေကြောင်းတိုက်ခိုက်ခဲ့တယ်လို့ NUCC က ထုတ်ပြန်ပါတယ်။
NUG အပါအဝင် တော်လှန်ရေးအင်အားစုတွေတိုင်းရင်းသားလက်နက်ကိုင်တွက ငလျင်ကြောင့် အပစ်ရပ်ထားမယ်လို့ ကနဦး ထုတ်ပြန်ထားချိန်မှာ စစ်ကောင်စီက တိုက်ခိုက်မှုတွေကို ရပ်နားခဲ့ခြင်းမရှိပါဘူး။
ငလျင်ဒဏ်သင့်ကာလမှာ တရုတ်ကြက်ခြေနီယာဉ်တန်းကို ပစ်ခတ်မိပြီးနောက်မှာမှ စစ်ကောင်စီလည်း ရက် ၂၀ ကြာ ယာယီအပစ်ရပ်ကြောင်း မနေ့က ဧပြီလ ၂ရက်နေ့မှာ ထုတ်ပြန်ကြေညာလိုက်တာ ဖြစ်ပါတယ်။
