ရေးမြို့နယ်၊ အာယုတောင်ရွာထိပ်ရှိ ခမရ ၃၄၃ တပ်က တပ်စွဲထားသည့်နေရာကို ရေးဘီလူးတပ်ဖွဲ့က ဝင်ရောက် စီးနင်းစဉ် စစ်သားများအားလုံး ထွက်ပြေး
ရန်ကုန်၊ ဖေဖော်ဝါရီ ၂၆
မွန်ပြည်နယ်၊ ရေးမြို့နယ်၊ အာယုတောင်ရွာထိပ်ရှိ ခမရ ၃၄၃ က တပ်စွဲထားသည့်နေရာကို ရေးဘီလူးအဖွဲ့က ဝင်ရောက်စီးနင်းရန် ဝိုင်းထားစဉ်တွင်ပင် အကြမ်းဖက်စစ်သားများအားလုံး ထွက်ပြေးသွားကြကြောင်း ရေးဘီလူးအဖွဲ့ခေါင်းဆောင်က ရန်ကုန်ခေတ်သစ်သတင်းဌာနသို့ ပြောကြားသည်။
ယမန်နေ့ ဖေဖော်ဝါရီလ ၂၅ ရက်နေ့ အကြမ်းဖက်စစ်သား စုစုပေါင်း ၁၅ ဦးဝန်းကျင် တပ်စွဲထားသည့် အာယုတောင်ရွာထိပ်နေရာကို ဝင်ရောက်စီးနင်းရန် ဝိုင်းထားစဉ်တွင် ထွက်ပြေးတိမ်းရှောင်သွားကြခြင်း ဖြစ်ကြောင်း သိရှိရသည်။
” တပ်က ထွက်ပြီးတော့ အဲဒီရော်ဘာခြံတည်နေရာတွေမှာ ကတုတ်ကျင်းလေးတွေ ပေါက်ပြီးတော့ ကင်းပုန်းဝပ်တယ်။ ဖြတ်သန်းသွားလာတာတွေကို စောင့်ပစ်တယ်။ စစ်ဆေးရေးထွက်စစ်လေ့ရှိတယ်။ ရွာသားတွေ သယ်ယူလာတဲ့ ဆေးပစ္စည်းတွေ ချခိုင်းတယ်။ အဲဒီနေရာကို ဝင်ရောက် ချေမှုန်းရေး ဝင်သွားချိန်မှာ တစ်ယောက်မှ မတွေ့တော့ဘူး သူတို့ဘက်က သတင်းရပြီး ထွက်ပြေးသွားတယ်”ဟု ရေးဘီလူးအဖွဲ့ခေါင်းဆောင်က ရန်ကုန်ခေတ်သစ်သတင်းဌာနသို့ ပြောကြားသည်။
အကြမ်းဖက်စစ်သားများ ကင်းပုန်းဝပ်သည့်နေရာသည် အာယုတောင်ရွာထိပ်ရှိ ၃၄၃ စစ်တပ်၏ အနောက်ဘက်ဖြစ်ပြီး တပ်ထဲမှ ထွက်ကာ ကင်းပုန်းဝပ်ခြင်း ဖြတ်သန်းသွားသူများကို ပစ်ခတ်ခြင်း ၊ စစ်ဆေးခြင်းများ လုပ်ဆောင်လေ့ရှိသည့် နေရာဖြစ်ကြောင်း သိရှိရသည်။