ပြည်ပရောက်မြန်မာများ စစ်မှုထမ်းရန်မှတ်ပုံတင်ရမည်ဖြစ်ပြီး အထောက်ထား အခိုင်အမာမပြနိုင်ပါက တရားခံပြေး ဖြစ်မည်
ဂျူချန်း
မဇ္ဈိမ။ ။စစ်မှုထမ်းအသက်အရွယ်အတွင်းအကျုံးဝင်သော ပြည်ပရောက်မြန်မာများလည်း မိသားစုမှ တဆင့် ကိုယ်စား မှတ်ပုံတင်စာရင်းပေးသွင်းထားရမည်ဖြစ်ပြီး ခိုင်လုံသည့်အထောက်အထားမပြနိုင်ပါက ပြည်သူ့စစ်မှုထမ်းခြင်းကိုရှောင်လွှဲခြင်းဖြင့် ဥပဒေအရ အရေးယူနိုင်ကြောင်း စစ်ကောင်စီ၏ ဇန်နဝါရီလ ၂၃ ရက် နေ့က ပြဋ္ဌာန်းလိုက်သည့် ပြည်သူ့စစ်မှုထမ်းနည်းဥပဒေတွင် ပါရှိသည်။
ပြည်သူ့စစ်မှုထမ်းနည်းဥပဒေ၏ အခန်း(၆) အပိုဒ်(၃၃)တွင် စစ်မှုထမ်းအသက်အရွယ်ရောက်သူ နိုင်ငံသား တိုင်း မှတ်ပုံတင်စာရင်းသွင်းရန် ဆင့်ခေါ်ခြင်းခံရသူသည် သတင်းပေးပို့ရန်ပျက်ကွက်ပါက ပျက်ကွက်သူ မိသားစုဝင်တဦးဦးက ဆင့်ခေါ်ခံရသူသည် မည်သည့်အကြောင်းကြောင့်(သို့မဟုတ်)မည်သည့်နေရာသို့ ရောက်ရှိနေသည်ကို ခိုင်လုံသည့်အထောက်အထားနှင့်အတူတင်ပြကာ ကိုယ်စား မှတ်ပုံတင်စာရင်းသွင်း ရမည်ဖြစ်ပြီး ထိုသို့လိုက်နာခြင်းမရှိသူဖြစ်စေ၊ ခိုင်လုံသောအထောက်အထားတင်ပြနိုင်ခြင်း မရှိသည်ဖြစ်စေ သတင်းပို့ရန်ပျက်ကွက်နေသူသည် ပြည်သူ့စစ်မှုထမ်းခြင်းကိုရှောင်လွှဲခြင်းဖြင့် ဥပဒေပုဒ်မ(၂၃) ပုဒ်မ ခွဲ(က)ကို ဖောက်ဖျက်ကျူးလွန်သည်ဟု မှတ်ယူမည်ဖြစ်ကြောင်း ဖော်ပြထားသည်။
“မှတ်ပုံတင်တဲ့ချိန်မှာ နိုင်ငံခြားရောက်နေတယ်ဆို ခိုင်လုံတဲ့အချက်အလက်ပြပေးရတယ်။ ဥပမာ ဂျပန်ကို သွားရင် စေလွှတ်လိုက်တဲ့ကုမ္ပဏီရှိရမယ်။ ထိုင်းဆိုလည်း ထိုင်း၊ စင်္ကာပူဆိုလည်း စင်္ကာပူ၊ ကိုးရီးယားဆို လည်း ကိုးရီးယားပေါ့လေ၊ ဒီဘက်က အလုပ်သမားအေဂျင်စီတွေရှိတယ်။ သူတို့ကနေတဆင့် ဆက်သွယ် ပြီး သွားထားတယ်၊ ဘယ်နေ့ဘယ်ရက်က သွားတယ်၊ ဘာအလုပ်ကိုင်နဲ့သွားတယ်၊ လစာဘယ်လောက် ရှိတယ် စတဲ့အထောက်အထားတွေပေါ့။ ပြည်တွင်းကစေလွှတ်လိုက်တဲ့ အထောက်အထားတွေတင်ပြပေး ရမယ်ပေါ့။ အဲဒီလိုမရှိဘဲနဲ့ မိမိတို့သဘောဆန္ဒအလျောက် နိုင်ငံခြားတိုင်းပြည်ကိုထွက်သွားမယ်၊ အခြား နေရာဒေသတွေကိုရောက်သွားမယ်ဆိုရင်တော့ စစ်မှုထမ်းဆင့်ခေါ်ခံရတဲ့လူကို မှတ်တမ်းတင်ပြီးတော့ သူ့ကိုတရားစွဲမှာပေါ့။ ပြီးရင် တရားခံပြေးကြေညာမယ်၊ ဖမ်းဝရမ်းထုတ်ထားမှာပေါ့” ဟု ဥပဒေပညာရှင် တဦးက ရှင်းပြသည်။
ထိုသို့ အထောက်အထားခိုင်လုံခြင်း ရှိ၊ မရှိကို မြို့နယ်ပြည်သူ့စစ်မှုထမ်းဆင့်ခေါ်ရေးအဖွဲ့က စိစစ်မည်ဖြစ် ပြီး ဆုံးဖြတ်ချက်က ၎င်းတို့၏လက်ထဲတွင်သာ ရှိသည်။ အထောက်အထားမခိုင်လုံဟု မြို့နယ်အဖွဲ့က မှတ်ချက်ပြုပါက ဆင့်ခေါ်ခံရသူသည် ရောက်ရာနေရာမှပြန်လာကာ စစ်မှုထမ်းရမည်ဖြစ်ပြီး ထိုကဲ့သို့လုပ် ဆောင်ခြင်းမရှိပါက အရေးယူခံရမည်ဖြစ်သည်။
ပြည်သူ့စစ်မှုထမ်းခြင်းကိုရှောင်လွှဲခြင်းဖြင့် ပုဒ်မ(၂၃)အရ စစ်မှုထမ်းမှတ်ပုံတင်ရန်ပျက်ကွက်ပါက ထောင် ဒဏ်သုံးနှစ်ကျခံရမည်ဖြစ်ပြီး ပြစ်ဒဏ်ကျခံပြီးနောက်တွင်လည်း စစ်မှုထမ်းဆောင်ရန် ပြန်လည်သတင်းပို့ ရမည်ဖြစ်သည်။
ယင်းအပြင် အသက်ပြည့်မီသည့်လူငယ်များအားလုံးကိုလည်း စစ်ကောင်စီကမှတ်ပုံတင်ခိုင်းကာ ဆေး အောင်ပြီးသူများသည် စစ်မှုထမ်းအတွက် စောင့်ဆိုင်းနေရမည်ဖြစ်ပြီး ခွင့်ပြုချက်မရှိဘဲ နိုင်ငံခြားထွက်ခွင့် မပြုကြောင်း နည်းဥပဒေတွင် ထည့်သွင်းထားသည်။
စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်က ပြည်သူ့စစ်မှုထမ်းဥဒေကို ၂၀၂၄ ဖေဖော်ဝါရီ ၁၀ ရက် နေ့တွင် အတည်ပြုပြီးနောက် တနှစ်နီးပါးအကြာ ၂၀၂၅ ဇန်နဝါရီ ၂၃ ရက်နေ့တွင် ပြည်သူ့စစ်မှုထမ်းနည်း ဥပဒေ ထွက်ရှိလာခြင်းဖြစ်သည်။
စစ်ကောင်စီ၏ ပြည်သူ့စစ်မှုထမ်းဥပဒေအရ သာမန်အရပ်သားများတွင် ၁၈ နှစ်မှ ၃၅ နှစ်အတွင်း အမျိုး သားများနှင့် အမျိုးသမီးများတွင် ၁၈ နှစ်မှ ၂၇ နှစ်အတွင်း၊ ဆရာဝန်၊ အင်ဂျင်နီယာကဲ့သို့သော အတတ် ပညာရှင်များကမူ အမျိုးသားဖြစ်ပါက အသက် ၁၈ မှ ၄၅ နှစ်၊ အမျိုးသမီးဖြစ်ပါက အသက် ၁၈ နှစ်မှ ၃၅ နှစ်ဟု စစ်မှုထမ်းသက်ကို သတ်မှတ်ထားသည်။
စစ်မှုထမ်းရမည့်သက်တမ်းကို နှစ်နှစ်ဟုသတ်မှတ်ထားသော်လည်း အရေးပေါ်အခြေအနေဟု သတ်မှတ် ပါက စစ်မှုထမ်းကာလကို ငါးနှစ်အထိ သက်တမ်းတိုးနိုင်ကြောင်း ဆိုထားသည်။
စစ်မှုထမ်းအပတ်စဉ်တခုတွင် သင်တန်းသား ၅,၀၀၀ ခေါ်ယူရန်သတ်မှတ်ထားပြီး လက်ရှိတွင် စစ်ကောင် စီက စစ်မှုထမ်းအပတ်စဉ်(၉)အထိ ခေါ်ယူထားပြီး ဖြစ်သည်။
စာတည်း။ ။စောဖေ
ပုံအညွှန်း – ပြည်သူ့စစ်မှုထမ်းသင်တန်းအမှတ်စဉ်(၉)သင်တန်းဖွင့်ပွဲများအား တိုင်းစစ်ဌာနချုပ် အသီးသီးတွင်ကျင်းပ ခဲ့ကြောင်း စစ်ကောင်စီက ဇန်နဝါရီလ ၂၀ ရက်တွင် ထုတ်ပြန်ထားသည်။(Photo – CINCDS)
