နောင်ချိုတွင် စစ်ကောင်စီနှင့် TNLA တိုက်ပွဲများ ပြင်းထန်နေချိန် တရုတ်ခေါ်တွေ့ပြီး အပစ်ရပ်ရန် ပြော…
နောင်ချိုကို လက်လွှတ်မှာမဟုတ်ဘဲ ကဏ္ဍပေါင်းစုံမှ ခုခံကာကွယ်ဖို့ ပြင်ဆင်နေဟု TNLA ပြော
ဇူလိုင် ၅၊ ၂၀၂၅
ရှမ်းပြည်နယ်မြောက်ပိုင်း၊ နောင်ချိုမြို့နယ်အတွင်း တအာင်းတပ်မတော် (TNLA) နဲ့ အကြမ်းဖက်စစ်ကောင်စီတပ်တို့အကြား တိုက်ပွဲတွေ ပြင်းထန်နေချိန်မှာ တရုတ်နိုင်ငံက နှစ်ဖက်စလုံး သီးခြားစီ ခေါ်ယူတွေ့ဆုံပြီး တိုက်ပွဲတွေ ရပ်တန့်ဖို့ ပြောကြားခဲ့တယ်လို့ TNLA ပြောခွင့်ရ လွေးယေဦးက ပြောပါတယ်။
ဇူလိုင်လ ၅ ရက်က ပြုလုပ်ခဲ့တဲ့ သတင်းစာရှင်းလင်းပွဲမှာ TNLA ပြောခွင့်ရ လွေးယေဦးက အခုလို ပြောကြားခဲ့တာ ဖြစ်ပါတယ်။
“တရုတ်အစိုးရကနေတစ်ဆင့် ကျမတို့ PSLF/TNLA ဗဟိုကိုရော၊ စစ်ကောင်စီကိုပါ သီးခြားတွေ့ဆုံဆွေးနွေးတာတွေ ရှိပါတယ်။ တရုတ်အစိုးရရဲ့ ကြားဝင်မှုက ခရီးရောက်ပါတယ်။ တစ်ဖက်နဲ့တစ်ဖက် ထိုးစစ်တွေရပ်ဖို့၊ အပစ်ရပ်ဖို့နဲ့ အရပ်သားတွေကို ကာကွယ်ဖို့ တရုတ်ဘက်က ပြောကြားခဲ့ပါတယ်” လို့ လွေးယေဦးက ပြောဆိုခဲ့တာပါ။
“၁၀၂၇ စစ်ဆင်ရေး” မှာ TNLA က နောင်ချိုမြို့ကို ထိန်းချုပ်ခဲ့ပြီးနောက် တရုတ်နိုင်ငံရဲ့ ကြားဝင်မှုနဲ့ “ဟိုင်ဂင်သဘောတူညီချက်” အရ အပစ်အခတ်ရပ်စဲထားခဲ့ပေမယ့် စစ်ကောင်စီတပ်က အင်အားထောင်နဲ့ချီ အသုံးပြုပြီး နောင်ချိုမြို့ကို ပြန်လည်သိမ်းပိုက်ဖို့ ထိုးစစ်ကြီးတွေ ဆင်နွှဲလာတာကြောင့် တိုက်ပွဲတွေ ပြန်လည် ပြင်းထန်လာခဲ့တာဖြစ်ပါတယ်။
TNLA အနေနဲ့ နောင်ချိုမြို့ကို လက်မလွှတ်ရရေးအတွက် အခိုင်အမာ ခုခံကာကွယ်သွားမယ်လို့လည်း ပြောကြားထားပါတယ်။
“လက်ရှိကတော့ တရုတ်အစိုးရ အစီအစဥ်နဲ့ တွေ့ဆုံဆွေးနွေးမှုတွေ ကျမတို့ ဆောင်ရွက်နေပါတယ်။ အဓိက က အပစ်ရပ်ဖို့၊ အရပ်သားတွေကို ကာကွယ်စောင့်ရှောက်ဖို့တွေ ဖြစ်ပါတယ်။ လက်ရှိအနေအထားအရ နောင်ချိုကို လက်လွှတ်ပေးတာမျိုး၊ ဆုံးဖြတ်ချက် ချတာမျိုးတွေ မရှိသေးဘူးပေါ့နော်။ ခုခံကာကွယ်မှုကိုလည်း ကျမတို့ ပြင်ဆင်ထားပါတယ်။ ဒီအပေါ်မှာတော့ ပြည်သူလူထုအနေနဲ့ စိုးရိမ်စရာမရှိဘူးလို့ မြင်ပါတယ်” လို့ လွေးယေဦးက ပြောပါတယ်။
လာမယ့် သြဂုတ်လမှာလည်း တရုတ်နိုင်ငံရဲ့ ကြားဝင်မှုနဲ့အတူ စစ်ကောင်စီနဲ့ TNLA တို့ တရားဝင်တွေ့ဆုံဆွေးနွေးဖို့ စီစဉ်ထားတာရှိနေပါတယ်။
“သြဂုတ်လမှာ ဆွေးနွေးဖို့ကတော့ ယတိပြတ်ပြောဖို့ စောပါသေးတယ်။ ဘာလို့ဆို အချိန်က ၂ လလောက် ကျန်ပါသေးတယ်။ ရောက်တဲ့နေရာမှာ အပစ်ရပ်ဖို့၊ တဖက်နဲ့ တဖက် ထိုးစစ်ဆင်မှုတွေ မပြုလုပ်ဖို့၊ အရပ်သားတွေရဲ့ စားဝတ်နေရေးတွေ ပြေလည်အောင်ဆောင်ရွက်ဖို့ ဒါကတော့ ကျမတို့ရဲ့ ရပ်တည်ချက်ဖြစ်ပါတယ်။ လာမယ့် သြဂုတ်လမှာ တွေ့ဆုံမှုကတော့ သက်ရောက်မှုက ဘယ်လိုရှိနိုင်မလဲ မပြောတတ်သေးဘူးပေါ့နော်” လို့ လွေးယေဦးက ပြောပါတယ်။
ပြီးခဲ့တဲ့ ဧပြီလအတွင်း တရုတ်ကြားဝင်စေ့စပ်မှုနဲ့ တွေ့ဆုံမှုမှာ အကြမ်းဖက်စစ်ကောင်စီက နောင်ချိုအပါအဝင် TNLA ထိန်းချုပ်ထားတဲ့ ကျောက်မဲ၊ သီပေါ၊ မိုးကုတ်နဲ့ မိုးမိတ်မြို့တွေကနေ ပြန်လည်ဆုတ်ခွာဖို့ တောင်းဆိုခဲ့ပေမယ့် လက်ရှိအချိန်ထိ မြို့ပေါင်း ၁၂ မြို့ကို ထိန်းချုပ်ထားနိုင်တဲ့ TNLA ကတော့ စစ်ကောင်စီတောင်းဆိုတဲ့ မြို့တွေကို လက်လွှတ်မှာမဟုတ်ဘူးလို့ ပြီးခဲ့တဲ့ မေလဆန်းက ပြုလုပ်တဲ့ သတင်းစာရှင်းလင်းပွဲမှာ ပြောကြားခဲ့ပါတယ်။
ပုံစာ – မြန်မာနိုင်ငံဆိုင်ရာ တရုတ်အထူးကိုယ်စားလှယ် တိန့်ရှီကျွင်းနဲ့ အကြမ်းဖက်ခေါင်းဆောင် မင်းအောင်လှိုင်၊ TNLA ပြောခွင့်ရ လွေးယေဦး၊ TNLA တပ်ဖွဲ့