မန္တလေးမြို့ပေါ်တွင် ရုပ်အလောင်းများ ပြန်မဖော်နိုင်သေးသည့် ပြိုကျ နေအိမ်နှင့် အဆောက်အအုံများစွာရှိနေပြီး မြေတူးစက် ငှားရမ်းခများ သိန်းရာချီထိ ဈေးမြင့်တက်နေ
ရန်ကုန်၊ ဧပြီ ၅
မန္တလေးမြို့ပေါ်တွင် ရုပ်အလောင်းများ ပြန်မဖော်နိုင်သေးသည့် နေရာများစွာရှိနေပြီး မြေတူးစက် ငှားရမ်းခများ သိန်းရာချီထိ ဈေးမြင့်တက်နေကြောင်း အိမ်ပြိုကျခဲ့ရသည့် အိမ်ပိုင်ရှင်များက ရန်ကုန်ခေတ်သစ် သတင်းဌာနထံသို့ ပြောဆိုသည်။
မတ်လ ၂၈ ရက်နေ့တွင် လှုပ်ခတ်ခဲ့သော အင်အားပြင်း မြေငလျင်ကြောင့် မန္တလေးမြို့သည် ၈၀ ရာခိုင်နှုန်းခန့် ပျက်စီးခဲ့ပြီး လက်ရှိချိန်ထိ အပျက်အစီး အားလုံးရှင်းလင်းနိုင်ခြင်းမရှိသေးဘဲ ရုပ်အလောင်းများစွာကိုလည်း တူးဖော်နိုင်ခြင်းမရှိသေးကြောင်း သိရသည်။
ရုပ်အလောင်းများ တူးဖော်နိုင်ရန် မြေတူးစက် ငှားရမ်းခများလည်း များစွာမြှင့်တက်နေပြီး သိန်းရာချီ ပေးဆောင်နိုင်မှသာ ငှားရမ်းနိုင်ကြောင်း၊ ထိုသို့ ငှားရမ်းခများ မြင့်တက်နေသော်လည်း ငွေကြေး ချမ်းသာသူများ၊ စစ်တပ်နှင့် ပတ်သက်သူများက ၎င်းတို့၏ မိသားစုဝင်များကို အချိန်ပိုင်းအတွင်း ကယ်ထုတ်နိုင်ခြင်း၊ ရုပ်အလောင်းများ တူးဖော်ယူဆောင်ခြင်းများရှိပြီး အခြေခံလူတန်းစာများ သေဆုံးမှုများပြားခဲ့ခြင်းဖြစ်ကြောင်း သိရှိရသည်။
ထို့ပြင် ငွေကြေး ချမ်းသာသူများသည် မြို့ကိုစွန့်၍ ထွက်ခွာသွားကျသော်လည်း အခြေခံလူတန်းစားများသည် မြို့ပေါ်တွင် များပြားစွာ ကျန်ရှိနေကြောင်း၊ လက်ရှိချိန်တွင် မန္တလေးမြို့၌ ဖုန်းလိုင်းနှင့် အင်တာနက်လိုင်းများ ပြတ်တောက်နေဆဲဖြစ်ပြီး WIFI များသာ အသုံးပြု၍ ရကြောင်း သိရသည်။
ညအချိန်များတွင်လည်း လျှပ်စစ်မီး ရရှိခြင်းမရှိသောကြောင့် သူခိုးဓားမြများ ပေါများနေပြီး အကြမ်းဖက် စစ်ကောင်စီ တပ်သားများ ပျောက်ဆုံးနေကာ ပြည်သူများက ကင်းစောင့်၍ လုံခြုံရေး ဆောင်ရွက်နေရကြောင်း၊ ကုန်းဈေးနှုန်းများလည်း ဆက်တိုက်မြင့်တက်နေပြီး ပြည်သူများသည် ပရဟိတလုပ်ဆောင်သူများ၏ လာရောက် လှူဒါန်းမှုများဖြင့် ဆက်လက် ရပ်တည်နေရကြောင်း သိရှိရသည်။
“မြေတူးစက် ငှားရမ်းဖိုးတွေကလည်း အရမ်းဈေးကြီးတယ်။ အိမ်တွေမှာ ငွေ သိန်း ၁၀၀ လောက်ရှိမှ မြေတူးစက်ငှားပြီးတော့ ဖော်လို့ရမယ့် အခြေအနေပဲ အနံ့တွေကလည်း အရမ်းနံနေပြီ မြို့ကတော်တော်ကြီးကို ဆိုးဝါးသွားပြီ အလောင်းတွေ မထုတ်နိုင်တဲ့ နေရာက အများကြီး သူဌေးတွေ ချမ်းသာတဲ့ သူတွေအတွက်ကတော့ ပိုက်ဆံတွေပေးပြီးတော့ အလောင်းတွေ ထုတ်ကြတာပေါ့။ တချို့နေရာတွေ အသက်ရှင်လျက် ရှိနေနိုင်တဲ့နေရာတွေကျတော့ အသံတွေလည်း ကြားနေရတာပေါ့။ ဘယ်သူမှ မကူညီနိုင်ကြဘူး။ ပရဟိတ အသင်းတွေလည်း အများကြီး လိုအပ်နေတာပေါ့။ မန္တလေးမြို့ရဲ့ ပျက်စီးမှုကလည်း ၈၀ ရာခိုင်နှုန်းလောက်ရှိတဲ့ အနေအထားပဲ ပိုက်ဆံရှိတဲ့ သူတွေကတော့ မြို့ကို စွန့်ခွာသွားကြပေမယ့် အခြေခံ လူတန်းစားအများစုကတော့ ခိုကပ်နေကြတာပေါ့။ သွားစရာမရှိကြဘူးလေ သူခိုးဓားမြကလည်း တော်တော်ပေါတယ်” ဟု ဒေသပြည်သူ တစ်ဦးက ပြောဆိုသည်။
မန္တလေးမြို့ ၈၅×၃၀ လမ်းရှိ ရွှေမြန်မာထမင်းဆိုင် ပြိုကျမှုတွင်လည်း ဆိုင်ရှင်က ငွေကျပ် သိန်း ၂၀၀ ပေး၍ အမည်စာရင်းများဖြင့် မြေတူးစက် ငှားရမ်းပြီး ရုပ်အလောင်းများကို ရှာဖွေခဲ့ရကြောင်း၊ အမည်စာရင်းတွင် ပါဝင်သော သူများ၏ ရုပ်အလောင်းများ ရှာဖွေတွေ့ရှိခဲ့ပြီး ဆက်လက် ရှာဖွေရေး လုပ်ဆောင်ခြင်းမရှိသောကြောင့် ကျန်ရှိနေသော သူများ၏ အပုပ်နံ့များ လက်ရှိချိန်ထိ ထွက်နေကြောင်း သိရသည်။
“ရွှေမြန်မာထမင်းဆိုင်ပြိုကျမှုမှာ ဝန်ထမ်းတွေ ထမင်းလာစားတဲ့သူတွေ တိုက်ပြိုကျပြီးသေဆုံးခဲ့တယ်။ ဆိုင်ပိုင်ရှင်က ရေချိုးသွားနေလို့ အသက်မသေခဲ့ဘဲ သူ့သားနဲ့ ဝန်ထမ်းတွေ ပိတ်မိနေလို့ ကိုယ်အစီအစဉ်နဲ့ ရှင်းလင်းတာ မြေတူးစက် ငှားရမ်းခ သိန်း ၂၀၀ တောင်ပေးရတယ်။ လူ ၅ ယောက်ရဲ့ ရုပ်အလောင်းကို အမည်စာရင်းပေးပြီး ရှာခိုင်းတာ အခြားရုပ်အလောင်း ၄ ခုပါ တွေ့ရပြီး ရုပ်အလောင်း ၉ လောင်း ရှာဖွေတွေ့ရှိခဲ့တယ်။ သူတို့စာရင်းပေးတဲ့ ၅ ယောက်တွေ့ပြီး ဆက်မရှာတော့ ကျန်ရုပ်အလောင်းတွေက အခုထိ ရှိနေတယ်။ အပုပ်နံ့တွေထွက်နေတာ အခြားနေရာတွေမှာလည်း တိုက်အပြိုအပျက်တွေကို ပိုင်ရှင်တွေက သိန်းရာချီ အကုန်အကျခံကာ လုပ်ဆောင်နေကြရတယ်” ဟု ဒေသပြည်သူ တစ်ဦးက ဆက်လက် ပြောဆိုသည်။
ထို့ပြင် အကြမ်းဖက် စစ်တပ်ခန့် အုပ်ချုပ်ရေးမှူးများသည်လည်း ကူညီကယ်ဆယ်ရေး၊ ထောက်ပံ့မှုတွေ မလုပ်ဆောင်ဘဲ အိမ်ထောင်စုတစ်ခုကို ဧည့်စာရင်းတိုင်ခ ၅၀၀၀ ကျပ်သတ်မှတ်ပြီး ငွေကြေးရှာဖွေမှုများသာ လုပ်ဆောင်နေကြကြောင်း သိရသည်။