မြန်မာ့ငလျင်ဘေးအတွက် Quad အဖွဲ့ဝင် ၄ နိုင်ငံ ပူးပေါင်းကူညီမည်
ဧပြီ ၄၊ ၂၀၂၅
ဆိုးရွားပြင်းထန်ခဲ့တဲ့ မြန်မာနိုင်ငံရဲ့ ငလျင်ဘေးအတွက် Quad အဖွဲ့ ဝင် ၄ နိုင်ငံက ကူညီမှုတွေပြုလုပ်ပေးသွားမယ်လို့ ဒီနေ့ ဧပြီလ ၄ရက်နေ့မှာ ပူးတွဲကြေညာချက်တစ်စောင် ထုတ်ပြန်လိုက်ပါတယ်။
အဖွဲ့ဝင် ၄ နိုင်ငံဖြစ်တဲ့ အမေရိကန်၊ ဂျပန်၊ ဩစတြေးလျနဲ့ အိန္ဒိယ ဒုတိယနိုင်ငံခြားရေးဝန်ကြီးတွေ ဆက်သွယ်ဆွေးနွေးပြီး မြန်မာ့ငလျင်ဘေးကို ကူညီဖို့ ဆုံးဖြတ်လိုက်ကြတာ ဖြစ်ပါတယ်။
ငလျင်ကြောင့် ထိခိုက်သေဆုံးမှုတွေနဲ့ အခြေခံအဆောက်အအုံတွေ ကြီးကြီးမားမားပျက်စီးဆုံးရှုံးမှုတွေက လက်ရှိ လူသားချင်းဆိုင်ရာ ဒုက္ခတွေကို ပိုမိုဆိုးဝါးစေတယ်လို့ Quad အဖွဲ့ဝင်နိုင်ငံတွေက ပြောပါတယ်။
မြန်မာငလျင် ပျက်စီးဆုံးရှုံးမှုတွေအတွက် လူသားချင်းစာနာထောက်ထားမှု အကူအညီနဲ့ သဘာ၀ဘေးအန္တရာယ် ကယ်ဆယ်ရေးလုပ်ငန်းတွေကို အထိရောက်ဆုံး ကူညီမှုသွားမယ်လို့လည်း ဆိုပါတယ်။
လူသားချင်းစာနာမှုဆိုင်ရာ ရည်ရွည်ချက်အမျိုးမျိုးနဲ့ ထောက်ပံ့မှုတွေကို ပေးအပ်သွားမှာဖြစ်ပြီး အာဆီယံအပါအဝင် ဒေသတွင်းနိုင်ငံတွေနဲ့ ချိတ်ဆက်ပူးပေါင်းဆောင်ရွက်သွားမယ်လို့ ဖော်ပြထားပါတယ်။
အဖွဲ့ဝင် ၄ နိုင်ငံအနေနဲ့ အခုအချိန်ထိ အမေရိကန်ဒေါ်လာ သန်း ၂၀ ကျော် ပမာဏရှိတဲ့ လူသားချင်းစာနာမှုဆိုင်ရာ အကူအညီတွေ ပေးဖို့ ကတိပြုခဲ့ပြီး ကယ်ဆယ်ရေးပစ္စည်းတွေကို စတင်ပေးပို့နေပြီလို့လည်း သိရပါတယ်။