စစ်အုပ်စုလက်ထဲ ငွေမရောက်စေဘဲ ငလျင်ဘေးအတွက် နောက်ထပ် ပေါင် ငါးသန်း ထောက်ပံ့မယ်လို့ ဗြိတိန်အစိုးရ ကြေညာ၊
တရုတ်ကိုကျော်ပြီး ဗြိတိန်က မြန်မာ့ငလျင်ဘေး ငွေပမာဏ အများဆုံး ထောက်ပံ့တဲ့နိုင်ငံ ဖြစ်လာ၊
ပီတာ/MFP၊ ဧပြီ – ၃
မင်းအောင်လှိုင် ဦးဆောင်တဲ့ အာဏာသိမ်း စစ်အုပ်စု လက်ထဲ ငွေတွေမရောက်စေဘဲ ငလျင်ဘေးသင့် မြန်မာ ပြည်သူတွေအတွက် နောက်ထပ် စတာလင်ပေါင် ငါးသန်း ထပ်မံ ထောက်ပံ့မယ်လို့ ဗြိတိသျှ အစိုးရ က ဒီကနေ့ ဧပြီလ ၃ရက်မှာ ထုတ်ပြန်ပါတယ်။
မြန်မာ့ငလျင်ဘေးအတွက် ဗြိတိန်အစိုးရက ကနဦးထောက်ပံ့မှုအဖြစ် စတင်လင်ပေါင် ၁၀ သန်း ထည့်ဝင်ထားပြီး အခု နောက်ထပ် ငါးသန်း ထည့်ဝင်တာကြောင့် စုစုပေါင်း ပေါင် ၁၅ သန်း (ဒေါ်လာ သန်း ၂၀ ခန့်) ရှိလာပြီး တရုတ်ယွမ် သန်း ၁၀၀ (ဒေါ်လာ ၁၄သန်းခန့်) ထောက်ပံ့ထားတဲ့ တရုတ်နိုင်ငံကို ကျော်လွန်ကာ မြန်မာ့ ငလျင်ဘေး ငွေကြေးပမာဏ အများဆုံး ထောက်ပံ့တဲ့ နိုင်ငံ ဖြစ်လာပါတယ်။
ဗြိတိန်က ထပ်မံထောက်ပံ့မယ့် ပေါင် ငါးသန်းကို Disasters Emergency Committee (ဘေးအန္တရာယ် ဆိုင်ရာ အရေးပေါ်ကော်မတီ) ရဲ့ ရန်ပုံငွေကောက်ခံခြင်း အစီအစဥ်မှာ ထည့်ဝင်မှာ ဖြစ်ပြီး အဆိုပါ ရန်ပုံငွေတွေကို “မြန်မာစစ်တပ်ထံသို့ စီးဆင်းခြင်း လုံးဝ မရှိပါ” လို့ ဗြိတိန်သံရုံးက ဖော်ပါတယ်။
အစားအစာ၊ ရေနဲ့ နေထိုင်စရာ အမိုးအကာ အစရှိတဲ့ အရေးပေါ် ပစ္စည်းတွေ အပါအဝင် ဗြိတိန်အစိုးရရဲ့ အကူအညီတွေဟာ ငလျင်ဒဏ် အပြင်းအထန်ဆုံး ခံရတဲ့ ဒေသတွေကို ရောက်ရှိနေပြီလို့လည်း ထုတ်ပြန်ချက်က ဆိုပါတယ်။
မြန်မာနိုင်ငံမှာ မတ်လ ၂၈ ရက်က လှုပ်ခတ်ခဲ့တဲ့ ငလျင်ကြောင့် သေဆုံးသူဦးရေ တစ်သောင်းကနေ တစ်သိန်းအထိ ရောက်နိုင်ပြီး ပျက်စီးဆုံးရှုံးမှု တန်ဖိုးဟာ မြန်မာနိုင်ငံရဲ့ တစ်နှစ်စာ အသားတင် ထုတ်လုပ်မှုတန်ဖိုး – GDP ကို ကျော်လွန်ပြီး ဒေါ်လာ ဘီလီယံ ၁၀၀ အထိ ရှိနိုင်တယ်လို့ အမေရိကန် ဘူမိဗေဒ စစ်တမ်း အဖွဲ့ USGS က ခန့်မှန်းဖော်ပြပါတယ်။
ငလျင်ဘေးသင့် မြန်မာပြည်သူတွေအတွက် ဧပြီလ ၃ရက်အထိ နိုင်ငံတကာ အကူအညီ ဒေါ်လာ သန်း ၈၀ နီးပါး ရရှိထားပြီး ဖြစ်ပါတယ်။