ငလျင် ဘေးသင့်နေချိန် စစ်ကိုင်းနဲ့ မန္တလေးက နေရာ ၁၀ ခု ကျော်ကိုစစ်အုပ်စုက ဗုံးကြဲ
အရပ်သားပြည်သူ ၅၀ ကျော်သေဆုံးပြီး ၊ ၄၉ ဦး ထိခိုက်ဒဏ်ရာရ
ငလျင်လှုပ်ခတ်မှုဖြစ်ပွားခဲ့တဲ့ မတ် (၂၈) ရက် ကနေ ဧပြီလ ၁ရက် အထိ လေရက်တာ ကာလအတွင်း စစ်အုပ်စုက ငလျင်ဘေးဒဏ်သင့်စစ်ကိုင်းနဲ့ မန္တလေးရှိ နေရာ ၁၁ နေရာ ကို လေကြောင်း ဗုံးကြဲ တိုက်ခိုက်ခဲ့လို့ အရပ်သားပြည်သူ ၅၀ ဦးထက် မနည်း သေဆုံးကာ ၄၉ ဦး ထိခိုက် ဒဏ်ရာ ရရှိခဲ့တယ်လို့ အမျိုးသားညီညွတ်ရေး အတိုင်ပင်ခံကောင်စီ(National Unity Consultative Council-NUCC) က ဒီကနေ့မှာ ထုတ်ပြန်ပါတယ်။
စစ်အုပ်စုဟာ အဆိုပါ လေးရက်တာ ကာလအတွင်း ငလျင်ဘေးသင့် နေရာတွေ ဖြစ်တဲ့ စစ်ကိုင်းတိုင်းချောင်းဦးမြို့နယ်၊ မန္တလေးတိုင်း စဉ့်ကူးမြို့နယ် နှစ်ခုရှိ နေရာ ပေါင်း ၁၁ နေရာကို လေကြောင်းတိုက်ခိုက်မှု ၃၂ ကြိမ် ပြုလုပ်ခဲ့တာ ဖြစ်ပြီးအရပ်သားပြည်သူ ၅၀ ကျော် သေဆုံးပြီး ၄၉ ဦး ခန့် ထိခိုက်ဒဏ်ရာ ရရှိခဲ့တယ်လို့ NUCC ရဲ့ ထုတ်ပြန်ချက်က ဆိုပါတယ်။
လေကြောင်း တိုက်ခိုက် ခံရတဲ့စစ်ကိုင်းတိုင်း ချောင်းဦးမြို့နယ်၊ မန္တလေးတိုင်း စဉ့်ကူးမြို့နယ်ဟာ ပြီးခဲ့တဲ့ မတ်လ ၂၈ ရက်မှာ လှုပ်ခတ်ခဲ့တဲ့ ငလျင်ဒဏ် ပြင်းပြင်းထန်ထန် ခံစားခဲ့ရတဲ့နေရာတွေ ဖြစ်ပြီး တော်လှန်ရေးအင်အားစုတွေက စစ်အုပ်စု တပ်တွေနဲ့ တိုက်ပွဲ ရပ်နားထားချိန် ဗုံးကြဲ သတ်ဖြတ်ခဲ့တာ ဖြစ်တယ်လို့ဆိုပါတယ်။
“ငလျင်ကြောင့် ယခုအချိန်အထိ လူပေါင်း ၄၂၀၀ ကျော် သေဆုံးပြီး ဒဏ်ရာရနေသူ၊ ပျောက်ဆုံးနေသူများလည်း အဆမတန်များပြား လျက်ရှိသကဲ့သို့ အိမ်ထောင်စုပေါင်း သောင်းချီ အိုးအိမ်မဲ့ဖြစ်ခဲ့ရပါသည်။ မတ်လ ၂၈ ရက်နေ့မှ ဧပြီလ ၁ ရက်နေ့အထိ လေးရက်တာ ကာလအတွင်း စစ်ကောင်စီက ငလျင်ဘေးပြင်းထန်စွာခံထားရသော စစ်ကိုင်းတိုင်း ချောင်းဦးမြို့နယ်၊ မန္တလေးတိုင်း စဉ့်ကူးမြို့နယ် အပါအဝင် နေရာပေါင်း ၁၁ နေရာကို လေကြောင်းတိုက်ခိုက်မှု ၃၂ ကြိမ်အထိ တိုက်ခိုက်ခဲ့ပြီး ယင်းတိုက်ခိုက်မှုကြောင့် အရပ်သားပြည်သူ ၅၀ ဦးထက်မနည်း သေဆုံးပြီး ၄၉ ဦး ခန့် ထိခိုက်ဒဏ်ရာရရှိခဲ့ပါသည်”လို့ ထုတ်ပြန်ချက်မှာ ဖော်ပြပါတယ်။
အခုလို စစ်အုပ်စု လေကြောင်းတိုက်ခိုက် တာဟာ ပြည်သူတွေ ငလျင်ဘေး သင့်နေချိန် တိုက်ခိုက် တဲ့ အကြမ်းဖက် လုပ်ရပ်ဖြစ်ပြီး တော့ အမြန်ဆုံး ရပ်တန့်ဖို့ လိုတယ်လို့ NUCC ကတိုက်တွန်းထားပါတယ်။
တိုင်းရင်းသား လက်နက်ကိုင်တပ်ဖွဲ့တွေ ဖြစ်တဲ့ ကိုးကန့်တပ်မတော်(MNDAA)၊ တအာင်း တပ်မတော်(TNLA)၊ ရက္ခိုင့်တပ်တော်(AA) ညီနောင်မဟာမိတ်သုံးဖွဲ့ ကတော့ ငလျင်နောက်ဆက်တွဲ ကယ်ဆယ်ရေးလုပ်ငန်းတွေအမြန်ဆုံးထိရောက်စွာဆောင်ရွက်နိုင်ဖို့ တိုက်ပွဲဖြစ်ပွားနေတဲ့ နေရာတွေမှာ ထိုးစစ်တွေကို မလုပ်တော့ဘဲ တစ်လတိတိ တစ်ဖက်သတ်အပစ်ရပ်မှာ ဖြစ်တယ်လို့ ဧပြီလ ၁ ရက် မှာ ထုတ်ပြန်ထားပါတယ်။
“ညီနောင်မဟာမိတ်များ နှင့် စစ်ကောင်စီတို့ တိုက်ပွဲဖြစ်ပွားလျက်ရှိသော နေရာများတွင် မိမိကိုယ်မိမိ ခုခံကာ ကွယ်သည့် တုံ့ပြန်မှုမျိုးမှလွဲ၍ မိမိတို့ဘက်မှ စတင်ထိုးစစ်ဆင်တိုက်ခိုက်မှု ပြုလုပ်မည်မဟုတ်ဘဲ ဧပြီလ ၁ ရက်နေ့မှ ၃၀ ရက်နေ့အထိ တစ်လတာ တစ်ဖက်သတ် အပစ်အခတ်ရပ်စဲကြောင်း ထုတ်ပြန်ကြေညာအပ်ပါသည် ” လို့ ထုတ်ပြန်ချက်က ဆိုပါတယ်။
အလားတူ အမျိုးသား ညီညွတ်ရေးအစိုးရ – NUG က မတ်လ ၃၀ရက်က စတင်ကာ နိုင်ငံတဝန်း နှစ်ပါတ်ကြာ ထိုးစစ်ဆင် တိုက်ခိုက်မှုတွေ ရပ်နားထားမှာ ဖြစ်ပြီး တော့လုံခြုံရေး အာမခံချက်ရှိပါက CDM ကျွမ်းကျင်ဝန်ထမ်းတွေက နိုင်ငံတကာ ကူညီကယ်ဆယ်ရေး အဖွဲ့အစည်းတွေနဲ့ ပူပေါင်းကာ စစ်အုပ်စု ထိန်းချုပ်ထားတဲ့ မြို့ကြီးတွေရှိ ငလျင်ဒဏ်သင့် ပြည်သူတွေကို ကူညီကယ်ဆယ်ရေး ဆောင်ရွက် ပေးမယ်လို့ ထုတ်ပြန်ထားပါတယ်။ ဒီလို ရပ်တန့်ရတာနဲ့ပတ်သက်ပြီး အမျိုးသားညီညွတ်ရေး အစိုးရ (NUG) ပြည်ထောင်စုဝန်ကြီးချုပ်ရုံး ပြောရေးဆိုခွင့်ရှိသူ ဦးနေဘုန်းလတ်က “ကျနော်တို့ ထိုးစစ်ကို နှစ်ပတ်ရပ်မယ်ပေါ့နော်၊ နေရာတွေကတော့ လက်ရှိ ငလျင်ဒဏ် သင့်တဲ့ နေရာဒေသတွေပေါ့။ အဲဒီမှာ ရှိနေတဲ့ တိုင်းတွေ၊ ခရိုင်တွေ၊ အဓိကကတော့ ငလျင်ဒဏ် ခံနေရတဲ့ ပြည်သူ လူထုကို ကူညီကယ်ဆယ်ရေး ကိစ္စတွေကို ထိထိရောက်ရောက် ဆောင်ရွက်နိုင်ဖို့ အဓိက ရည်ရွယ်ပါတယ်ဗျ။ ဒါပေမယ့် တဖက်မှာကျတော့ အကြမ်းဖက် စစ်အုပ်စုက ငလျင်ဒဏ် ဖြစ်နေတာတောင်မှ လေယာဉ်နဲ့ ဗုံးကြဲတာတွေ၊ ပါရာမော်တာနဲ့ ဗုံးကြဲတာတွေ လုပ်နေတာဖြစ်လို့ သူ့ဘက်ကလည်း ထိုးစစ်တွေ ပြန်ဆင်တာ ဖြစ်နိုင်ခြေရှိတယ်။ အဲဒီအတွက် ကျနော်တို့က ဒီလိုမျိုး သူတို့ ဘက်က လုပ်လာရင်တော့ ကျနော်တို့ဘက်က ပြန်လည် ခုခံရမယ့် အခြေအနေ တစ်ခုတော့ ရှိတယ်။ အဲဒီ အခြေအနေက လွဲလို့ ထိုးစစ်ဆင်တာကို နှစ်ပတ်ရပ်နားထားမှာ ဖြစ်ပါတယ် “ လို့ MFP ကို ပြောပါတယ်။
စစ်အုပ်စုခေါင်းဆောင် ကတော့ တိုင်းရင်းသားလက်နက်ကိုင်အဖွဲ့တချို့အနေနဲ့ လက်ရှိမှာတိုက်ပွဲဖော်ဆောင်နေတာမရှိပေမဲ့ စုဖွဲ့လေ့ကျင့် ပြင်ဆင်တာတွေလုပ်နေတာကို သိရှိရပြီးတော့ ဒါဟာ တိုက်ခိုက်တာ ဖြစ်တာ ကြောင့် စစ်ဆက်တိုက် သွားမယ်လို့ ဧပြီ ၁ ရက်ကနေပြည်တော်မှာပြုလုပ်တဲ့ ငလျင်ဘေးဒဏ်သင့်ပြည်သူ အလှူငွေပေးအပ်ပွဲအခမ်းအနားမှာ ထုတ်ဖော်ပြောဆိုထားပါတယ်။
ဒါ့အပြင်နှစ်ပတ်တာအပစ်ရပ်မယ်လို့ ကြေညာထားတဲ့ အမျိုးသားညီညွတ်ရေးအစိုးရ (NUG) နဲ့ ပတ်သက်ပြီး နိုင်ငံရေးလမ်းစဉ်ကို မရွေးချယ်ထားတာကြောင့်စစ်အုပ်စု အနေနဲ့ ချမှတ်ထားတဲ့ လုပ်ငန်းစဉ်အတိုင်း ဆက် လုပ်သွားမယ်လို့စစ်အုပ်စုခေါင်းဆောင် ကပြောဆိုထားပါတယ်။
လက်ရှိမှာတော့ ငလျင်ကြောင့် စစ်ကိုင်း၊ မန္တလေး၊ ပဲခူး ၊ နေပြည်တော်၊ ရှမ်းပြည်နယ် အပါအဝင် မြန်မာနိုင်ငံအတွင်းမှာ ရှိတဲ့ နေရာဒေသ အများအပြားမှာ ပြည်သူလူထု အသက်အိုးအိမ် စည်းစိမ်၊ အိမ်မွေးတိရစ္ဆာန်၊ လူနေအိမ်၊ တိုက်တာ အဆောက် အအုံတွေ၊ စာသင်ကျောင်းတွေ ဆေးရုံ၊ ကျေးလက်ဆေးပေးခန်းတွေ၊ ဘုရားကျောင်းကန် စေတီပုထိုး တွေ၊ ဗလီတွေ အပါအဝင် သာသနိကအဆောက်အအုံတွေ၊ တန်ဖိုးမဖြတ်နိုင်တဲ့ ရှေးဟောင်းယဉ်ကျေးမှုအမွေအနှစ် မြောက်မြားစွာ ပျက်စီးဆုံးရှုံးခဲ့ပါတယ်။