နေပြည်တော်တွင် ငလျင်လှုပ်ချိန် မင်းအောင်လှိုင် စားပွဲ တစ်ခြမ်းတွင် နေရာယူခဲ့ရသည့်အပြင် ၁ နာရီကျော် အပြင်ထွက်မတ်တပ်ရပ်နေခဲ့ရဟု ထုတ်ဖော်ပြောဆို (ရုပ်/သံ)
ရန်ကုန်၊ ဧပြီ ၂
အကြမ်းဖက် စစ်ခေါင်းဆောင် မင်းအောင်လှိုင်က နေပြည်တော်တွင် မတ်လ ၂၈ ရက်နေ့ ငလျင်လှုပ်ချိန် စားပွဲ တစ်ခြမ်းတွင် နေရာယူခဲ့ရပြီး အပြင်ထွက်၍ ၁ နာရီကျော် မတ်တပ်ရပ်နေခဲ့ရကြောင်း ထုတ်ဖော်ပြောဆိုသည်။
ယမန်နေ့ နေပြည်တော်တွင် ပြုလုပ်ခဲ့သော ငလျင်ကူညီရေး အလှူငွေ ပေးအပ်ပွဲ အခမ်းအနားတွင် ၎င်းက အထက်ပါအတိုင်း ပြောဆိုခဲ့ခြင်းဖြစ်သည်။
“၂၈ ရက်နေ့ ငလျင်လှုပ်တဲ့အချိန်ကျတော့ ကျနော်က ရုံးမှာ စာတွေ ဖတ်နေတဲ့အချိန်ဖြစ်ပါတယ်။ စလှုပ်တဲ့အချိန်မှာ ချက်ချင်း သတိရတာနဲ့ နာရီကောက်ကြည့်လိုက်တော့ ၁၂ နာရီ ၅၁ မိနစ်ပေါ့လေ။ မော့ကြည့်လိုက်ချိန်မှာ။ တဖြည်းဖြည်းနဲ့ပိုလှုပ်လာချိန်မှာ ကျနော်လည်း လုံခြုံမှုရအောင် စားပွဲမှာ တစ်ခြမ်းတော့ နေရာယူထားရတာပေါ့။ ငြိမ်သွားတဲ့အခါမှ ကျနော်တို့လည်း အပြင်ထွက်ကြည့်တော့ ကျနော်တို့ရုံးတွေကတော့ သိပ်တော့ အပျက်အစီးသိပ်မများပါဘူး။ သို့သော်လည်း Aftershock ရှိတဲ့အခါကျတော့ ကျနော်ရဲ့ လုံခြုံရေးအဖွဲ့တွေက ကျနော့်ကို အပြင်မှာ နေဖို့ အကြံပြုတဲ့အတွက်ကြောင့် ကျနော်လည်း တစ်နာရီကျော်လောက် ထွက်ပြီး မတ်တပ်ရပ်ပြီး နေပါသေးတယ်” ဟု မင်းအောင်လှိုင်က ဆိုသည်။
အကြမ်းဖက် စစ်ခေါင်းဆောင် မင်းအောင်လှိုင်က လက်ရှိ ပျက်စီးနေသော ရထားလမ်းများကို ဧပြီလ ပထမအပတ်အတွင်း နောက်ကျအဆုံး ဖွင့်လှစ်ရန်၊ တံတားဦးလေယာဉ်ကွင်းကိုလည်း လာမည့် တစ်ပတ်အတွင်း လေယာဉ် ဆင်းနိုင်ရေး ဆောင်ရွက်ရန် ပြောဆိုထားသည်။