တိုင်းပြည်တည်ငြိမ်ရေးကို ဦးစားပေး လုပ်ဆောင်နေသည်ဟု မင်းအောင်လှိုင် ပြော
မတ်၂၇၊ ၂၀၂၅
တိုင်းပြည်တည်ငြိမ်ရေးကိုသာ ဦးစားပေးဆောင်ရွက်နေတယ်လို့ အာဏာသိမ်း စစ်ခေါင်းဆောင် မင်းအောင်လှိုင်က ပြောကြားလိုက်ပါတယ်။
မင်းအောင်လှိုင်ဟာ မနေ့က မတ် ၂၆ ရက် မနက်ပိုင်းမှာ နှစ်(၈၀)ပြည့် တပ်မတော်နေ့ စစ်ရေးပြအခမ်းအနား တက်ရောက်ဖို့ နေပြည်တော်ကိုရောက်ရှိနေတဲ့ အငြိမ်းစားတပ်မတော်အရာရှိတွေနဲ့ တွေ့ဆုံစဉ် ပြောကြားလိုက်တာပါ။
တပ်မတော်ရဲ့ အစဉ်အလာကောင်းတွေကို ဆက်လက်ထိန်းသိမ်းဆောင်ရွက်နေပြီး စွမ်းရည်စွမ်းပကား မြင့်မားစေရေးအတွက် မြှင့်တင်ဆောင်ရွက်လျက်ရှိတယ်လို့ မင်းအောင်လှိုင်က ပြောပါတယ်။
နိုင်ငံတဝန်း ပြင်းထန်တဲ့ ထိုးစစ်တွေ၊ လေကြောင်းတိုက်ခိုက်မှုတွေ လုပ်ဆောင်နေတဲ့ စစ်ခေါင်းဆောင် မင်းအောင်လှိုင်က တိုင်းပြည်ကို တည်ငြိမ်အောင် ထိန်းသိမ်းထားတယ်လို့လည်း ဝါဒဖြန့် ပြောဆိုပါတယ်။
ဆိုးရွားတဲ့ စစ်ရာဇတ်မှုတွေကြောင့် နိုင်ငံတကာကနေ ဖမ်းဝရမ်းထုတ်ခံထားရတဲ့ မင်းအောင်လှိုင်က နှစ်ကုန်ပိုင်းမှာ ရွေးကောက်ပွဲကျင်းပမယ်လို့လည်း ထပ်လောင်းပြောကြားခဲ့ပါသေးတယ်။
