စစ်ကောင်စီရဲ့ နောင်ချိုကိုဦးတည်လာတဲ့ ဝါဒဖြန့်ချီရေးထိုးစစ်
■စစ်တပ်ရောက်နေတဲ့ မဲပုတ်ရွာတိမ်ပင်လယ်နဲ့ နောင်ချိုက လူသိများတဲ့ နောင်ချိုကြီးရွာတိမ်ပင်လယ်ဟာမတူပဲ (၈)မိုင်ကျော် ကွာဝေးပါတယ်
ဒီဒီး/People’s Spring
စစ်တက္ကသိုလ်တွေရှိရာ ပြင်ဦးလွင်နဲ့အနီးဆုံးမြို့ဖြစ်သလို ၁၀၂၇ စစ်ဆင်ရေး ဒုတိယလှိုင်းမှာ တော်လှန်ရေးတပ်တွေ ပထမဆုံးသိမ်းပိုက်ခဲ့တဲ့ နောင်ချိုမြို့နဲ့ တောင်းခမ်းက စစ်ရေးသတင်းတွေဟာ ဒီရက်ပိုင်းအတွင်း လူပြောအများဆုံး အကြောင်းအရာတွေထဲကတစ်ခုဖြစ်နေပါတယ်။
တောင်းခမ်းရဲ့တိုက်ပွဲအကြောင်းကိုပြောရင် စစ်ကောင်စီရဲ့ ဝါဒဖြန့်တယ်လီဂရန်ချန်နယ်တွေမှာ ပြီးခဲ့တဲ့လပိုင်းတွေကတည်းက အောင်ပွဲတွေရနေတဲ့အကြောင်း မစားရ ဝခမန်း ဆက်တိုက်ဝါဒဖြန့်ခဲ့ကြပါတယ်။ စစ်တပ်ဒရုန်းတွေကြောင့် တော်လှန်ရေးတပ်တွေ ဘယ်လိုအထိနာတာ ၊စခန်းတွေဘယ်လိုသိမ်းတာ စသဖြင့် မျိုးစုံဝါဒဖြန့်ခဲ့ကြပါတယ်။မတ်လဆန်းမှာတော့ တောင်းခမ်းဒေသက တပ်ရင်းနှစ်ခု အပြောင်းလုပ်တာကို တောင်းခမ်းတိုက်ပွဲမှာအောင်ပွဲရပြီး ပြန်လာတဲ့ရဲဘော်တွေဆိုပြီး ကြိုဆိုခဲ့ပုံတွေနဲ့ အများကြီးနဲ့ဝါဒဖြန့်ခဲ့ကြပါတယ်။
အဖြစ်မှန်ကို သေချာစုံစမ်းကြည့်တဲ့အခါမှာတော့ တောင်းခမ်းက အမြောက်စခန်းကွပ်ကဲမှုဌာနချုပ် (မစခ-၉၀၂)နဲ့ အမတ(၃၅၄)က တပ်ရင်းနှစ်ရင်းဟာ အပြောင်းအလဲမလုပ်ရတာ နှစ်အတော်ကြာနေပြီမို့ ရှမ်းတောင်က တပ်ရင်းနှစ်ရင်းနဲ့ အပြောင်းအလဲလုပ်တာပါ။ ပြန်ခွင့်ရတဲ့ တပ်ရင်း ၂ ရင်းဟာလည်း သေဆုံးဒဏ်ရာရသူများပြားပြီး ဖွဲ့စည်းပုံပါ ပျက်နေပြီဖြစ်ပေမယ့် တပ်ရင်းကိုပြန်ရောက်တဲ့အခါ အောင်ပွဲရ ရဲဘော်တွေဆိုပြီး ပန်းတွေနဲ့ကြိုပြီးဝါဒဖြန့်ခဲ့ကြတာပါ။
စစ်ကောင်စီဝါဒဖြန့် တယ်လီဂရန်ချန်နယ်တွေ၊ ဖေစ်ဘွတ်ခ်အကောင့်တွေဟာ မတ်လ ၂၅ရက်မှာလည်း နောင်ချိုမြို့နားတိမ်ပင်လည်ကိုပြန်ရပြီလို့ အကြီးအကျယ်ဝါဒဖြန့်နေကြပြန်ပါတယ်။တောင်းခမ်းရွာနဲ့ (၇)မိုင်ဝေးတဲ့ မဲပုတ်ရွာက TNLAပူးပေါင်းတပ်တွေ တပ်စွဲခဲ့တဲ့ တိမ်ပင်လယ်ကြည့်ရှု့တဲ့ နေရာကို စစ်ကောင်စီတပ်ကTNLAက သိမ်းပိုက်နိုင်တာကို နောင်ချိုမြို့နားက တိမ်ပင်လယ်ကို ရသလို ဝါဒဖြန့်ခဲ့ကြတာပါ။
စစ်ကောင်စီ ဝါဒဖြန့် တယ်လီဂရန်တွေက ဘယ်လိုဝါဒဖြန့်ကြလဲ ဆိုတော့(မူးရင်းအသုံးအနှုန်းအတိုင်း) “တိမ်ပင်လယ်စခန်းအား သိမ်းပိုက်ရရှိ (နောင်ချို) မတ် ၂၅ ရက် (ယနေ့) မွန်းလွဲပိုင်းအချိန်မှာတော့ နေဝန်းနီသူရဲကောင်းများဟာ နောင်ချိုမြို့အနီးရှိ အကြမ်းဖက် TNLA စခန်း ရွှေဧရာတိမ်ပင်လယ်စခန်း အား ရဲဝံ့စွန့်စားစွာ တိုက်ခိုက်သိမ်းပိုက် ရရှိခဲ့ပါတယ်။ အမြတ်ထုတ် အောင်မြေချဲ့နေဆဲဖြစ်တဲ့အတွက် ဖော်ပြလို့ရတဲ့ ပုံလေးတွေ တင်ပေးလိုက်ပါတယ်”လို့ရေးသားခဲ့ကြပါတယ် ။အဲဒီစာနဲ့ အတူ မဲပုတ်ရွာနားကတိမ်ပင်လယ်မှာ စစ်သားတွေအောင်ပွဲခံနေတဲ့ ရုပ်သံနဲ့ ဓါတ်ပုံတွေကို တင်ထားကြပါတယ် ။
မဲပုတ်ရွာဟာ နောင်ချိုမြို့နဲ့ မိုင်(၂၀)ခန့် ကွာဝေးပါတယ်။ဒါကို စစ်တပ်ဝါဒဖြန့်သူတွေက နောင်ချိုမြို့နားက တိမ်ပင်လယ်လို့ လိမ်လည်ရေးသားခဲ့ကြတာပါ။ မဲပုတ်ရွာဟာ နောင်ချို – တောင်းခမ်းလမ်းပိုင်းရဲ့ အရှေ့ဘက်မှာရှိတာပါ။ အဲဒီနေရာက ကိုဗစ်ကပ်ရောဂါ မတိုင်ခင်က တိမ်ပင်လယ်ကြည့်ရှု့ဖို့ ဒေသ ခရီးသွားစီးပွားရေးလုပ်တဲ့သူတွေ လုပ်ထားတဲ့ နေရာပါ။
နောင်ချိုမှာ တိမ်ပင်လယ်လို့ပြောလိုက်ရင် ပြည်သူအများစုသိတာက နောင်ချိုမြို့တောင်ဘက်နားက ကံကြီးကျေးရွာ အရှေ့ဘက် နောင်ချိုကြီးရွာနားက တိမ်ပင်လယ်ကိုပဲအဓိကသိကြတာဖြစ်ပါတယ်။ အဲဒီ တိမ်ပင်လယ်ဟာ နောင်ချိုမြို့ခံတွေအပြင် ရပ်ဝေးက ပြည်သူတွေပါ လာရောက် ညအိပ်ခဲ့ကြတဲ့ နေရာဖြစ်ပါတယ်။
အခု စစ်တပ်သိမ်းတယ်ဆိုတဲ့ တောင်းခမ်းနဲ့နီးတဲ့ မဲပုတ်ရွာနားက ရွှေဧရာတိမ်ပင်လယ်တောင်ဟာ ဒေသခံတွေရော ရပ်ဝေးက ပြည်သူတွေပါ သွားလေ့ရှိတဲ့ တိမ်ပင်လယ် မဟုတ်ပါဘူး။
မဲပုတ်ရွာနဲ့ နောင်ချိုမှာ လူသိများတဲ့ တိမ်ပင်လယ်ရှိတဲ့ နောင်ချိုကြီးရွာဟာ (၈)မိုင်ကျော်ကွာ ဝေးပါတယ်။
စစ်တပ်ဝါဒဖြန့်သူတွေက နောင်ချိုမြို့အနီးက တိမ်ပင်လယ်စခန်းရပြီလို့ အောင်ပွဲခံပုံတွေနဲ့ဝါဒဖြန့်လိုက်တဲ့အခါ နောင်ချိုမြို့ဒေသခံတွေပါ ထိတ်လန့်ကုန်ပါတယ်။ နောင်ချိုမြို့နဲ့ နီးတဲ့ ကံကြီးရွာအရှေ့ဘက်က တိမ်ပင်လယ်ရသွားတာများလား၊ အဲဒီနေရာသာဆိုရင် စစ်ကောင်စီတပ်တွေ နောင်ချိုမြို့နဲ့ နီးလာပြီဆိုပြီး စိုးရိမ်ကြတာပါ။
တကယ်က စစ်တပ်ဟာ တောင်းခမ်းနဲ့ (၇)မိုင်ပဲဝေးတဲ့ မဲပုတ်ရွာအထိပဲ ရောက်နေတာဖြစ်ပါတယ် ။ စစ်တပ်လှုပ်ရှားနိုင်သေးတာဟာ တောင်းခမ်းဒေသနားက မဲပုတ်ဆိုတဲ့ရွာနားက တိမ်ပင်လယ်စခန်းသာဖြစ်ပြီး မြို့နဲ့ ဝေးနေဆဲဖြစ်ပါတယ်။
“စကစက ပုံနဲ့ ထုတ်တော့အကုန်လန့်ကုန်တာ”လို့ နောင်ချိုမြို့ခံ အမျိုးသမီးတစ်ဦးက ပြောပါတယ်။ ဒါပေမယ့် စိတ်အေးရတဲ့ အခြေအနေ မဟုတ်သေးဘူးလို့လည်း အဲဒီအမျိုးသမီးက ဆက်ပြောပါတယ်။ ဒေသခံမဟုတ်တဲ့ ပြည်သူအများစုကတော့ တိမ်ပင်လယ်လို့ပြောတဲ့နေရာ ဘယ်နှစ်ခုရှိမှန်းမသိတာမို့ စစ်တပ်က နောင်ချိုနားတကယ်ရောက်သွားပြီလားလို့ ထင်စေပါတယ် ။
ဒါအပြင် စစ်ကောင်စီဝါဒဖြန့်တယ်လီဂရန်တွေကနေပဲ နောင်ချိုကို စစ်တပ်ကမကြာခင်ထိုးစစ်ဆင်မှာမို့ TNLA နဲ့ PDF ကို နေဝန်းနီးစစ်ကြောင်းမှူးကသတိပေးတယ်ဆိုတဲ့ စာတစ်စောင်ကိုလည်းမတ် ၂၆ ရက်မှာအချိန်ကိုက်ဖြန့်ဝေပါတယ် ။ နောင်ချိုကဒေသခံတွေရော ၊ပြည်သူအများစုပါ စိုးရိမ်စိတ်ပိုသွားစေခဲ့ပါတယ် ။
တောင်းခမ်းဒေသမှာ စစ်ကောင်စီတပ်တွေ အသာရလာတာ၊ တော်လှန်ရေးတပ်တွေက အမြောက်တပ်ရင်းတွေကို ပိတ်ဆို့ထားရာကနေ ဆုတ်ခွာပေးလာရတာ ၊ နောင်ချိုမြို့နဲ့ဝေးသေးပေမယ့် မြို့ဘက်လာရာ လမ်းပိုင်းက မဲပုတ်ရွာကို စစ်ကောင်စီတပ်တွေ ရောက်လာတာတွေက စိတ်ပူနေရတဲ့ အခြေအနေတော့ဖြစ်လာတယ်လို့ သူမက ပြောပါတယ်။
“နောင်ချိုက အခုလည်း ဘာမှမကျန်တော့ဘူး။ နောင်ချိုသာပါရင် ဒေသခံတွေတော့ သွားပြီ”လို့ သူမက စိုးရိမ်စွာပြောပါတယ်။
လက်တလောမှာ နောင်ချိုရဲ့ စစ်ရေးအခြေအနေကို အားမရဘူးလို့လည်း နောင်ချိုမြို့ခံ အသက် ၄၅နှစ်အရွယ် အမျိုးသားတစ်ဦးက ပြောပါတယ်။
” အရင် ဒီလို မဟုတ်ဘူး”လိုလည်း သူက ဆက်ပြောပါတယ်။
အာဏာသိမ်းခေါင်းဆောင် ဗိုလ်ချုပ်မှူးကြီးမင်းအောင်လှိုင် တရုတ်ပြည်ခရီးစဉ်က ပြန်ရောက်အပြီးမှာ တောင်းခမ်းဒေသကို စစ်ကောင်စီက အင်အားသုံး ထိုးစစ်ဆင်လာတာလို့ နောင်ချိုမြို့ခံ အမျိုးသားက သုံးသပ်ပါတယ်။မင်းအောင်လှိုင်ဟာ တရုတ်ပြည်ခရီးစဉ်ကို ၂၀၂၄ နိုဝင်ဘာ ပထမအပတ်က သွားရောက်ခဲ့တာဖြစ်ပါတယ်။
အဲဒီနောက်ပိုင်းမှာ နောင်ချိုမြို့ကို လေကြောင်းတိုက်ခိုက်တာတွေလည်း ပိုလုပ်လာတယ်လို့ သူက ပြောပါတယ်။
ဒါပေမယ့်အမြောက်တပ်များရှိတဲ့ တောင်းခမ်းကျေးရွာမှာ တော်လှန်ရေးပူးပေါင်းတပ်တွေဟာ ဆုတ်ခွာပေးရမျိုးမရှိသေးဘဲ ဝိုင်းဝန်းပိတ်ဆို့ ထားဆဲပဲလို့ မြေပြင်ရှိ တော်လှန်ရေးရဲဘော်တစ်ဦးက မတ်လ ၁၅ရက်မှာ လူထုနွေဦးကို ပြောထားပါတယ်။
တောင်းခမ်းဒေသစစ်ရေးအခြေအနေနဲ့ပတ်သက်လို့ စိတ်မပူကြဖို့လည်း တောင်းခမ်းဒေသစစ်
မြေပြင်က တော်လှန်ရေးရဲဘော်တစ်ဦးက မတ်လလယ်မှာ ပြောပါတယ်။
” သူတို့ဝါဒဖြန့်တိုင်း ကျွန်တော်တို့က ယုံလို့မရဘူးလေ။ကျွန်တော်တို့ မြေပြင်မှာ လုပ်ဆောင်နေတာဆိုတော့ ကျွန်တော်တို့ အသိဆုံးဖြစ်တယ်။အဲဒါကြောင့် ပြည်သူလူထုအနေနဲ့လည်း အရမ်းကြီးစိုးရိမ်စိတ်မကြီးကြနဲ့။ အဓိကတော့ သူတို့တောင်းခမ်းမှာ ပိတ်မိနေတာ ၇ လ ၈ လရှိပြီ။ အခုမှ သူတို့လူချိန်းရတဲ့ အပေါ်မှာ တခြားလူတွေ သူတို့အောက်လက်ငယ်သားတွေ တောင်းခမ်းကိုမသွားရဲမှာစိုးလို့ဆိုတဲ့ဟာမျိုးတွေနဲ့ ဝါဒဖြန့်တာပဲ ဖြစ်တယ်။ဝါဒဖြန့်မှုကြီးကြီးမားမားလုပ်တယ်လို့ပဲမြင်တယ်။အဲဒါကြောင့် ပြည်သူလူထုအနေနဲ့လည်း အရမ်းကြီး နားတွေမယုံကြဖို့ပြောချင်တယ်။ အရမ်းကြီးတော့ ထူးခြားမှု အများကြီးတော့မရှိသေးဘူး”လို့ သူက မတ်လ၁၅ ရက်ထိအခြေအနေကိုပြောပါတယ်။
နောင်ချိုမြို့ကို သိမ်းပြီးနောက် မြို့နဲ့မိုင်(၂၀)ခန့်ဝေးတဲ့ စစ်ကောင်စီရဲ့ အမြောက်စခန်းကွပ်ကဲမှုဌာနချုပ်အပါအဝင် အမြောက်တပ်ရင်း လေးခုအထိရှိနေတဲ့ တောင်းခမ်းဒေသတိုက်ပွဲဟာ ရှစ်လဝန်းကျင်ကြာမြင့်လာပြီ ဖြစ်ပါတယ်။
အမြောက်တပ်တွေရှိတဲ့ တောင်းခမ်းဒေသကို တော်လှန်ရေးပူးပေါင်းတပ်တွေက ၂၀၂၄ ဇူလိုင်လကုန်ပိုင်းကတည်းက ထိုးစစ်ဆင်တိုက်ခိုက်ခဲ့တာဖြစ်ပါတယ်။
ရှစ်လတိုင် နေ့စဉ်ရက်ဆက်တိုက်ပွဲတွေပြင်းထန်ခဲ့ပြီး အစောပိုင်းမှာတော့ တောင်းခမ်းဒေသက အမတ(၄၀၆)နဲ့ အမတ(၂၀၆) အမြောက်တပ်ရင်းနှစ်ခုကို ၂၀၂၄ သြဂုတ် ၂၈ရက်မှာ TNLA နဲ့ပူးပေါင်းတပ်တွေကသိမ်းပိုက်နိုင်ခဲ့တယ်လို့ TNLAက ထုတ်ပြန်ပါတယ်။ အဲဒီနောက် ကျန်တပ်စခန်း နှစ်ခုကို ဆက်လက်ထိုးစစ်ဆင်ခဲ့ပါတယ်။
နောင်ချိုမြို့တောင်ဘက် ဒုဋ္ဌဝတီမြစ်ကူးတံတား အနောက်ဘက်မှာရှိတဲ့ တောင်းခမ်းကျေးရွာမှာ အမြောက်စခန်းကွပ်ကဲမှုဌာနချုပ် (မစခ-၉၀၂) နဲ့ သူရဲ့လက်အောက်ခံ အမြောက်တပ်ရင်း သုံးရင်းဖြစ်တဲ့ အမတ(၃၅၄)၊ အမတ (၂၀၆)၊ အမတ(၄၀၆)တို့ ရှိတာပါ။
အဲဒီထဲက အမြောက်တပ်ရင်းနှစ်ခုကိုသိမ်းပိုက်ပြီး ကျန်း တပ်ရင်း ၂ ခုကိုပိတ်ဆို့ထားတဲ့အခြေအနေကနေ ဒီနှစ်ဆန်းပိုင်းမှာပိတ်ဆို့ထားတာတွေကို တော်လှန်ရေးတပ်တွေက ပြန်ဖွင့်ပေးလိုက်ရပါတယ်။ ဒါပေမယ့် သြဂုတ်လကုန်ပိုင်းကတည်းကသိမ်းထားတဲ့ အမတ(၄၀၆)နဲ့ အမတ(၂၀၆)တို့ကို လက်ရှိအခြေအနေကိုတော့ မသိရသေးပါဘူး။
နောင်ချိုနဲ့ တောင်းခမ်းဒေသတိုက်ပွဲ နောက်ဆုံးအခြေအနေတွေနဲ့ပတ်သက်လို့ TNLAကို People’s Spring က အကြိမ်ကြိမ်ဆက်သွယ်မေးမြန်းပေခဲ့ပေမယ့် ပြန်လည်ဖြေကြားခြင်းမရှိသေးပါဘူး။
စစ်ကောင်စီဟာ နောင်ချိုမြို့ကို လမ်းကြောင်းနှစ်ခုကနေ စစ်ကြောင်းထိုးနေပါတယ်။ တောင်းခမ်း – ရပ်စောက်လမ်းပိုင်းကနေစစ်ကြောင်းထိုး အင်အားပို့နေသလို ၊ နောင်ချို – ပြင်ဦးလွင်လမ်းပိုင်းကနေ စစ်ကြောင်းထိုးနေတာပါ။
ပြင်ဦးလွင်မြို့နယ်အစပ် နောင်ချိုမြို့နယ် အုမ္မသီးနှင့်ဂန့်ဂေါရွာမှာလည်းစစ်ကောင်စီတပ်တွေရောက်လာတဲ့အတွက် အဲဒီကျေးရွာတွေအနီးမှာလည်း တိုက်ပွဲများဆက်ဖြစ်နေပါတယ်။
ပြင်ဦးလွင်မြို့နယ် ဝက်ဝံကျေးရွာမှာ အထိုင်ချတပ်စွဲထားတဲ့ စစ်ကောင်စီတပ်တွေကတော့ တအာင်းတပ်မတော်(TNLA) နဲ့ ပူးပေါင်းတပ်တွေ သိမ်းပိုက်ထားတဲ့ နောင်ချိုမြို့နယ်အတွင်းကို ၂၀၂၄ အောက်တိုဘာ ၂၂ရက်ကတည်းကစတင် စစ်ကြောင်းထိုးဝင်ရောက်ဖို့ကြိုးစားနေတာပါ။ အဲဒီနောက် TNLA ဦးဆောင်တဲ့ တော်လှန်ရေးတပ်တွေ ရှိနေတဲ့ ဂန့်ဂေါရွာကို ရောက်ရှိလာပြီး တိုက်ပွဲတွေ စတင်ဖြစ်နေပါတယ်။
နောင်ချိုမြို့ဟာ ၂၀၁၇ လူဦးရေစာရင်းအရ မြို့ပေါ်မှာ ပြည်သူ ၁၈,၀၀၀ ကျော် နေထိုင်ပြီးကျေးလက်မှာ လူဦးရေ ၁၂၀,၀၀၀ကျော်နေထိုင်ပါတယ်။
မြောက်ဘက်မှာ မိုးကုတ်မြို့နယ်နဲ့ သပိတ်ကျင်းမြို့နယ်၊အရှေ့ဘက်မှာကျောက်မဲမြို့နယ် ၊ တောင်ဘက်မှာ ရပ်စောက်မြို့နယ်နဲ့ အနောက်ဘက်မှာ ပြင်ဦးလွင်မြို့တို့ တည်ရှိပါတယ်။
၁၀၂၇ စစ်ဆင်ရေး အပိုင်း(၂)ကို ဇွန်လ ၂၅ရက်က စတင်ခဲ့တာဖြစ်ပြီး အဲဒီနေ့ မနက်အစောမှာပဲ နောင်ချိုမြို့က စစ်စခန်းတွေ၊စစ်တပ် တပ်စွဲထားတဲ့နေရာတွေကို ပူးပေါင်းတပ်တွေက ထိုးစစ်ဆင်တိုက်ခိုက်ခဲ့ပါတယ်။
ဇွန်လ၂၅ရက်မှာပဲ နောင်ချိုမြို့အဝင်မှာရှိတဲ့ ခမရ(၁၁၅)တပ်ရင်းကို သိမ်းပိုက်ထိန်းချုပ်ပြီးနောက် နောက်တစ်ရက်မှာ ရဲစခန်းနဲ့ မြို့ကို သိမ်းပိုက်ခဲ့ပါတယ်။ မြို့အနီးက အမှတ် (၆၀၆) ဒုံးတပ်ရင်းကိုလည်း TNLA နဲ့ပူးပေါင်းတပ်တွေက အပြင်းအထန်ထိုးစစ်ဆင်ပြီး ဇူလိုင် ၁၀ရက်မှာသိမ်းပြီး နောင်ချိုမြို့ကို အပြီးသတ်ထိန်းချုပ်ခဲ့တာပါ။
၂၀၂၄ ဇူလိုင်လမှာတော့ TNLA နဲ့မဟာမိတ်တွေဟာနောင်ချိုနဲ့ ပြင်ဦးလွင်အစပ်က အမြောက်တပ်ရင်းတွေရှိတဲ့ တောင်းခမ်းကိုထိုးစစ်ဆင်ခဲ့ပါတယ်။ဒါပေမယ့် အပြီးသတ်မသိမ်းနိုင်ခဲ့ပါဘူး ။ တော်လှန်ရေးတပ်တွေအတွက်တောင်းခမ်းရရင် စစ်တက္ကသိုလ်တွေရှိတဲ့ ပြင်ဦးလွင်ကို အကောင်းဆုံးခြိမ်းခြောက်နိုင်မှာဖြစ်သလို၊စစ်တပ်အတွက် တောင်းခမ်းရရင် အဲဒေသကို အခြေပြုပြီး ရှမ်းမြောက်ကို ထိုးစစ်ပြန်ဆင်နိုင်ဖို့အတွက် အလွန်
အရေးပါနေပါတယ်။
စစ်တက္ကသိုလ်တွေရှိရာ ပြင်ဦးလွင်နဲ့အနီးဆုံးမြို့ဖြစ်သလို စစ်ရေးအရအရေးပါတဲ့မြို့ဖြစ်တာကြောင့် နောင်ချိုမြို့ကို စစ်ကောင်စီကလည်း အပြင်းအထန် ထိုးစစ်ဆင်နေသလိုTNLAပူးပေါင်း
တပ်တွေဟာလည်း နောင်ချိုမြို့ ပြန်မပေးရရေးအတွက် ခုခံကာကွယ်နေပါတယ်။
“စိုးရိမ်စရာပဲ ခုက။ စကစက မီဒီယာနဲ့ပါ ဝါဒဖြန့်နေတာ အောင်မြင်တယ်။ လေယာဉ်ရော၊ လက်နက်ကြီးရော သုံးတော့လေ။မြို့ပေါ်မှာတော့ တက်လာစရာတော့ မရှိလောက်ပါဘူး။သူတို့(TNLA)လည်း ပြင်ဆင်ထားပါတယ်။ ရှေ့တိုးလို့ရတာ မတိုးဘဲ(တော်လှန်ရေးတပ်တွေက တောင်းခမ်းကနေရှေ့ဆက်မတိုးခြင်း) ဒီအတိုင်းရပ်ထားတော့ အားမလို၊ အားမရတာ မြို့ခံတွေက ဖြစ်နေတာပေါ့”လို့ နောင်ချိုမြို့ခံတစ်ဦးက သူအမြင်ကိုဖွင့်ဟပါတယ်။ ။
(စစ်ကောင်စီရဲ့ လော်ဘီ ဝါဒဖြန့်ရေးသားထားသောပို့စ်တစ်ခုနဲ့ နောင်ချိုကြီးရွာက လူသိများတဲ့ တိမ်ပင်လယ်ကို တွေ့ရစဉ်။ ဓာတ်ပုံ – CJ)