မြန်မာကနေ နျူကလီးယားကုန်ကြမ်းပစ္စည်း မှောင်ခိုရောင်းဝယ်ခဲ့ကြောင်း ဂျပန်ယာကူဇာခေါင်းဆောင်ဝန်ခံ

မြန်မာကနေ နျူကလီးယားကုန်ကြမ်းပစ္စည်း မှောင်ခိုရောင်းဝယ်ခဲ့ကြောင်း ဂျပန်ယာကူဇာခေါင်းဆောင်ဝန်ခံ
ဇန်နဝါရီ ၉၊ ၂၀၂၅
မြန်မာကနေ နျူကလီးယားကုန်ကြမ်းပစ္စည်းတွေ မှောင်ခိုရောင်းဝယ်မှုနဲ့ အမေရိကန်အာဏာပိုင်တွေက စွဲချက်တင်ထားတဲ့ ဂျပန်ယာကူဇာဂိုဏ်း ခေါင်းဆောင်က သူ့မှာ အပြစ်ရှိကြောင်း ဇန်နဝါရီလ ၈ရက် ဗုဒ္ဓဟူးနေ့က ဝန်ခံခဲ့တယ်လို့ အမေရိကန်တရားရေးဌာနက ထုတ်ပြန်ကြောင်း Reuters သတင်းမှာ ဖော်ပြပါတယ်။
အသက် ၆၀ အရွယ် တာကီရှိ အီဘာဆာဝါဟာ မြန်မာကနေ တခြားနိုင်ငံတွေဆီကို ယူရေနီယံနဲ့ လက်နက်အဆင့်ရှိ ပလူတိုနီယမ် အပါအဝင် နျူကလီးယားကုန်ကြမ်းပစ္စည်းတွေကို မှောင်ခိုသယ်ပို့ခဲ့ကြောင်း နယူးယောက်၊ မန်ဟက်တန်မှာ အပြစ်ဝန်ခံခဲ့တယ်လို့ တရားရေးဌာနက ပြောပါတယ်။
ဒါ့အပြင် နိုင်ငံတကာ မူးယစ်ဆေးဝါးမှောင်ခိုမှုနဲ့ လက်နက်စွဲချက်တွေအတွက် အပြစ်ရှိကြောင်းကိုလည်း အီဘာဆာဝါက ဝန်ခံခဲ့ပါတယ်။
အီရန်မှာအသုံးပြုမယ်လို့ ယူဆရတဲ့ နျူကလီးယားကုန်ကြမ်းပစ္စည်းတွေကို မြန်မာပြည်ကနေ မှောင်ခိုသယ်ဆောင်ဖို့ ပူးပေါင်းကြံစည်မှုနဲ့ အမေရိကန်အာဏာပိုင်တွေက အီဘာဆာဝါကို ပြီးခဲ့တဲ့ ၂၀၂၄ ဖေဖော်ဝါရီလမှာ တရားစွဲဆိုခဲ့တာပါ။ နိုင်ငံတကာ မူးယစ်ဆေးဝါးမှောင်ခိုမှုနဲ့ လက်နက်ပြစ်မှုတွေအတွက်ကိုတော့ ၂၀၂၂ ကတည်းက တရားစွဲခံခဲ့ရတာပါ။
“အီဘာဆာဝါရဲ့ ဒီနေ့ ဖက်ဒရယ်တရားရုံးမှာ ဝန်ခံချက်အရ သူဟာ မြန်မာပြည်ကနေ လက်နက် အဆင့်ရှိ ပလူတိုနီယမ် အပါအဝင် နျူကလီးယား ကုန်ကြမ်းပစ္စည်းတွေကို ပြောင်ပြောင်တင်းတင်း မှောင်ခို ရောင်းဝယ်ခဲ့တယ်” လို့ နယူးယောက် တောင်ပိုင်းခရိုင် ရှေ့နေ Edward Kim က ပြောပါတယ်။
“တချိန်တည်းမှာပဲ သူဟာ မြန်မာနိုင်ငံက စစ်မြေပြင်တွေမှာ အသုံးပြုမယ့် မြေပြင်မှ ဝေဟင်ပစ် ဒုံးကျည်တွေလို အကြီးစား လက်နက်ကြီးတွေနဲ့ လဲလှယ်ဖို့ ဘိန်းဖြူနဲ့ စိတ်ကြွဆေး အမြောက်အမြားကို အမေရိကန်ပို့ဖို့လုပ်ခဲ့ပြီး ဆေးရောင်းပြီးရတယ်လို့ ယူဆရတဲ့ ငွေတွေကို နယူးယောက်ကနေ တိုကျိုအထိ ငွေခဝါချခဲ့ပါတယ်” လို့ သူက ပြောပါတယ်။
အီဘာဆာဝါရဲ့ အကြံအစည်ကို အမေရိကန်၊ အင်ဒိုနီးရှား၊ ဂျပန်နဲ့ ထိုင်း အာဏာပိုင်တွေရဲ့ ပူးပေါင်းဆောင်ရွက်မှုနဲ့ ရှာဖွေတွေ့ရှိခဲ့ပြီး ရပ်တန့်ခဲ့တာဖြစ်ပါတယ်။
News-Reuters