ငါန်းဇွန်မြို့နယ်တွင် ဓါးပြတိုက်ခံရ
အင်ကြင်း/People’s Spring
မန္တလေးတိုင်း၊ ငါန်းဇွန်မြို့နယ်တွင် နေအိမ်တစ်အိမ် ဓါးပြတိုက်ခံရပြီး ကျပ်သိန်း ၃ဝ နှင့် ရွှေထည်အချို့ ပါသွားကြောင်း ဒေသခံများက ပြောသည်။
မေလ ၂၅ ရက် ညပိုင်းက ငါန်းဇွန်မြို့နယ်၊ကုန်းလည်အုပ်စု၊ ပေါက်တောလေးကျေးရွာရှိ နေအိမ်တစ်အိမ်ကို လက်နက်ကိုင်လူတစ်စုရောက်လာကာ နေအိမ်ရှိ လူအချို့အား ထိုးကြိတ်ရိုက်နှက်ခဲ့ကြောင်း၊ ထို့နောက် နေအိမ်ရှိ ရွှေနားကတ် ၃ ရံ၊ ကျပ်သိန်း၃၀ နှင့် ဆိုင်ကယ် တစ်စီးအား ယူဆောင်သွားကြောင်း ဒေသခံများက ပြောသည်။
“လူ ငါးယောက်လာတာ။ ဆိုင်ကယ်နဲ့ပဲ။ သေနတ် နှစ်လက်ပါတယ်ပြောတယ်။”ဟု ဒေသခံတစ်ဦးက ပြောသည်။
ငါန်းဇွန်မြို့နယ်တွင် ဓါးပြတိုက်မှုများ မကြာခဏဖြစ်ပွားနေပြီး အဆိုပါဓါးပြမှုမှာ ပျူစောထီးများလည်းဖြစ်နိုင်ကြောင်း ဒေသခံအချို့က မှတ်ချက်ပြုသည်။
ပေါက်တောလေးကျေးရွာဓါးပြမှုအား အသေးစိတ်စုံစမ်းနေသည်ဟု ငါန်းဇွန်ပကဖတာဝန်ရှိသူက ပြောသည်။
ပြီးခဲ့သည့် မေလ ၁၇ ရက်ကလည်း မြို့သာ နတ်စိမ်းဂျင်ဝိုင်းအား စစ်ကောင်စီတပ်သားများက ဆိုင်ကယ် လေးစီးဖြင့် PDF အယောင်ဆောင်ကာ ဝင်ရောက်စီးနင်းခဲ့သေးသည်။
ထို့အပြင် မေလ ၂ ရက် ညကလည်း ငါန်းဇွန်မြို့နယ်၊ မြို့သာရဲစခန်းအနီးရှိ နေအိမ်တစ်အိမ်ကို ပျူစောထီးအဖွဲ့က ဓါးပြဝင်တိုက်ကာ အိမ်ရှင်အား ရိုက်နှက်ပြီး ကျပ်သိန်း ၃၀ ယူဆောင်သွားကြောင်း ဒေသခံများထံမှ သိရသည်။