အမ်း (နပခ) စစ်ဌာနချုပ်နဲ့ အမ်းမြိုသိမ်းတိုက်ပွဲတွေမှာ တာဝန်ထမ်းဆောင်ခဲ့ကြတဲ့ စစ်ကိုင်းတိုင်း ပကဖ ရဲဘော်တွေကို ဂုဏ်ပြုကြိုဆိုပွဲကျင်းပ
အမ်း တိုက်ပွဲများအတွင်း စစ်ကိုင်း ပကဖမှ ရဲဘော် ၁၅ ဦး ကျဆုံးခဲ့ …
မေ ၉၊ ၂၀၂၅
အာရက္ခတပ်တော်(AA) နဲ့အတူ ရခိုင်ပြည်နယ် အမ်း (နပခ) စစ်ဌာနချုပ်နဲ့ အမ်း မြို့သိမ်းတိုက်ပွဲမှာ တာဝန်ထမ်းဆောင်ခဲ့ကြတဲ့ စစ်ကိုင်းတိုင်း ပြည်သူ့ကာကွယ်ရေးတပ်ဖွဲ့ (ပကဖ) ရဲဘော်တွေကို ဂုဏ်ပြုကြိုဆိုပွဲကျင်းပခဲ့တယ်လို့ ယင်းမာပင်ခရိုင် ပကဖ က ဒီကနေ့ ထုတ်ပြန်ပါတယ်။
အဆိုပါ အမ်းမြို့တိုက်ပွဲဝင် အောင်ပွဲရ ရဲဘော်တွေကို စစ်ကိုင်းတိုင်း ပကဖမှ ဂုဏ်ပြုဆုငွေများ ပေးအပ်ချီးမြင့်ခဲ့ပြီး၊ ကျဆုံးရဲဘော်တွေရဲ့ မိသားစုဝင်တွေကိုလည်း ထောက်ပံ့ကြေးများပေးအပ်ကာ ရဲဘော်များမှ ဂုဏ်ပြုဦးညွှတ်အလေးပြုခဲ့ကြတယ်လို့ ထုတ်ပြန်ချက်ထဲမှာ ဖော်ပြပါရှိပါတယ်။
အမ်းတိုက်ပွဲများအတွင်း စစ်ကိုင်းတိုင်း ယင်းမာပင်ခရိုင်မှ ပကဖရဲဘော် ၃၂ ဦး ပါဝင်တိုက်ခိုက်ခဲ့ပြီး ရဲဘော် ၂ ဦး အသက်ပေးလှူခဲ့ရကာ ရဲဘော်တစ်ဦး ခြေတစ်ဖက်ဆုံးရှုံးခဲ့ရတယ်လို့ ထုတ်ပြန်ချက်ထဲမှာ ဖော်ပြထားပါတယ်။
စစ်ကိုင်းတိုင်း ပကဖ ကတော့ တပ်ရင်း(၁)ရင်းစာ ပါဝင်ကူညီတိုက်ခိုက်ခဲ့ပြီး ရဲဘော် ၁၅ ဦး ကျဆုံးခဲ့ကာ ရဲဘော် ၇၀ ကျော် ထိခိုက်ဒဏ်ရာရရှိခဲ့တယ်လို့ သိရပါတယ်။
အာရက္ခတပ်တော် AA နဲ့ ပူးပေါင်းတပ်ဖွဲ့တွေရဲ့ အမ်းမြို့နဲ့ အနောက်ပိုင်းတိုင်းစစ်ဌာနချုပ် နပခ သိမ်းတိုက်ပွဲများအတွင်း စစ်ကောင်စီရဲ့ (နပခ-ဒုတိုင်းမှူး) ဗိုလ်မှူးချုပ် သောင်းထွန်းနဲ့ တိုင်းစစ်ဦးစီးချုပ် ဗိုလ်မှူးချုပ် ကျော်ကျော်သန်း တို့ကို အရှင်ဖမ်းမိခဲ့တယ်လို့လည်း ဖော်ပြထားပါတယ်။
ယင်းမာပင်ခရိုင်ပကဖ အနေနဲ့ ရခိုင့်စစ်မြေပြင်မှာ ရဲဝံ့စွာတိုက်ပွဲဝင်ခဲ့ကြတဲ့ ပကဖရဲဘော်တွေကို အထူးလေးစားဂုဏ်ယူကြောင်းနဲ့ ကျဆုံခဲ့တဲ့ ရဲဘော်တွေကို မော်ကွန်းမှတ်တမ်းတင်ကာ အလေးအနက် ဂုဏ်ပြုအပ်ပါတယ်လို့လည်း ထုတ်ပြန်ချက်မှာ ဖော်ပြပါရှိပါတယ်။