ရွှေကျင်ရှိ ခမရ(၅၉၈)တပ်ရင်းကို တော်လှန်ရေးပူးပေါင်းတပ် သိမ်းပိုက်
မေ ၉၊၂၀၂၅။ကဖေး/People’s Spring
ပဲခူးတိုင်း၊ ရွှေကျင်မြို့နယ်ရှိ စစ်ကောင်စီ၏ အမှတ်(၅၉၈)ခြေမြန်တပ်ရင်း( ခမရ-၅၉၈)အား တော်လှန်ရေးပူးပေါင်းတပ်များက ယနေ့(မေ ၉ရက်) နံနက်အစောပိုင်းတွင် တိုက်ခိုက်သိမ်းပိုက်ခဲ့ရာ စစ်ကောင်စီတပ်ဖွဲ့ဝင်၂ဝထက်မနည်းသေဆုံးကြောင်း ဒေသခံများနှင့် စစ်ရေးသတင်းရင်းမြစ်များကပြောသည်။
ရွှေကျင်မြို့နယ်ရှိ စစ်ကောင်စီတပ်စခန်းအချို့ကို မတ်လတတိယလပတ်အတွင်း စတင်တိုက်ခိုက်ခဲ့ပြီးနောက် ခမရ(၅၉၈)တပ်ရင်းကိုလည်း တိုက်ခိုက်ခဲ့ကြောင်း၊ ယမန်နေ့(မေလ ၈ရက်)ညက စခန်းသိမ်းတိုက်ပွဲအတွက် ထိုးစစ်ဆင်ခဲ့ပြီး ယနေ့ နံနက်ပိုင်းတွင် သိမ်းယူလိုက်ခြင်းဟု စစ်ရေးသတင်းရင်းမြစ်ကပြောသည်။
” စခန်းက ကျသွားပါပြီ။ ရဲဘော်တွေ လက်ထဲရောက်နေပါပြီ။ လေကြောင်းအန္တရာယ်ကြားကနေ လိုက်ရှင်းနေရတာ”ဟု ရွှေကျင်မြို့မှ စစ်ရေးသတင်းရင်းမြစ်က ပြောသည်။
ယမန်နေ့ညက တိုက်ပွဲမှာ အလွန်ပြင်းထန်ခဲ့ပြီး လက်နက်ကြီး၊ လက်နက်ငယ် ပစ်ခတ်သံများကို ဒိုက်ဦးမြို့ပေါ်မှကြားခဲ့ရသလို ပေါက်ကွဲသည့် မီးတောက်များကိုလည်း မြင်တွေ့ခဲ့ရကြောင်း ဒိုက်ဦးမြို့ခံတစ်ဦးက ပြောသည်။
ခမရ(၅၉၈)တပ်ရင်း စခန်းသိမ်းတိုက်ပွဲအတွင်း စစ်ကောင်စီတပ်ဖွဲ့ဝင် ၂၀ကျော်သေဆုံးခဲ့ပြီး ကရင်အမျိုးသားလွတ်မြောက်ရေးတပ်မတော်(KNLA)ဦးဆောင်သည့် ပူးပေါင်းတပ်တွင်လည်း ထိခိုက်ကျဆုံးမှုအချို့ရှိကြောင်း ကာကွယ်ရေးရဲဘော်တစ်ဦးက ပြောသည်။
အမှတ်(၂)စစ်ဒေသနှင့် KNUတို့က မကြာမီ သတင်းအသေးစိတ်သတင်းထုတ်ပြန်မည်ဟုလည်း ဆိုသည်။
ရွှေကျင်မြို့နယ်တွင် ခမရ(၅၉၈)တပ်ရင်းအပြင် နောက်ထပ် စစ်တပ်ရင်းနှစ်ခုနှင့် ရဲစခန်း၊ ဌာနဆိုင်ရာရုံးများကျန်ရှိနေသေးသည်။ စစ်ကောင်စီက ယနေ့နံနက် ၁၁နာရီခန့်အထိ လေကြောင်းတိုက်ခိုက်မှုများပြုလုပ်နေကြောင်း သတင်းရရှိသည်။
ရွှေကျင်မြို့နယ်အတွင်း စစ်ဆင်ရေးကို စစ်ဆင်ရေးတွင် KNLAနှင့်အတူ Southern Eagle တပ်ရင်းနှင့် အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာန၊ အမှတ်(၃)စစ်ဒေသမှ တပ်ရင်းများပူးပေါင်းတိုက်ခိုက်နေခြင်းဟု သတင်းရရှိသည်။
ထို့အပြင် ထိုင်း – မြန်မာနယ်စပ်အနီး ကရင်ပြည်နယ် ၊ ဘားအံခရိုင်၊ လှိုင်းဘွဲ့မြို့နယ်ရှိ တခေါဘီခီးစခန်းကို KNLAပူးပေါင်းတပ်က တိုက်ခိုက်ပြီး ၂ရက်အကြာတွင် စစ်ကောင်စီတပ်သားများက စခန်းစွန့်ခွာသွားကြောင်း ကရင်စစ်ရေးသတင်းရင်းမြစ်က ပြောသည်။
တခေါဘီခီးစခန်းကို KNU တပ်မဟာ (၇)နှင့် ပူးပေါင်းတပ်များက မေလ ၇ ရက်နံနက်ပိုင်းတွင် စတင်တိုက်ခိုက်ခဲ့ခြင်း ဖြစ်သည်။
(ကရင်အမျိုးသားလွတ်မြောက်ရေးတပ်မတော်(KNLA)မှ ရဲဘော်များအား တွေ့ရစဉ်။ ဓာတ်ပုံ – AP)
ရွှေကျင်မြို့နယ်၊ ခမရ ၅၉၈ တပ်ရင်းဌာနချုပ်တစ်ခုလုံးကို KNLA ၊ PDF ပူးပေါင်းတပ်များက အပြီးသတ် တိုက်ခိုက် သိမ်းပိုက်၊ တပ်ရင်းထဲတွင် စစ်ကောင်စီတပ်ဖွဲ့ဝင်များ၏ အလောင်းများစွာ ရှိနေ
ရန်ကုန်၊ မေ ၉
ပဲခူးတိုင်း၊ ရွှေကျင်မြို့နယ်၊ ညောင်ခြေထောက်ကျေးရွာရှိ ခမရ ၅၉၈ တပ်ရင်းဌာနချုပ်တစ်ခုလုံးကို KNLA ၊ PDF ပူးပေါင်းတပ်များက အပြီးသတ် တိုက်ခိုက် သိမ်းပိုက်လိုက်ပြီဖြစ်ကြောင်း ပြည်သူ့ကာကွယ်ရေးတပ် မတော်၊ တောင်ပိုင်းတိုင်းစစ်ဒေသမှ တာဝန်ရှိသူတစ်ဦးက ရန်ကုန်ခေတ်သစ်သတင်းဌာနထံသို့ ပြောဆိုသည်။
ယမန်နေ့ မေလ ၈ ရက်နေ့ ညနေ ၅ နာရီအချိန် ရွှေကျင်မြို့နယ်ရှိ ခမရ ၅၉၈ တပ် ရင်းဌာနချုပ်တစ်ခုလုံးကို တိုက် ခိုက်သိမ်းပိုက်နိုင်ခဲ့ခြင်းဖြစ်ကြောင်း၊ စစ်ကောင်စီတပ်က လေကြောင်းတိုက်ခိုက်မှုများ၊ ဒရုန်းများဖြင့် တိုက်ခိုက်မှုများ ဆက်တိုက် လုပ်ဆောင်နေသည့်အတွက် နယ်မြေရှင်းလင်းရေးအတွက် အချိန်ယူ လုပ်ဆောင်နေရ ကြောင်း၊ လက်ရှိအချိန်အထိ စစ်ကောင်စီတပ်ဖွဲ့ဝင်များ၏ အလောင်းများ တပ်ရင်းထဲတွင် ပြန့်ကျဲနေပြီး သိမ်းဆည်းရရှိသည့် လက်နက်ခဲယမ်းများကိုလည်း စိစစ်နေဆဲဖြစ်ကြောင်း သိရှိရသည်။
“PDF စစ်ဆင်ရေးနယ်မြေ ၁၊ စစ်ဆင်ရေးနယ်မြေ ၂ နဲ့ KNLA တပ်ရင်း ၇ တို့ ပူးပေါင်းဆောင်ရွက်တာဖြစ်ပါတယ်။ စစ်ခွေး သေဆုံးမှု အရေအတွက်နဲ့ လက်နက်တွေ ရရှိမှုတွေကလည်း အသေးစိတ် စိစစ်နေဆဲဖြစ်ပါတယ်။ ကြေးနန်းစောင့်နေရဆဲဖြစ်ပါတယ်။ အခုသိမ်းပိုက်ရရှိတာက တပ်ရင်းဌာနချုပ်တစ်ခုလုံးကို သိမ်းပိုက်တာပါ။ ခမရ ၅၉၈ တပ်ရင်းတစ်ခုလုံးကို သိမ်းတာပါ။ ကာကွယ်ရေးဝန်ကြီးဌာန MOD က မကြာခင် အသေးစိတ် သတင်းထုတ်ပြန်ဖို့ရှိပါမယ်” ဟု ပြည်သူ့ကာကွယ်ရေးတပ်မတော်၊ တောင်ပိုင်းတိုင်းစစ်ဒေသမှ တာဝန်ရှိသူက ဆက်လက်ရှင်းပြသည်။
စစ်ကောင်စီက တပ်ရင်းဌာနချုပ်တစ်ခုလုံး ဆုံးရှုံးသွားသည့်အတွက် လတ်တလော ခမရ ၅၉၈ တပ်ရင်းတည်ရှိရာ ညောင် ခြေထောက်ကျေးရွာအပါအဝင် ပတ်ဝန်းကျင်ကျေးရွာမှ ပြည်သူများမှာ ထွက်ပြေးတိမ်းရှောင်နေရကြောင်း သိရှိရသည်။