ကျောက်ဖြူစီမံကိန်းအနာဂတ် အာရက္ခတပ်တော် AA ၏ လက်ထဲတွင် ရှိနေပြီဟုဆို
ဧပြီ ၂၃၊ ၂၀၂၅
ကျောက်ဖြူစီမံကိန်းရဲ့ အနာဂတ်ဟာ အာရက္ခတပ်တော် AA ရဲ့ လက်ထဲမှာ ရှိနေပြီလို့ ရခိုင် ရေနံစောင့်ကြည့်ရေးအဖွဲ့ (Arakan Oil Watch) ရဲ့ အစီရင်ခံစာမှာ ဖော်ပြလာပါတယ်။
ရေနံနဲ့သဘာဝဓာတ်ငွေ့လုပ်ငန်းတွေကို စောင့်ကြည့်လေ့လာနေတဲ့ Arakan Oil Watch အဖွဲ့ရဲ့ “တောက်လောင်နေသည့် ကျောက်ဖြူ၏ ပဋိပက္ခများ အစီရင်ခံစာ” မှာ အာရက္ခတပ်တော်ဟာ ကျောက်ဖြူမြို့နယ်တစ်ခုလုံးကို စစ်ရေးအရ ထိန်းချုပ်သည်ဖြစ်စေ၊ မထိန်းချုပ်သည်ဖြစ်စေ စီမံကိန်းရဲ့ အနာဂတ်ဟာ AA ရဲ့လက်ထဲမှာ ရှိနေတယ်လို့ ဆိုပါတယ်။
ကျောက်ဖြူမြို့နယ် တစ်ခုလုံးကို အပြည့်အဝသိမ်းပိုက်မယ်ဆိုရင် လက်ရှိနဲ့ အနာဂတ်စီမံကိန်းတွေအတွက် သဘောတူစာချုပ်တွေ၊ ဘဏ္ဍာငွေ အစုရှယ်ယာ သဘောတူညီမှုတွေနဲ့ အခွန်အခ ကိစ္စရပ်တွေကိုပါ ပြန်လည်ဆွေးနွေးနိုင်မယ့် အခြေအနေတစ်ရပ်ကို ရောက်ရှိသွားမှာဖြစ်ကြောင်း အစီရင်ခံစာက ဆိုထားပါတယ်။
အာရက္ခတပ်တော် (AA) ဟာ ကျောက်ဖြူမြို့နယ်ကို ၂၀၂၄ အစောပိုင်းမှာ ဝင်ရောက်လာပြီးနောက် ကျေးရွာအုပ်စုပေါင်း ၅၄ ခုထဲက ၅၀ ကို ထိန်းချုပ်ထားသလို မြို့နယ်တစ်ခုလုံးကိုသိမ်းပိုက်ဖို့ စစ်ရေးအင်အား အပြည့်ရှိနေတယ်လို့လည်း ဆိုပါတယ်။
လက်ရှိမှာ ကျောက်ဖြူမြို့နယ်က ရင်းနှီးမြှုပ်နှံမှုစီမံကိန်းနေရာအားလုံးကို အာရက္ခတပ်တော် (AA) က ဝိုင်းရံပိတ်ဆို့ထားပြီးဖြစ်ပါတယ်။ ဒါ့ကြောင့် စီမံကိန်းတွေ ကောင်းမွန်စွာလည်ပတ်နိုင်ဖို့ တရုတ်စီမံကိန်းတွေ အပါအဝင် နိုင်ငံခြားရင်းနှီး မြှုပ်နှံမှုကုမ္ပဏီတွေအနေနဲ့ AA နဲ့ ဆွေးနွေး ပူးပေါင်းတာတွေမရှိရင် စီမံကိန်းတွေကို ဆက်လက်လည်ပတ်ဖို့ မဖြစ်နိုင်ဘူးလို့ အစီရင်ခံစာက ဆိုပါတယ်။
၂၀၂၅ ဖေဖော်ဝါရီလမှာ ဓညဝတီရေတပ်စခန်းအနီးက စစ်ကောင်စီရဲ့ လုံခြုံရေးကင်းလှည့်တဲ့အဖွဲ့ကို AA က စတင်တိုက်ခိုက်ရာက တိုက်ပွဲတွေ ဖြစ်ပွါးနေခဲ့ပါတယ်။ စစ်ကောင်စီတပ်ကလည်း ဒရုန်းတိုက်ခိုက်မှုတွေနဲ့ ပြန်လည်ထိုးစစ်ဆင်ပြီးနောက် အနီးအနားကျေးရွာ ၃ရွာက အိမ်ခြေ ၂၀၀ ခန့်ကို မီးရှို့ဖျက်ဆီးခဲ့ပါတယ်။
ကျောက်ဖြူဒေသအနီးမှာ ထိတွေ့လာတဲ့ တိုက်ပွဲတွေကြောင့် ကျောက်ဖြူထဲက တရုတ်စီမံကိန်းတွေနဲ့ ရင်းနှီးမြှုပ်နှံမှုလုပ်ငန်းတွေရဲ့ အခြေအနေကို စတင်စောင့်ကြည့်မှုတွေလည်း ရှိလာခဲ့တာပါ။
ပြီးခဲ့တဲ့ မတ်လဆန်းပိုင်းက စတင်ကာ ကျောက်ဖြူမြို့နယ်ထဲက စစ်တပ် ကာကင်းစခန်းတွေကို အာရက္ခတပ်တော် AA ဘက်က ထိုးစစ်ဆင်ခဲ့ပြီးနောက် တိုက်ပွဲတွေလည်း ပြင်းထန်ခဲ့ပါတယ်။
အနီးဝန်းကျင်ကျေးရွာတွေကို စစ်တပ်က လေကြောင်းဗုံးကြဲတာတွေ ပြုလုပ်ခဲ့ပြီး ဓညဝတီရေတပ်ဌာနချုပ်နဲ့ တရုတ်စီမံကိန်းတွေတည်ရှိတဲ့ နေရာအနီးဝန်းကျင်တွေမှာလည်း စစ်ကောင်စီက အင်အားဖြည့်တင်းမှုတွေ ဆက်တိုက်ပြုလုပ်လျက်ရှိနေပါတယ်။
