မြို့အထိနာမှု အနည်းဆုံးဖြစ်လာနိုင်သည့် စစ်တွေတိုက်ပွဲ
ဖေဖော်ဝါရီ ၁၃၊ ၂၀၂၅
ရခိုင်ပြည်နယ်၊ စစ်တွေမြို့တွင်းမှာ စစ်ကောင်စီတပ်တွေ မရှိတာကြောင့် မြို့နာတာ အနည်းဆုံး တိုက်ပွဲဖြစ်လာလိမ့်မယ်လို့ သုံးသပ်ကြောင်း CDM ဗိုလ်ကြီးဇင်ယော်က မောင်းကို ပြောပါတယ်။
ပြီးခဲ့တဲ့ ဖေဖော်ဝါရီလ ၇ ရက်ကနေ ၉ ရက်အထိ အာရက္ခတပ်တော် (AA) ဟာ စစ်တွေမြို့နယ်က စစ်ကောင်စီရဲ့ ကြည်းတပ်နဲ့ ရေတပ်စခန်းတွေကို လက်နက်ကြီးတွေ ပစ်ခတ်တိုက်ခိုက်ပြီးတဲ့နောက် စစ်ကောင်စီက တိုက်ခိုက်ရေးသင်္ဘော ၄ စီး ထပ်မံပို့ဆောင်ပြီး အင်အားဖြည့်တင်းထားတယ်လို့ သိရပါတယ်။
“စစ်တွေမှာက ထိတွေ့တိုက်ပွဲစပြီလို့ ပြောလို့ရပါတယ်၊ အခုက ရေတပ်အင်အားဖြည့်တာ… စစ်တွေမှာက မြောက်ဦး၊ ကျောက်တော်၊ ရသေ့တောင်၊ ဘူးသီးတောင်၊ မောင်တောတို့က စုလာသမျှ အဖွဲ့တွေ အားလုံးက စစ်တွေ တပ်နယ်ထဲမှာ ရောက်နေတာ.. အဲ့တော့ အထူးတလည် မြေပြင်ကနေ စစ်ကူပေးနိုင်မှာ မဟုတ်တော့ဘူး၊ အဲဒီအဖွဲ့တွေနဲ့ပဲ ခံစစ်ဆင်မယ့် သဘောပါပဲ” လို့ CDM ဗိုလ်ကြီးဇင်ယော်က မောင်းကို ပြောပါတယ်။
ဒါပေမယ့် စစ်တွေတပ်နယ်ထဲမှာ ရှိနေတဲ့ စစ်ကောင်စီ အဖွဲ့စုံဟာ လက်နက်ချထွက်ပြေးလာတဲ့ အဖွဲ့တွေ ဖြစ်တာကြောင့် အခုတစ်ခါ ထပ်မံ ထွက်ပြေးရင်တော့ ကုလားတန်မြစ်ဝကနေတဆင့် ဘင်္ဂလားပင်လယ်အော်ထဲကို ထွက်ပြေးဖို့ တစ်လမ်းပဲ ရှိတော့တယ်လို့ ဆိုပါတယ်။
AA တပ်ဖွဲ့တွေဟာ စစ်တွေမြို့ကို ဖိဖိစီးစီးတိုက်ရင် ခံစစ်ကြောင်းက ခဏလေးအတွင်း ပြိုဆင်းသွားမှာ ဖြစ်တာကြောင့် AA ကနေလည်း တိုက်ပွဲမစခင်မှာ ကြိုပြီးလက်နက်ချဖို့နဲ့ လက်နက်ချသူတွေဟာ မိသားစုတွေနဲ့ ဆက်သွယ်ခွင့်ရမှာဖြစ်ကြောင်း၊ ရှင်သန်ခွင့်ရမှာဖြစ်ကြောင်း ကြေညာထားတာဖြစ်တယ်လို့ သုံးသပ်ပြောဆိုပါတယ်။
ဒါ့အပြင် စစ်တွေမြို့ဟာ မြို့အတွင်းမှာ စစ်ကောင်စီတပ်ဖွဲ့ဝင်တွေ မရှိဘဲ စစ်တွေနဲ့ အမြင့်ကျွန်းကြားက ရန်ကုန်-စစ်တွေ ကားလမ်းဘေးမှာသာ စစ်ကောင်စီတပ်တွေရှိသာကြောင့် စစ်တွေ တိုက်ပွဲဟာ မြို့ကို အထိအခိုက်နည်းမယ့် တိုက်ပွဲဖြစ်တယ်လို့ ဗိုလ်ကြီးဇင်ယော်က ဆိုပါတယ်။
“မြို့တွင်းမှာက ရဲစခန်းလောက်ပဲရှိတာ၊ အဲ့ဒါကြောင့် စစ်တွေ မြို့ထဲကို ဝင်ပြီးတိုက်မှာတော့ မဟုတ်ဘူး၊ မြို့ပြင်မှာ ရှိတဲ့ ဒကစနဲ့ နပခ အပါအဝင်ပေါ့နော် အဲ့တပ်တွေအားလုံးက မြို့အပြင်မှာချည်းပဲ၊ အဲ့တော့ မြို့ထဲမှာ တိုက်ပွဲပြင်းထန်လာနိုင်တာ မရှိပါဘူး၊ မြို့နာတာ အနည်းဆုံးဖြစ်တဲ့ တိုက်ပွဲ ဖြစ်ပါလိမ့်မယ်” လို့ ပြောပါတယ်။
လက်ရှိမှာတော့ အာရက္ခတပ်တော် (AA) တပ်ဖွဲ့ဝင်တွေဟာ ရခိုင်ပြည်နယ်မှာ မြို့နယ် ၁၇ မြို့နယ်ရှိတဲ့အနက် အမ်း၊ ပေါက်တော၊ မင်းပြား၊ မြောက်ဦး၊ ကျောက်တော်၊ မြေပုံ၊ ပုဏ္ဏားကျွန်း၊ ရမ်းဗြဲ၊ ဂွ၊ ရသေ့တောင်၊ ဘူးသီးတောင်၊ သံတွဲ၊ တောင်ကုတ်၊ မောင်တော စတဲ့ မြို့တွေကို အပြည့်အဝ သိမ်းပိုက်ထားပြီး စစ်တွေ၊ ကျောက်ဖြူနဲ့ မာန်အောင်မြို့တို့သာ သိမ်းပိုက်ဖို့ ကျန်ရှိတော့တာ ဖြစ်ပါတယ်။
ပုံစာ – အာရက္ခတပ်တော် AA တပ်ဖွဲ့ဝင်တချို့ (ပုံဟောင်း)