AA ထိုးစစ်နှင့်အတူ စစ်ကောင်စီအတွက် စိုးရိမ်ရေမှတ် ရောက်ရှိလာသည့် မြို့တော် စစ်တွေ
ဖေဖော်ဝါရီ ၁၃၊ ၂၀၂၅
ရခိုင်ပြည်နယ်ရဲ့ မြို့တော် စစ်တွေကို အာရက္ခတပ်တော် AA က ဖေဖော်ဝါရီလဆန်းပိုင်းမှာ စတင်ထိုးစစ်တိုက်ခိုက်ခဲ့တာဟာ မြို့တော်နဲ့ မိုင်အနည်းငယ်အကွာကို ရောက်ရှိလာပြီဖြစ်ပါတယ်။
အခုရက်ပိုင်းအတွင်း စစ်တွေမြို့နဲ့ ၁၀မိုင်လောက်ဝေးတဲ့ အမြင့်ကျွန်း၊ ပါဒလိတ်၊ ရေချမ်းပြင်နဲ့ ကျားမသောက်ကျေးရွာတို့က စစ်ကောင်စီတပ်စခန်းတွေကို အာရက္ခတပ်တော် AA က ထိုးစစ်ဆင် တိုက်ခိုက်လာခဲ့ပါတယ်။
ပြီးခဲ့တဲ့ ၂၀၂၄ ခုနှစ်၊ ဒီဇင်ဘာလက ရခိုင်တောင်ပိုင်းမြို့တော်တွေဖြစ်တဲ့ တောင်ကုတ်နဲ့ ဂွတို့ကို သိမ်းပိုက်ထိန်းချုပ်အပြီး တစ်လအကြာမှာ AA က မြို့တော် စစ်တွေအနီးကို ရောက်ရှိခြိမ်းခြောက်လာတာ ဖြစ်ပါတယ်။
အာရက္ခတပ်တော်ဟာ စစ်ကောင်စီထိန်းချုပ်ထားတဲ့ စစ်တွေမြို့ကို လအတော်ကြာ ဝိုင်းရံပိတ်ဆို့ ဖြတ်တောက်ထားပြီးနောက် စတင်တိုက်ခိုက်လာတာဖြစ်ပြီး ဒေသခံတွေကိုလည်း တတ်နိုင်သမျှ စစ်ဘေးကနေ ရှောင်ရှားကြဖို့ ကြိုတင်ပန်ကြားထားတာ ဖြစ်ပါတယ်။
စစ်တွေမြို့နယ်က အမြင့်ကျွန်း၊ ကျားမသောက်ဂိတ်၊ အောင်မင်္ဂလာ၊ ကြွဲတဲ၊ ပါဒလိတ် စတဲ့ ဂိတ်စခန်းတွေနဲ့ အခြားတပ်ရင်းတွေကို အာရက္ခတပ်တော်က လက်နက်ကြီးအပါအဝင် စနိုက်ပါတွေနဲ့ပါ အဓိက အသုံးပြုတိုက်ခိုက်နေတယ်လို့ ရခိုင်စစ်ရေး သတင်းအရင်းအမြစ်တွေက ပြောပါတယ်။
အထူးသဖြင့် အမ်းမြို့သိမ်းတိုက်ပွဲဆင်နွှဲစဉ်က အသုံးပြုခဲ့တဲ့ လက်နက်ကြီးတွေနဲ့ စစ်ကောင်စီတပ်စခန်းတွေကို ဖိအားပေး တိုက်ခိုက်နေတာလည်း ဖြစ်ပါတယ်။
စစ်တွေမြို့အနီးဝန်းကျင်က ပုဏ္ဏားကျွန်း၊ ပေါက်တော၊ ရသေ့တောင်မြို့တွေ အားလုံးကိုလည်း AA က လက်ရှိအချိန်မှာ သိမ်းပိုက်ထိန်းချုပ်ထားတာပါ။ စစ်ကောင်စီတပ်ကလည်း ပင်လယ်ကမ်းရိုးတန်းထွက်ပေါက် ရေလမ်းကြောင်းကို ပိတ်ဆို့ထားသလို စစ်တွေမြို့ကို ပြီးခဲ့တဲ့ ၂၀၂၄ ခုနှစ်ကတည်းက ကြိုတင်ခံစစ်ပြင်ဆင်ထားတာ ဖြစ်ပါတယ်။
ဖေဖော်ဝါရီလ ပထမပတ်အတွင်း စစ်ကောင်စီက စစ်တွေမြို့ကို တိုက်ခိုက်ရေးသင်္ဘော ၄ စီး ထပ်မံပို့ဆောင်ပြီး အင်အားဖြည့်တင်းလိုက်တယ်လို့ မြို့ခံတွေနဲ့ စစ်ရေးသတင်းရင်းမြစ်တွေက ဆိုပါတယ်။
စစ်ကောင်စီ ထိပ်တန်းအရာရှိ မိသားစုဝင်တချို့ကိုလည်း တိုက်ပွဲတွေ မပြင်းထန်မီ ကြိုတင်ပြောင်းရွှေ့ပြင်ဆင်မှုတွေလည်း ပြုလုပ်ထားတယ်လို့ သိရပါတယ်။
ပြီးခဲ့တဲ့ရက်ပိုင်းအတွင်း စစ်တပ်ရဲ့ ဒေသစစ်ဆင်ရေးကွပ်ကဲမှုဌာနချုပ် (ဒကစ -စစ်တွေ) လက်အောက်ခံတပ်ရင်းတွေနဲ့ AAတို့ဟာ ကျားမသောက်၊ ကျောက်တန်းကြီး၊ ကျောက်တန်းချေ ကျေးရွာအနီးဝန်းကျင်မှာ တိုက်ပွဲတွေ ဖြစ်ပွားခဲ့တယ်လို့ ဒေသခံတွေကပြောပါတယ်။
စစ်တွေအနီး ဖေဖော်ဝါရီလ ပထမပတ်က စတင်ကာ တိုက်ပွဲတွေ နေ့တိုင်း ရှိနေသလို စစ်ကောင်စီဘက်က လက်နက်ကြီး၊ လက်နက်ငယ်၊ စနိုက်ပါနဲ့ ဒရုန်းတွေကို အသုံးပြုပြီး အာရက္ခတပ်တော် တပ်စွဲထားတဲ့ နေရာတွေကို ပြန်လည်ပစ်မှတ်ထား တိုက်ခိုက်မှုတွေလည်း ရှိနေပါတယ်။
တိုက်ပွဲတွေနဲ့ နီးကပ်လာတဲ့ စစ်တွေမြို့မှာ ပွဲလမ်းသဘင် အခမ်းအနားတွေကိုတော့ စဉ်ဆက်မပြတ်ကျင်းပနေပြီး မြို့က ပုံမှန်အတိုင်း လည်ပတ်နေတဲ့ပုံစံနဲ့ စစ်ကောင်စီခန့် ဝန်ကြီးတချို့က ဝါဒဖြန့်လျက်ရှိပါတယ်။
AA ဟာ ရခိုင်ပြည်နယ်မှာရှိတဲ့ မြို့နယ် ၁၄ မြို့နယ်ကို သိမ်းပိုက်ထိန်းချုပ်ထားပြီး စစ်တွေ၊ ကျောက်ဖြူ၊ မာန်အောင်မြို့နယ်တို့ကိုပဲ သိမ်းပိုက်ဖို့သာ ကျန်ရှိတော့တာ ဖြစ်ပါတယ်။