သာပေါင်းတွင် AA ၏ ထိုးစစ်ကြောင့် ဒဏ်ရာရရှိသော စစ်သားများကို ပုသိမ် မဆရ ၄ သို့ ပို့ဆောင်စဉ် ဗိုလ်ကြီး ၁ ဦး သေဆုံး၊ မြို့မ ရဲစခန်းတွင်လည်း စခန်းမှူးဝင်းနိုင်ဦး၏ ရက်လည် ဆွမ်းသွတ်ပြုလုပ်
ရန်ကုန်၊ ဖေဖော်ဝါရီ ၄
ဧရာဝတီတိုင်း၊ သာပေါင်းမြို့နယ်တွင် AA ၏ ထိုးစစ်ကြောင့် ဒဏ်ရာရရှိသော အကြမ်းဖက် စစ်သားများကို ပုသိမ် မဆရ ၄ သို့ ပို့ဆောင်စဉ် ဗိုလ်ကြီး ၁ ဦး သေဆုံးခဲ့ကြောင်း ဒေသတွင်း သတင်းရင်းမြစ်များက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၃ ရက်နေ့ မွန်းလွဲ ၃ နာရီ ၄၀ မိနစ်ခန့်တွင် သာပေါင်းမြို့နယ်၊ ကျားခေါင်းရွာဘက်မှ လူနာတင်ကား ၁ စီး၊ စစ်တပ် Faw ကား ၁ စီးဖြင့် ဒဏ်ရာရ စစ်သား ၄ ဦးကို မကျီးဇင်-သာပေါင်း-လမ်းပိုင်း မှ ပုသိမ်မြို့ရှိ အမှတ် ၄ စစ်မြေပြင် ဆေးတပ်ရင်းကို အရေးပေါ် ပို့ဆောင်လိုက်ရခြင်းဖြစ်ကြောင်း သိရသည်။
ထိုသို့ ဒဏ်ရာရရှိသော စစ်သား ၄ ဦးထဲမှ ဗိုလ်ကြီး ၁ ဦးသည် အရေးပေါ် အခြေအနေ ဖြစ်သောကြောင့် သာပေါင်းဆေးရုံသို့ ဝင်ရောက် ပို့ဆောင်စဉ် သေဆုံးခဲ့ကြောင်း၊ သေဆုံးသွားသော ဗိုလ်ကြီး အလောင်းကို သာပေါင်း ရင်ခွဲရုံရှေ့တွင် အလောင်းပြင်ထားကြောင်း သိရှိရသည်။
ကျန်ရှိသော ဒဏ်ရာရ စစ်သား ၃ ဦးသည် ထိခိုက်ဒဏ်ရာပြင်းထန်ပြီး အမှတ် ၄ စစ်မြေပြင် ဆေးတပ်ရင်းတွင် ဆက်လက် ကုသမှုခံယူနေသော်လည်း သေဆုံးနိုင်ချေများကြောင်း သိရသည်။
“သာပေါင်းမှာတော့ ရခိုင်တပ်တော် ထိုးစစ်တွေကြောင့် တိုက်ပွဲတော့ဆက်ဖြစ်နေပါတယ်။ စစ်ခွေးတွေလည်း ထွက်ပြေးနေတာတွေများတယ်။ စစ်ခွေးခံစစ်ကတော့ တောက်လျောက်ကိုပြင်နေတာ စစ်ခွေးတွေဘက်က ဒဏ်ရာရတာတွေလည်း တော်တော်များတယ်။ ထိခိုက်သေဆုံးမှုတွေလည်းများတယ်။ ထိုးစစ်က ဘယ်နေရာကိုရောက်နေလည်းဆိုတော့ မသိနိုင်သေးဘူး။ တိုက်ပွဲတွေရှိနေတော့ မြေပြင်အခြေအနေ အတည်မပြုနိုင်သေးဘူး” ဟု ဒေသပြည်သူတစ်ဦးက ပြောဆိုသည်။
ထို့ပြင် ဧရာဝတီတိုင်း၊ သာပေါင်းမြို့နယ်တွင် စနိုက်ပါ ထိမှန်သေဆုံးခဲ့သည့် ဒုရဲမှူးဝင်းနိုင်ဦး၏ ရက်လည် ဆွမ်းသွတ်ကို သာပေါင်းမြို့ မြို့မရဲစခန်းတွင် ပြုလုပ်ခဲ့ကြောင်း ဒေသတွင်း သတင်းရင်းမြစ်များက ရန်ကုန်ခေတ်သစ် သတင်းဌာနထံသို့ ပြောဆိုသည်။
ဖေဖော်ဝါရီလ ၃ ရက်နေ့ နံနက် ၆ နာရီခန့်တွင် သာပေါင်းမြို့ မြို့မရဲစခန်းမှူး ဒုရဲမှူးဝင်းနိုင်ဦး၏ ရက်လည် ဆွမ်းသွတ် ပြုလုပ်ခဲ့ကြောင်း၊ သေဆုံးသွားသော စခန်းမှူး နေရာတွင် ငပုတောတောင်ပိုင်း ဇာတိ ရဲအုပ်ရင်အေးကို အစားထိုး ခန့်အပ်သွားမည်ဖြစ်ကြောင်း သိရသည်။
ရင်အေးသည် မွန်ပြည်နယ်တွင် တာဝန်ထမ်းဆောင်နေစဉ် ဗုံးစထိမှန်မှုကြောင့် ဆေးခွင့်ယူကာ ငပုတောမြို့ကို ပြန်လည် ရောက်ရှိနေပြီး ငပုတောသို့ ပြောင်းရွှေ့ခွင့် တင်ထားသော်လည်း သာပေါင်းမြို့ကို ရာထူးတိုးဖြင့် ပြောင်းရွှေ့ တာဝန်ထမ်းဆောင်ရမည်ဖြစ်ကြောင်း သိရှိရသည်။
သာပေါင်းမြို့ မြို့မရဲစခန်းမှူး ဒုရဲမှူးဝင်းနိုင်ဦးသည် ဇန်နဝါရီလ ၂၈ ရက်နေ့တွင် သစ်ဖြူကျေးရွာ အုပ်စုရှိ စစ်တပ်စခန်းအတွက် ရိက္ခာပို့ရန် သွားရောက်စဉ် စနိုက်ပါဖြင့် ပစ်ခတ်ခံရပြီး သေဆုံးသွားခဲ့ခြင်းဖြစ်ကြောင်း သိရသည်။
photo credit – သတင်းအထူးတပ်ဖွဲ့ -ပုသိမ်
