မြဝတီကို ချက်ချင်းမီးဖြတ်ရန် ထိုင်းဝန်ကြီးချုပ် အမိန့်ပေး
ဧရာဝတီ၊ ဖေဖော်ဝါရီ ၄၊ ၂၀၂၅
ထိုင်းဝန်ကြီးချုပ် ပေတောင်တန် ရှင်နာဝပ်က မြန်မာ-ထိုင်း နယ်စပ်တွင် လုပ်ကိုင်နေသော ကျားဖြန့် ငွေလိမ်လုပ်ငန်းများအား လျှပ်စစ်မီးနှင့် လောင်စာဆီ ချက်ချင်းဖြတ်တောက်ရန် အတည်ပြုလိုက်ပြီဖြစ်ကြောင်း ထိုင်း သတင်းများတွင် ဖော်ပြသည်။
အဆိုပါ လိမ်လည်သူများသည် ထိုင်းနိုင်ငံမှ ပေးသွင်းသော လျှပ်စစ်မီးနှင့် လောင်စာဆီများကို အသုံးပြုနေကြောင်း သက်သေထင်ရှားပါက ချက်ချင်းဖြတ်တောက်နိုင်ကြောင်း ယနေ့တွင် ပြောကြားခဲ့သည်။
မြန်မာ-ထိုင်း နယ်စပ်ရှိ မြန်မာပြည်သူများက ထိုင်းနိုင်ငံ၏ လျှပ်စစ်မီးနှင့် လောင်စာဆီကို အားထားနေရသည်။
“ကျမတို့ ပြည်သူတွေကို ကာကွယ်စောင့်ရှောက်ရမယ်” ဟု ဝန်ကြီးချုပ်က ဆိုသည်။
အဆိုပါဂိုဏ်းများ၏ လုပ်ရပ်သည် ထိုင်းပြည်သူများနှင့် နိုင်ငံ၏ ပုံရိပ်အပေါ် ကြီးမားသည့် သက်ရောက်မှု ရှိနေ၍ ပြင်းထန်သော အရေးယူဆောင်ရွက်မှုများ လိုအပ်နေကြောင်း၊ လျှပ်စစ်ဓာတ်အား ဖြတ်တောက်မှုကို ယနေ့ စတင် လုပ်ဆောင်နိုင်ကြောင်း ၎င်းက ဆက်ပြောသည်။
ဒုတိယဝန်ကြီးချုပ်နှင့် ကာကွယ်ရေးဝန်ကြီး Phutham Wechayachai သည် အမျိုးသားလုံခြုံရေးကို ထိခိုက်စေပါက ပြည်နယ်လျှပ်စစ်အာဏာပိုင်အဖွဲ့အနေဖြင့် နယ်စပ်ဖြတ်ကျော် လျှပ်စစ်ဓာတ်အားပေးသွင်းမှုကို ချက်ချင်း ဖြတ်တောက်နိုင်ကြောင်း ပြောခဲ့သည်။
၂၀၂၂ ခုနှစ် ဇွန်လမှ ၂၀၂၄ ခုနှစ် ဇွန်လအထိ ထိုင်းနိုင်ငံသား ၅၀၀,၀၀၀ ကျော်သည် လိမ်လည်မှုများ၏ သားကောင်ဖြစ်ခဲ့ရပြီး ဘတ်ငွေ ၆၀ ဘီလီယံကျော် ဆုံးရှုံးခဲ့ရကြောင်း ဘန်ကောက်ပို့စ်သတင်းတွင် ဖော်ပြသည်။
#WhatsHappeningInMyanmar
#RejectMilitaryCoup